Tiempon Areglu

Yangin difirientes klasen hatsada sumasapet i publiku na sakan, haf` na ayudu ina` guaha para in` ataha linala` miserapble gi señgsoñg siha?

Deste ma-utut pagamientun man-ritirau, tinatitiye ni mahatsan health insurance, dispues gaige ha` ta`lu i hatsadan neñkanu` yan apas kandet gi santatte kulan guatdia kontra monedan familia.

Mañgge promsesan ayudu gi tautau ni in` represesenta gi todu atmos ramas gobietnu? Kau uttimu rekueddu i linala` miserapble ni hamyu pumega pot diskuidu yan mañan tatnun?

I botadot kabales esta ha komprende asuntun linahyan. Ti listu rumipite pinadesen diskuidu ni mafattu ginen hegsu` I Deni`. Siempre talie` este na disposisio pa`gu na sakan.

I binibun publiku klaru mamanifesta deste ma`pos na sakan eleksion. Mas este u sentidu na biahe `an mamokat i botadot para i sagan eleksion na sakan. Ti umahñau siempre u guaha tinilaika.

Ti komprendiyon i finatane` `nai kimasosson atuf gima` i tautau siha gi señgsoñg!

Ta batga hit na i man-ma’gasta man-listu gi inakuden masuhetan difirientes hatsada ni sumakenguan fuetsan familia ni tetehnan na salape` niha. Lau ni unu sumuhon kalañkeña. Man-hanau halom gi fondun apusientu, man-atog.

Apas kandet kada ratu kahulu`, mahatsa esta i balin health insurance `nai gi mismu tiempu ma-utut pagamienton man-ritirau, yan siempre lokue` u kahulu` presiun neñkanu`. Man-mañgge i 29 na membron lehislatura yan administrasion gi este na mattiru?

Pot sumen makat gi familia siha gi enteru Marianas i pinadesen diskuidu mina` hu atitisa haf` bidan niniha i man-ma`gas gi masuhetan pinadese gi señgsoñg siha. Kau pot mampos chagu` papa` i tautau gi señgsoñg na mahasñgon ma-upus obligasion niha?

Na ti man-manhula` hamyu para in` adelanta ha`anen i tautau ni in` represesenta gi hegsu` I Deni`? Mañgge fina` cho` chu` miyu gi este siha na puntu?

Pot fabot nafan safu ham ginen otru biradan “biba” `nai para inna mamtu` i hagas pasadu na dinagen i alacha na tiempu. Esta `in dimemoria mañan miyu. Pues muñga mata`lun ma-atbansa i hagas `an ñgañgas siha na dinage.

Na ti magahet na mamatmos Marianas gi halom fache` dibi? Haf` bidan miyu para in` aregla este na finatsu?

Kau ti mahasñgon na sumen chatsaga linala` i tautau siha na tiempu? Maseha haf` na eskusu, ti matulaika i diberas na modun pinadese gi enteru halom iya Marianas.

Pot nuebue años ma-upus obligasion niha dimas de uma-aregla ha`anen i tautau siha. Haf` na fugon manog `an man-huyuñg publikamente pot diskuidon niha. Lau sotta ya i tautau u inaregla futtunan hinerat punta pot punta. Gaige este na direchu gi kanai i tautau na Nobiembre.

Ti komprendiyon i mañan “no siankassu” lau didog kahulo`ña i gaston linala`. Deste insurans (insurancez) hinemlu`, kandet, gaston neñkanu` yan otru siha obligasion. Tat ti kahulu` deste finagpu` ma`pos na sakan. Lau, otdinariu matrata este siha na chinatsaga ni man-ma`gasta. Kau mampos maneñgheñg mañglo` I Deni`?

Klaru na man-diniñgu ni asuntun linahyan siha. Kase pot este na man-malag papa` fina` nuhuñg para u fañaunau man-ega` ni diskuidon niha mismu. Na ti satbasion gaige gi offisiat na obligasion miyu?

Gigon uma`asoda` ham, ha choneg un` latan setbesa ni hafana`an “lateria” pot para baina` freskon ñaihonyu`. Chumaleg pa`gu na debi bai` lumus binibuhu gi maneñgheñg na lateria.

Sige ham pa`gu umasaulag asuntu siha. Dispues, ha apagatyu`:

“Primu, ni unu umapunta hau satbadot probleman enteru elmundu. Pues ketu ya un` uñgag ta`lu un` lateria puede linasa hinassomu”.

Magahet, sumehayu` ya sige pa`gu i konbetsasion frihonada pot para bai`n achatge antes de bai` tulusyu` para iya hame. Ha komprende puntoghu pot asuntun linahyan. Guiya lokue` pumadedese ma-utut sueddoña kumu ritirau ni pinalo`pu` ni guaguan kandet, kumahulu` kobransan insurance hinemlu`, neñkanu` yan otru siha hatsada.

Diberas, makat na mattiru piot para i man-ritirau ni dididi` sueddon niha! Mauleg na guaha laterian konsuelu gi ice chest i amiguhu `nai siñayu` hu lipa. Siña soplu dinagen primet biahe lau ti u falofan dos biahe. Siempre ta pega gi sagaña. Listu i publiku ni este na obligasioña.