Pinadesen Diskuidu

Gi konbetsasion-hu yan tautau-ta siha gi señgsoñg mampos chagu` sentimentun niha yan liñguahen manma-elihe gi hegsu imperadot I Deni`.

Mapañot 20 años sin subida (hatsada) gi sueddon niha mientras ma-apagaye kumahulu` presiun mantension familia siha gi parehu na tiempu.

I mas man-inaminasa na tautau-ta i mañasaga giya Tinian yan Luta. Mampos guaguan fektus nesessidat na todu familia man-mamatmos gi halom fache` didog na sapet.

Kau magahet na guaha ayudu gi maribahan presiun neñkanu` pot gaige i batkon familian Biktot Hokog MV Luta? Kau ayudu este na batku gi nesessidat familia siha giya Tinian?

Man-mañgge representanten iya Tinian tat kumu si Francisco Borja, Francisco Cruz yan Jude Hofschneider gi este na asuntu yan kau haf` bidan niha pot ausiliu gi familia siha? Fuera de mabende lalala` i industrian casino giya Tinian, man-kakahat pot no uma-oppe kuestion i didog na chinatsagan famiia siha. Guaha motibu na mampos hamyu man-silensiu?

Masusesede inipos gueku katpetan miyu chechu` linahyan `nai in` fa` offisina i halom ruplanu sa` kada ratu hamyu mañgarera pot politikan petsonat. Mientras tantus mas in` liñu` linala` i tautau gi hilu` oppan na diskuidun miyu! Insuttu gi intellihenten tautau Tinian. Dios tiampare na che`chu` muron yan tatamudu!

Mañan Dihada

Man-mata i patgon inalulula para u amotsa gi kafeteria. Gi karera, uchan. Malagu i patgon lau masmai todu, kontodu meyasña ni aplacha` yan paguan. Umamotsa dispues `nai humanau para i kuattoña. Libianu sinagu sa` fofotgun magagu yan meyasña.

I sigiente dia chinilili`e ni amiguña otru pat meyas. Ha agradese ayudon gachoñgña. Geftau i amiguña `nos pot guaha lau ha komprende pinepble. Poresu na ha sakrifisia meyasña mismu para i mauleg na amiguña. Suette sa` ha totpe yo`ase` na amigu.

Humasuda`yu` dispues yan ayu na patgon. Kalagtos yan anog na makreansa mauleg as nanaña. Gi oran sentada, timalagu` totche solu kechap. Era ayu pinayoña i hinegsa` ni mana`ye dididi` sirasime` yan kechap. Nina`e ni lahihu inestufa`un manog.

Hu konbetsiasune para bai` keli`e haye mañainaña yan otru siha asuntu. Fuetsan nana sumustetene i patgon. Ti sumeha macho`chu` gi finagpu` eskuela para lepbloña yan otru siha trastes eskuela. Namagof!

Kontentu hinasog-hu sa` klaru na desde pinatgoña, maseha sin tata, guaha areglu ginen disposision nanaña. Puede felis todu gi kareraña!

Un` amot ni hila`ña

Ti namanman i hita mismu kumontradidise haf` amtau para tatatiye kontra haf` ta petsisige. Desde ke manmata ta finu Eñlis dispues ta sotta primet edukasion i patgon guatu gi eskuela. Gi finu` man-amku`, che`chu` dihada este na maña saina.

Ayu mina` ha estotoba-yu` haf` ma-atitisa pot liñguahe ni ti man-a`afagcha` yan haf` gaige gi puntan sekos-ta. Un` praktika una kosa yan un` kontra gi sigiente birada. Mauleg tana aya palabra yan eksisiun haf` tasasañgan.

Kontodu famaguon famaguon-hu puru finu` Eñglis, diariu. Memegaiña man-gaige guihe lagu ayu mina` timatuñgu hila` nanan niha. Magahet na man-lagse parehu ha` edukau na konbetsasion finu` Eñglis yan matuge. I mohon ya finu` Chamorro `nai mapega finu` niha.

Asolas, mafattu tristen sentimientog-hu sa` kareran para uma-enteru i finu` Chamorro. Ta`lu 20 años ya mafnas enteramiente finu` natibu guine siha na perlas. Ni “cultural identity” i natibu na tiempu kuando menos gi ge`fena.

Yangin para umareskata dispues siempre halom kuattro na lugan eskuela `nai mapega obligasion ni debi dos saina u tinituhon gi halom guma` familia. Lau kase estague` na chalan ta petsisige pa`gu. Ti namanman `nai dispues i ineyag liñguahe petmanente ginen eskuela pot chafleg na satbasion.

Pasensia na finu` saina

Mafattu mahalañg-hu `an hu hassu tatte finu` biahu gi konbetsasion mame. Motmut pinasensia yan amtau na inapagat gi fina` estoria. Esta i chalegña mañge` mahuñgog. Este na eskaleran finu` amku` esta maliñgu gi halom natibu.

I to`a na dopbladan palabra `nai anog haf` amtau na konbetsasion gi entalu` siha yan bisinu antes. Pindedoñg palabra, maseha pot mañgopblan dibi, na`magof sasañgaña. Kumeke ileghu na mana` esgin un` banda lau klaru haf` sessu finatoña i prohimu. Antes de u birague` para iya siha siempre ilegña i mandidibi, “Un` ratu ha`, estague` para si nana-mu ya un` gagauye-yu` dispensu sa` kulan atrasau”.

Mattu gi siña tapo`lu kumu amtau na finu` diplomatiku `nai ha komple haf` malago`ña gi hilu` motmut na pinasensia. `Nai hu planta-yu` gi taiguihe na eskaleran konbetsasion hihot mahlog i haguhan tatkilu` haga` sa` sumen tai pinasensia-yu`. Ai dios mihu, Iku!

Katma yan suabe

`An hu fagcha`e sustansiau na asuntu, hu diskuattisa yan analisa haf` guaha gi todu atmo banda dispues `nai sumeha-yu` man-hassu kuestion siha antes de bai` fama` disision.

Hagas hu akustumbra este na eksisiu desde antes. Ayu `nai libianu hu li`e asuntu gi hilu` kinemprende kontodu haf` man-sañgan gi matan tautau ni ti ekspressia dibuenamente. Gaige kabales sentimentun niha gi matan niha. Estague` baliña umeyag umekuñgog kabales.

Yangin guaha kinentra, pues haf` na puntu `nai ti umafagcha` yan kau siña madiskute kumu puntun inadiñgan estake monhayan. Ginen este na attura `nai mas libianu ta establese inakomprende ginen todu atmos banda.

Presisu este na modun inadiñgan para umakomprende ni tautau-ta na siña guaha inafamauleg ni achog ti parehu na opiñion. Todu u fan hanau para iya siha mañgontentu na masañgan hinassun niha kabales. Ni unu u layu`.

Hana` hahassu-yu` finu man-amko`ta antes gi inetnon huntan i señgsoñg. I man-menhalom umesgaihon i inadiñgan gi hilu` areglu. Hasan inadisgustu. Todu mañgonfotme. Ayu dispues `nai malagnos fina` fresku na gimen yan mirienda `nai mana` finu mas puntun niha.

Este na attura `nai tana` mansu kustumbren impitu. Dispues de todu man-adiñgu gi hilu` pas. Mina` hu diskute este pot hagas man-agu`ot hit mahetog gi hilu` imbidiu `nai ti man-afagcha` hinasso-ta. Lau gi hilu` kabales na inadiñgan amtau na attura `nai mas libianu ta soda` ginefsaga-ta.

ShareTweet about this on TwitterShare on Facebook0Share on Google+0Share on LinkedIn0Pin on Pinterest0Share on Tumblr0Email this to someonePrint this page
John S. Del Rosario Jr. | Contributing Author
John DelRosario Jr. is a former publisher of the Saipan Tribune and a former secretary of the Department of Public Lands.

Related Posts

Disclaimer: Comments are moderated. They will not appear immediately or even on the same day. Comments should be related to the topic. Off-topic comments would be deleted. Profanities are not allowed. Comments that are potentially libelous, inflammatory, or slanderous would be deleted.