Home  |  Weather  |  Advertising  |  Classifieds  |  Subscription  |  Contact Us  |  About Us  |  Archives
Home|Weather|Advertising|Classifieds|Subscription|Contact Us|About Us|Archives

link exchange; in-house ad

Friday, April 18, 2014

Inañgokun Publiku

I inañgoku unu gi mas guaguan na bittu yan onru gi tautau. Este na bittu finañagu ni personat na integridat ginen hagu solu. Unestu yan klaru konsensiamu gi todu pinetsige parehu ha’ para hagu mismu yan i otru.

Debi un’ gana ginen i prohimumu ni pumega konfiansaña giya hagu. Presisu na diariu un’ bisita ennau na onru. Mampos lagse’ na gigon masge’ ya maliñgu magpu’ todus i inañgoku.

‘Nai ma-entrega hau nu ennau na inañgoku ni publiku, pues gaige gi bandamu i para un’ famauleg ya un’ adahe gi katkuet kinalamtenmu. Yangin malagnos ginen patman kanaimu pot diskuidun hinasñgon, pues i publiku siempre mofo’na huyuñg gi petta ya inabandona hau.

Estague’ masusede gi mapos na Mattes. I administrasion hafa’ basula i inañgokun i linahyan. Ni na’yan tatte parehu! Pot essu, ni hafa u chogue esta taigue i inañgoku taiguihe antes. Magpu i nobeña yan lisayuña pronto.

I mas mauleg na chalan gi halom este na te’ug chubasku i para u resigna siha i mangaige  pa’gu gi siyan publiku. Este solu satbasion gi hilu’ pas gi a’gañg na disision publiku ni ma-manifesta gi mapos na Mattes! Taya’ ga’tut gi talu’. Klaru disisioña yan dinisehaña i publiku.

Tiempon Abundansia

I kinisechan fangualu’an piot gi hinalom ha’anen tiempon gupot abundansia neñkanu’. Piot ya umagacha’ yan sagun atulai, mañahag, faya yan tiau. Mas paire hinanau todu familia guine. Tai malegfaghu nu este na tiempu antes.

Sumen namagof i dinaña todus piot gi inana’en kinisecha ‘sino kineni’ guihan. Tat ti dumaflogue inaflitun pattun ‘sino mafadeni’ na mañahag, kelaguen atulai yan otru siha putahe.

I puntu: Ginen inayegta mauleg na simiya ni ta tanom numa’e’ hit mauleg na kinisecha. Taimanu i otru siha preparasion gi linala’ta kontodu preparasion para an’ ha facha’e hit tiempon hai’las.

Estague’ na finapos i fafayen natibu antes. Mauleg ta pañgun tatte pot satbasionta gi katkuet mattiru. Na fan geftau hamyu gi krineansan famaguon miyu preparasion para futturon niha. Haf’ un’ tanom ayu siempre un’ kusecha. Bien karera!

Paska na ekonomian isla

I tano’ta man-dikiki’ na isla. Man-tai mina hit ni siña ta bende gi metkau elmundu tat kumu laña. Lau mampos ta polu kulan hokog appottunidat pot estau-ta. Atan Japon, un’ dikiki’ na nasion ni umadelantague’ kumu mina’ tres gi ekonomian enteru elmundu.

Ileghu na kumu ta suhun gi un’ banda i estau dikiki’ na isla ya tana’e animu taimanu Japon, libianu man-hanau mona hit sin u fuñut hit i man-taya’ta. I nina’ siñata gaige na uma’atog gi sensian natibu ni tasede maigu’ sin presisu.

Enfin, ha nesessita este sattun yan metgot na diniseha para ta adelantan maisa hit gi hafa guinahata. Repara sa’ gigon chumatsaga i tiempu, ta bira hit tatte gi gualu’ yan peska. Na ti hagas este fafayita kumu petmanente patte gi tradision natibu? Guaha mohon siña ta chogue para ta adelanta este na patte gi sensiata?  

* * *

Lugat Fañotdayan  

Giya Filipinas, hu bisita un’ sumen dañkulu na fañotdayan. Mas ke 200 hektarias na tinamom choda. I empleau sige mahoñggu’ i manto’a siha na choda mientras i pumalu pumepega gi halom kostat plastik. Malofan para i batku ni para u chinili’ para Japon. Guaha mohon chetdata ni hihot yan tinanom niha? Chetdan loñg? Insuttu!

* * *

Dispues de pagyun choda, manadan hagasas ni esta man-hagamham man-yinite’ ni mañglu’. Este na palabra (hagamham) i añglu’ na hagun niyok. Lamegai palabras siha pot troñkun niyok mauleg in’ ketuñgu’. Fana’gue famaguon siha haf’ dadeg, aplok, manha, ma’sun, na’gao, pontan, faha’ yan kanu’un. Todu este siha man-gaige gi papa’ hinerat na palabran niyok.

Back to top Email This Story Print This Story

 

Home | Weather | Advertising | Classifieds | Subscription | Contact Us | About Us | Archives
©2006 Saipan Tribune. All Rights Reserved

MORE Opinion