Gi Nuebu Na Sakan

Seguruyu` na gi fina`pos Noche Buena lamegai asuntu ta diskute gi lamasan sena. Deste binibu esta i mana`bubu mesklau i konbetsasion.

Lau i namagof na puntu i dinaña familia gi hilu` satton na inafamauleg. Ta rinueba amesta gi entalu` mañelu yan famaguonta siha. Dispues de tinayuyot ta benefisia priniparan familia na sentada.

Agupa` gi bespiran Añu Nuebu fan daña` ya in` kanta “Tafan Magof Todu”. Ilelegña patte este na kantan tradision relihion-ta, “Jesus Yuus mame gi nuebu na sakan gai asi` nu hame apatta i dañu, na`e ni diskansu i man-gaige `sta gi naftan yan ayu seha kassu matai na sakan”.

Tafan adiseha dinuebu puede mas antai kinalamtenta gi nuebu na sakan. Despide sensian imbidiu ya ta sedi animosu na finachochu` todus. Felis Añu Nuebo para todus! Si Iku na familia.

Areglun Tanu`
I lumamen ekonomian i tanu mediu rumesponsasapble i federat. Ha utut atoridat Marianas pot immigrasion ni debi u chacha gigigu mona yan nesessidat hutnaleru gi maseha hafa na planun adelantu.

Ala kuenta, hana` utot un` kanai Marianas. Ke lau deste ñgai`an `nai siña i tautau machochu` kabales yan un` kanai? Pues estague` layeye lokue` na mampos bahu kinalamten ekonomia-ta. Estague` na puntu `nai debi u listu i man-ma`gasta umina i dañosu na areglon federat.

Este na puntu debi fuetsau ta ke aregla yan iya Washington `sino kada ratu hit man-mañufa` mattiñgan sin presisu. Mediu obligasion federat umaregla i ekonomian i tanu` segun i kontratan i Covenant. Gi mismu tiempu hita mismu sumen presisu na ta atetuye umaregla mismu halom gima`ta.

Areglon direchon sudadanu
Dos direchon sudadanu `nai sessu man-matompu` i tropan man-sabiun hegsu` I Deni`. Era direchon gumai atmas pake yan gumai tanu`. Gaige este na dos direchu prinitetehe ni i mas ma`gas na konstitusion iya America.

I tautau gai direchu dumefende-gue` yan familia. Ayu na mana`e direchun gumai atmas pake. Ni unu u responsapble `an mahatma gima`mu ya guaha mana` iridau `sino mapunu` membron familiamu. Estague` na masede hau gumai atmas pot proteksionmu yan familiamu. Seguruyu` na taya` ni gai konsensia na membron komunidat-ta u usan kinibrutu atmasña solu pot proteksion.

I otru i direchon kada unu gumai tanu` `sino propiadat. Ginen hilu` este na direchu ayu mina` ni unu gai bisnis man-estotba gi propiadatmu. Ni Attikulu Dose tai fuetsa nu este na direchu. Deste ñgai`an `nai un`entrega gobietnamentun Marianas gi disposision tano`mu? Petsonat na propiadat ayu mina` hagu solu siña yan libre dumispone tano`mu.

Man-ñahlalañg
Kada matompu` ya basnag ekonomian i tanu`, ensegidas tafalague i gualu pot para ta nanahuñge mantension familia. Birabirada este ta repite. Yangin kada ratu hit tatte gi dipotsihe tradision natibu hafa na tatnai mana` guaha programan hatdin para ta soyu` familia-ta man-mananom?

Ti hoñgiyun na benefisiu un` tanom choda gi tatten guma` `sino dikiki na luchan kamute yan sune. Dispues gigon sakan, hagu para un` kinisecha tinanom-mu. Chage!

•••

Chumiliguagua` un` patgon lahe `nai tumalaya si bihuña. Gi karera mona umeyag man-gonaf guihan ginen usun unai. Ileghu na `an echu sutteru ayu na patgon siempre u eyag man-dagau talaya. Gigon mattu guennau na eskalera kontentu siempre i saina sa` ti u ñalañg esta ayu na patgoña. Piot ya umeyag mananom. Mas bintaha para guiya i prohimu. Guiya este i dos offisiu fumañagu tradision fangualu`an natibu!

•••

Hafaisenyu` un` ñietu hafa na difirensia Chamorro yan Karolinas. Hu esplikaye na i Chamorro impitosu na gigon lalalu` ensegidas sinablasus hau. Dispues de mankahaga` `nai man-a`afaisen dispensu. I Karolinas ha anununsia `an para u lalalu`. Gigon ilegña na siempre “gof lulalu`yu`” maulegña un` kaikai hau. Tatnai sisida un` mana` tailaye.

•••

Este offisiun “hereru” mafnas esta guine. Uttimu huli`e nu este na cho`chu` un` tihun mame. Magahet na diariu ha soñgge i lilug dispues ha tutuhon umacha ni masu estake ha fotma kau hechuran machete pat ilun kuha pat fusiñus. `Nai madispone ayu na amku` magpu ha` lokue offisiun hereru.

•••

Mamaisen un` lahen mame hafa na inna` gagasgas i patas guaka. In` esplikaye na para umakadu para haye mumalagu`e. Dispues hu sañgane na ayu na totche bokan mamopble. Ni patas `sino dadalag guaka siempre ma-apprubecha gi fina` kadu. Antes `nai hasan cho`chu` yan fektus, todu finachucho`ña i natibu pot mantension siempre mabenefisia.

•••

Bastara ke kinahulu` popbleyu`, guaha `nai mattu mahalañg-hu ni asun kusinan sanhiyuñg. Adahe na man-ñge` hinegsa` mana masan hilu foggun guafe. Piot ya un` ha`me guihan pat katne gi hilu` foggun ya un` tunu pat aflitu dispues, mas paire sabotña totchen amotsan taloa`ne `sino sena. I asu ni tat tiha hatme gi halom kusina muna` kusisina i feggun nana. Diberas!

•••

I modun tautau libianu un` li`e haf` na petsona un` fafana`. Guaha metgot mañan kabron, miron, santulon yan hoñgiyon na Eban. Deste antes, achog amiguhu ni man-dage un` biahe ensegidas hu dispacha piot ayu i gai lala`et manganite. Finu` mañaina haf` hau na klasen tautau gaige gi haye amigumu siha. Pues gef atan kau lobu pot mansu na parientes Lusifet umiririya gi gima`.

•••

I mas antau gi linala`ta tatnai mapatten adumididi` `sino ma-meskenuye. Ha inklusu inagofli`e, sensian fiet, yan ma`ug na amesta. Tatnai lokue` huli`e este mabaratura. Todu i tiempu mafattu motmut ginen gineftau yan sinsiyu na minagof korasonta. I gineftau piot para i ti muna` sisiña mit besis na bendision para hita ginen hilu`.

•••

`Nai mañake i primuhu dagun tautau ha sufan dispues saibog kontentu gi kusinan sanhiyoñg. Ha planta dispues ya kontodu guahu sumaunau chumochu. Ai na pairen agu`on haya.

Dispues, hu faisen para u hahassuyu` gi otru biahe `an ha hale` daguña. Ilegña na manaiña ha` i in` benefisia gi lamasa. Pues hu dispacha kumu finu` lahe. Tres dias malofan hu huñgog na mapresu pot guaha kumeha na i primuhu sumake i dagu. Mana` fan mireseyu` sinake. A` Saina!