Kulan guaha dumanche hit ira ni fuetsau hana’ silensiu i tanu’ punta pot punta. Mampos i tautau man-malahyu. Kontodu papana niha man-poduñg. Mampos ti asegurau haf’ mafafana’. Tat ti mamatmos gi fondun kantit diskuidu. Ni unu mumiresi te’ug na linala’ miserable. Lau este na estau ’nai man-mapega i linahyan. Pot ihemplo:
1. Mampos chafleg fuetsan pottanmonedan familia pot maribaha oran cho’chu’ ’sino unu gi dos asagua tumai offisiu ’nai mahuchum i bisnis ’nai machochochu’.
2. Mientras tantos, mahatsa presiun neñgkano’ siha, gaselina, fuera de sumen guaguan na apas kandet yan hanom.
3. Guaha gi rumesisibe ayudun medicaid ni amot ti man-manae’ ’nai ti man-apase i gobietnu ni obligasioña gi papa’ kontratan programa.
4. Mas ma-maribaha i programan medical referral.
5. Mahatsa tatkilu’ apas hospitat guine gi mapos na semana.
6. Lamegai na familia man-ma-amot ni guma’ niha pot makat i obligasion ’nai unu ’sino todu i dos saina tumai che’chu’.
7. Mas ke dos mit (2,000) na tautau-ta dumiñgu Marianas ’nai tumaya’ appottunidat cho’chu’ entalu’ Luta, Tinian yan Saipan.
Sumen makat para hinanau i linahyan na biahe. I dañkulu na maribahan rinikohen fondu gi sakan para i kahan iya Marianas mampos tumunog. Lamegai na programa u fan chafleg pot tinahuñg fondu. Prepara hamyu para i mamamaila’ na mattiru siha ginen diskuidun i man-sabiun este na administrasion.
Hokog inañgoghu! Siempre u machule’ este na sentimentu guatu gi lugat botasion pagu na Nobiembre. Nahoñg na kastigu!
****
Sentimentun Tautau-ta
Ma-introduse un’ resulasion para umadulalag i gobietnu ginen offisioña. Ma-akukusa i prohimu na guaha siha gi obligasioña tiha chochogue ’sino aksioña ni umakontra yan man-maprohibe siha gi papa’ konstitusion. Seriosu na asuntu ya siempre talie’ haf’ para u fan masusede gi ’nos kuantos semana yan pa’gu.
****
Hu e’ekuñgo "Isla 63" (KUAM Guam) ’nai man-agañg halom un’ prohimu pot i man-malalagu siha para offisinan Washington. Sin ditension ha apagat todus kandidatu na muñga i che’chu’ imbidiu guihe lagu. "Taya’ balita i para man-mañgagau ha’ sigidu kada sakan". Dispues ilegña, "Maulegña in’ fan mata’choñg ha’ gi un’ banda ya in’ fan mamatkilu".
****
I otru ha kuestiotiona otdin siha pot planun "military build-up" giya Guam. "Ha kolat siha kanton Andersen pot babuen halom tanu’. Hita ayu na babue i masasañgan!" Ha dobla ya ha kuestiona haye para u hinatme Guam. "Dos batku na Tagalu nahoñg para u lachai hit pumunu’ guine". Gai puntu i prohimu lau makat machanda haf’ planun depattamenton defensu.
****
Un’ prohimu sige chumaleg sa’ humanau i kilisyanu mandibi trastes guma’ siha pot masañgane na esta ti apmam siempre ma-apprueba i salape’ "Guam Reparation". "Mapunu’ i aktu ya gaddunyu’ guine yan manadan dibi. Pues hu chule’ i tetehnan ni tihu nasetbe ya huna nana’lu". Ai lokue’ i prohimu. Mauleg u eyag na ayu ha’ seguru i gaige esta gi halom betsaña ’sino pottanmonedaña."
****
Guaha lokue’ pumoñgga i lehislaturan Guahan pot an’ guaha fina’ hunta mana setbe i finu Iñgles. "Sige man-finu’ Iñgles lau todus Chamoru i mangaige guihe. Haf’ mohon ya tafan finu’ Chamoru pot no tafan adage pot usun ti liñguahita?" Dinanche fino’ña i kilisyanu guine na biahe. Yangin para umana’ klaru haf’ i asuntun inekuñgog gi linahyan, pues maila’ ta fan finu’ liñguahen i tanu’.
****
Man-agañg otru na debi u guaha lai na u fan madipotta kriminat siha piot ginen iya Chuuk ni man-ma-arresta pot seriosu na inaminasan lai. Frañku na sentimentu lau ’nai gaige i tautau ligat, pues debi umasede ni mafanana’an "due process" na direchu. Estague’ patte gi direchon maseha haye masogne che’chu’ linache ’sino kriminat.
****
Hu lie’ un’ hobensitu sige ha bomba kase 20 libra na pidason lulog para una’ mahetog kuduña. Magahet na masahegat i prohimu. Hu tuñgu’ na sen metgot. Dudayu’ kau ayu malago’hu para afagcha’hu gi fina’ estrakada. Ha lachaiyu’ muna’ kinaputon ni kestat brutu. Masahegat na balaku!
Home | Weather | Advertising | Classifieds | Subscription | Contact
Us | About Us | Archives
©2006 Saipan Tribune. All Rights Reserved
