Home  |  Weather  |  Advertising  |  Classifieds  |  Subscription  |  Contact Us  |  About Us  |  Archives
Home|Weather|Advertising|Classifieds|Subscription|Contact Us|About Us|Archives

link exchange; in-house ad

Saturday, April 19, 2014

‘Suenu!’ Señat Komunida

I “suenu” na palabran Chamorro un’ huhuñgog ginen i hegsu ‘sino sabana kulan notisia para i tautau siha gi señgsoñg na guaha mamamaila’.

Giya Anatahan, Pagan, Alamagan yan Agrighan ‘nai sessu mana’ setbe este na palabra entre chagchag oga’an ‘sino lemlim tautau ‘an guaha mali’e’ batku gi puntan tasi.

Ha prepara siha i tautau tinala’ sine’su’ para umamueba papa’ gi kantun tasi. Antes de ‘las dies humalom un’ boten dikiki ya sige malofan i sine’su’ para i batku.

‘An monhayan, man-hanau i famalao’an ya man-mamahan fektus, chupa yan otru siha nesessidat gi hilu’ batku ginen apas sine’su’. Kantida yan nahoñg mafafahan para esta i biradan i batku kase tres mesis dispues.

I suenu ni huna’ o’oppan pot mamamaila’ na didog chinatsaga ginen diskuidun este na administrasion. Prepara hamyu sa’ esta ha tutuhongue’ este na kastigu.

****

Maisa na bisita

Gi chagchag oga’an hu bisita un’ kanton tasi pot para bai’ sede ma’asen na guinaifen mañglu’ gi tatautau-hu. Homlu’ na eksisiu ya gi mismu tiempu ha sedeyu’ bumisita ‘nos kuantos asuntu siha, silensiu.

I pañgpañg mandikiki’ na napu siha esta monhayan mapacha otru kantun unai gi chagu’. Mafattu kuestion manu na tanu’ ha bisita antes de una’ fotgun adeñghu. Kau ha kikilili’ halom sagun atulai, tiau, faya ‘sino otru guihan sanhalom?

Dididi’ guaifon na oga’an mientras i pajaru matutuhon mañgarera huyuñg gi chagu’ yan taduñg na tasi. Gaige a’paka’ na mapagahes gi un’ banda. Ma’lag i atdau na haane.

Mattu kuestion lokue’ haf’ mohon usun ayu na kanton unai gi antigu na tiempu? Plaset maplantan chininchulun guihan, fina’ guput komunida, pat lugat preparasion peska yan kasadules gi chagu’ na tanu’? Puru pot antigu humatme hinasoghu na oga’an.

Gi bandan espirituat, un’ fehman na tinayuyot para i man-mofona ni kumayun kareran i manatatte siha na hinerasion. Puede lokue’ ha bendise hit i Saina ya u felis todu pinetsige pot famaguonta yan man-natibu.

Nina’en chenchule’

Gi finagpu’ lisayon linahyan, mababa ni familia i kahon nina’en tautau siha salape’. Masoda un’ sobre ni mañañahguan tres pesus.

I man-na’e sumen poble. Kase hagas hana’ sahñge ayu na tres pesus para ‘an guaha chinatsaga gi familia. Ha lagnos ya ha pega gi kahon kontribusion.

Hana’ fan man-hahassu hit haf’ tinateña ayu na kontribusion. Yangin gai guinaha, pues siempre ilegta pot sosobla na man-na’e. Lau sumen poble. Estague’ i sumen ma’gas na linagnos sa’ maseha makat ha mattitgue’ pot minagof ginen i korasoña.

****

Mayogua sasalaguan dos gobietnon Marianas. I unu ni esta para umafondu sa’ esta gaige i guafe gi agaga’ña ha esalalague i otru haf’ taimanu na lamita ha’ i guafe giya guiya. Ineppe, “Famatkilu sa’ pa’gu mamatai otru gobietnota ya gaige guine papa’ na ha o’ombu’yu’”.

Dispues mahuñgog ‘nos kuantos membron lehislatura mafafaisen si Lusifet kau u fan dinispensa yangin ma-adapta un’ resulasion para uma-impeach si San Pedro. De dios ya para manu hamyu dispues? A` Saina!

****

Ha chule’ i amku’ i “gue’ha” ya sige ha bohaugue’. Magahet na katma yan ma’lag i semnag. I finattun lahiña ginen i lanchu, ha faisen kuantu na “iñgglera” ha tanume gihas kamute. Ineppe na kuatro. Gue’ha tinifog hagun ag’gag ni ma-u’usa para bohau. Pagu ingglera guiya ha’ yan lucha.

****

‘Nai ha hassu umakamu’ i amiguhu Magoo, ha katsague’ mamaisen saina sa esta listugue’ gumai familia. Gi inasoda’ yan mañainan i palao’an, maplasu dos años ya dispues ‘nai para umabisita ta’lu i finaiseseña. Hu faisen haf’ masusede, mamaisen, “Haf’ plasu?” Kanaha’ malagnos gi sikoshu na guiya ennau ‘nai taya’ inañgoku gi lahe. De dios mihu!

****

Dispues de mahafot un’ amiguhu, sige masañgan grasiaña siha ‘nai lalala’. Ilegña un’ atuñgo’ña, “Hekkua haf’ na maseha haf’ ha sañgan pot guaka ya matai ha’ papa’ yan guaka gi sikosña”. Ilegña i otru, “Nañgga sa’ ha chule’ i botihu pot tulaikan guaka ya esta pa’gu ti mafattu i boti”. Ineppe ni otru, “Lapekaras, pues nihe ya un’ chule’ sa’ hagas ha pega gi lanchu”. De dios mihu!

Gi taftaf oga’an, sige i dos luchan para iya siha ginen Magpi’. ‘Nai mattu gi menan gima’ Yuus, guminen i tata i draiba. Finaisen ni gachoñgña haf’ ha keke chogue. Ilegña, “Ahe, man-gagauyu asi’i gi Saina”. Finaisen ensegidas, “Ya man-gagau hau asi’i pot este tatte i sinaketa guaka?” A` Saina!

****

John DelRosario Jr. is a former publisher of the Saipan Tribune and a former secretary of the Department of Public Lands.

Back to top Email This Story Print This Story

 

Home | Weather | Advertising | Classifieds | Subscription | Contact Us | About Us | Archives
©2006 Saipan Tribune. All Rights Reserved

MORE Opinion