Gi kada pumasehu-yu' entalu' Oleai yan Garapan, gaige gi sanlagu un' pasifiku na tasi, katma na disposision 'nai matata'choñg. I pasifiku na fatachoñgña muna' ma'agim sentimentoghu ni umatisa sensian esperansa pot futtunan tautau-ta.
Hu kakanta “Ti gi un' palasyun I riku” sessu 'an sigeyu' mona. I gumu'ot mas attensionhu ayu na patte 'nai ilegña i kanta, “Ya ti siña hu tulaika sa tat mas gefsaga, kumu ayu siha na islas I islas Marianas”. Estague' na islas 'nai manmafañagu hit ya este 'nai u saga todu malago'ta.
Katma 'sino mattiempu debi ta estira pinasensiata gi satbasion haf' muna' fan chachatsaga hit. Huñgan ha palo'pu' hit pineduñg ekonomian gi enteru elmundu. Lau este mafattu gi tanu' gi kada sien (100) años. Taimanu minesñgon guelu, maila ta fan apipet gi hilu ko'operasion sa' siempre ta satba todu problemata.
****
Doble Na Dañu Dumestrosia Hit
Dos poduñg halige muna' tailaye i ekonomian iya Marianas. I hinalom federat `nai ha manda immigrasion yan sueddu `nos kuantos años malofan. Pinalo`pu` este ni man-dañosu siha na areglu ni inapprueban lehislatura kontra i komunidan bisnis. Fuetsau, mas ke siete biyon pesus ($7 billion) na salape' kometsiante ginen hiyoñg dumiñgu iya Marianas pot man-baban areglu siha.
Guaha mohon siña man-machogue pot para uma-ataha i taya' salape` gi kahan iya Marianas? Siña ha` ta sañgan suspichosu na ineppen “huñgan” lau kaiha para estake u siña guaha dañkulu na adelantu guine na patte. I kometsiante ni dumiñgu tano'ta man-hanau guatu gi ayu siha na tanu' giya Asia `nai mas lagse' areglun niha gi bandan bisnis.
Nachatsaga sa' i guaguan kandet ni umafuetsas mahuchum megai na bisnis guine. Areglu ni fuma' kontrariu i bisnis dumulalag kantida ginen este. Dañkulu dinidahu na u fanalag mage talu i esta man-hanau.
Este na mattiru mas muna` kohu i kahan iya Marianas. Sige pagu i man-sabiu siha gi Deni' man-ñgaha' hulu' gi lañget. . Kulan mananañga finattun ruplanun piau para u ta'lun yumute' mas regalu ginen i lañget para`isu. Ti umasusede! Mientras tantus, mas matmus iya Marianas gi taduñg na tasin dibi. Dañkulu na kontrariu!
****
Lugat pañglau echuñg
Malolofanyu` un` lemlim tautau gi katan Hyatt Regency 'nai hu li`e i hagas lugat pañglau echuñg antes. I propiu lugat esta inadotna ni manadan flores yan an`pesun akitran. Gi lamlam tampen makinan karetahu estaba un` ma`lag kandet. Hagas ayu na lugat `nai `in fifigu' sapatus mame dispues de `in rompe i fina` sisonyan.
I dañkulun hotel dumisplanta petmanente hagas lugat mame man-e`pañglau. Mafnas i hagas in' fa'tototchen familia piot gi tiempun ha`ilas. Hu sugun karetahu para bai` lie` kau guaha mohon man-malalagu guatu gi halom cha`guan. Taya! Guiya i hulili`e pagu i mafanana`an “adelantun” modetnu na Marianas. Gi mismu tiempu ha funas i hagas lugat mame pañglau echuñg. Megai man-sinatba guihe na tiempu piot gi hinanau i Navy guine.
****
I fina` luñu giya Sadog Tasi siña umesuette hau pañglau. Gigon lumatkatan hau adahe sa' guaha masuspecha mayute' PCB na amot guihe. Binenu para i tautau ayu na kosas. Suhaye ya un' latkatan gi sisonyan iya Tanapag. Lastima sa' i modetnu na modun linala`ta yumulañg gi mismu tiempu hagas lugat totchen natibu.
****
I Sabanan Tano'ta
Gaige un` manadan gapgap, gaddu' yan dagun kalulot (daggun apaka`) gi fina sabana siha gi todu isla guine. Piniloghu na lugat troñku yan neti pat sakaten kabayu. Hu lie` `nai sessuyu` `un tiempu umebinadu punta pot punta na abundansia este siha na fina` aguon Chamorro.
I gaddu` i mas riku na asientu gi halom todu tinanom. Pot essu na mas guaguan na attikulu ke asientun mendioka yan otru siha. Guaha un` atuñgo`hu fuma` bisnis asientun gaddu` pot mas ke dies años esta na tiempu. Sumen mauleg na bisnis deste ke ha tutuhon kumusecha asientun gaddu`.
I mendioka i mas sessu mafa` asientu. Ke chage mananum gaddu` sa` mas benefisiosu asientoña. Dididi` na animu ha nesessita para un` tutuhon kumusecha un` tinanum ni hagas ta polu kumu tinanum machaleg gi halom tanu` siha.
****
I paire kumasadules siempre ha totpe hatsadun manog 'sino babuen halom tanu`. Maseha manu gi dos ya un` kone` siempre nina` mantika sekosmu gigon masa nina` lagumu. Piot ya masuette hau binadu. Mas paire sentadamu entalu' fritada yan kelaguen.
Home | Weather | Advertising | Classifieds | Subscription | Contact
Us | About Us | Archives
©2006 Saipan Tribune. All Rights Reserved
