Mapunu` Industria

Este i chechu` muron ni mabalutan ni interes pertsonat malefa hau dispues haye un` represesenta. Mofona buchimu `nai kontodu hagu dispues bachet gi aksionmu siha.

Si Senadores Francisco Borja yan Jude Hofschneider masupotta inapprueban Saipan casino `nai gi mismu tiempu mapunu` i industria para Tinian. Ke lau haye in` represesenta? Na ti pot futuron tautau Tinian na mangaige hamyu gi Senate? Haye tumagu` hamyu rumepresenta Saipan `nai uttimoña dañkulu na traision yan dañu kontra mismu tautau miyu?

Kasi mabatga siha na mauleg bidan niha lau ti marepara na petmanente manadañu i industrian casino giya Tinian. Mauleg i petmanente na dañu in` afuetsas kontra futturon tautau Tinian? Estague` si Kiku` yan Jude na mañan senadores!

Dispues mafa` tampen sinetnan interes man-ritirau. Ke lau guaha inna`e los probes hatsadan Cost of Living Allowance (COLA) pot sentaya` subida apmam na tiempu? Gi halum seru na ayudun sueddon man-ritirau na ti magahet na man-inaminasa kumahulu` gastun nesessidat siha?

Manu `nai in` pega kabesan miyu guine na asuntu? Inna` la`la` industrian casino Saipan mientras in` pinu mismu industria giya Tinian?

Tiempun Chata`an
Este i mamo`lu para `an tiempun chata`an mauleg na eksisiu para todus. Tat ti pumadesi tinetpe ni mona ni tatte `nai ni un` sientimus guaha gi monedan familia. Poresu na mauleg in` gef atan todu gastun familia ya in` limitte gi dichu presisu na asuntu.

Magahet na hagas petsonat na eksisiu muna` sahñge dididi` gi pottanmoneda-hu para `an hu fagcha`e presisu na asuntu. Guaha na esta sais mesis hu gu`ut soluke guaha presisu. Megaiña besis `nai hunana`lu gi asaguahu pot guiya mumaneneha fiñkas mame todu pot todu.

Pot finaposhu gi halum didog na sasalaguan pinepble mina` umeyagyu` muna`sahñge. Ni unu tumuñgu` haf` para ta totpe bes enkuandu. Tat tihu akude desde famaguonhu, mañeluhu yan kilisyanu ni numesessita assistimientu. Namagof na siñiente i un` estira kanaimu gi prohimumu.

Bira birada mafattu tatte gineftaumu maseha gi otru na hechuran regalu. Ayu na prohimu i hu ayuda mattu dispues yan manguaguan guihan ya ilegña, “Apprubecha saina sa` este ha` kinine`hu na biahe”. I otru fina` a`gun haya yan gulusina ginen gualo`ña. Sumen agradesiyun ya i prohimu ni un` ayuda gi oran nesessidatña ti u malefa. `An gai suette siempre un` hinassu.

Na geftau hau kontodu tinayuyotmu!

Iran Linau
Mauleg sa` chagu` yan Saipan i linau gi mapos na Sabalu. Gai minetgot, ennau i 7.7 gi mafanana`an Richter Scale, sisteman midision linau.

Kumu hihot halum gi tanu`, i 5.0 na linau esta ni unu siña tumohge. Debi un` hakude i satge sino hilu` tanu` para un` libre. Atan kau guaha fina` troñku gi oriya ya un` suhaye.

I mamakatña este na ira i ni unu siña prumedikta ñgai`an `nai para u saulag hit yan kuantu minetgotña. Huli`e sinisedin iya Alaska `nai poduñg trosun ais (niebe) ni umatisa mafanana`an mega tsunami. I mas dañosu na hinalum tasi sa` ti maribaha gigon ha danche i tanu`. Manu linekaña `nai mattu taiguihe `an humuyuñg.

Para mona ha danche hit lamegai na linau. I kuestion: Ñgai`an i dañkulu `nai para u prensa hit todus. Puede ti masusedi sa` dañkulu na destrosiu kontra hita.

Guinaiyan Saina
I saina ha dimemoria nesessidat kada patgon. Ayu na famaguoña i sumoda` ginefsagan niha ha po`lu gi un` banda. Haf` suetteña hana`na` para ayu na patgoña i ume`ensinahyau mantension pot pinepbleña.

Guaha i amku` `nai ha ayau-yu` sientu pesus. `Nai para u hanau un` cheluhu hana` fangu`ot dididi` para mantensioña. Ni unabes `nai hu kopbla. Ayu na disposisioña ginen un` saina ni sumen guaiya yan gumofli`e todu famaguoña. Sige mona guahu mismu umeksisia haf` bidan i amku` gi ti gumof muna` siña na patgon-hu. Sensian yine`ase`!

Inagofli`e
I popble na guma` sumen riku inagofli`e yan hihot yan fitme na dinaña`. Metgot sensian kooperasion gi todu pinetsige. Antes mas `nai anog este gi hinanau familia para i gualu`. Machogue chechu` niha antes de lemlem tautau. Dispues manhanau tatte gi gima` manmama` sena, tinayuyot yan deskansu.

Siñaha` popble trastes yan fiñkas, lau repara sa` mañgontentu yan magof gi haf` guinahan niha. Maseh un` latan satdinas ni makema yan biriñgenas sin hinegsa` lau todu umagradesi ya ni unu goñguñg. Mabenefisia haf` gaige gi lamasan sena. Este na ginefsaga mas dañkulu ke guinahan kosas tanu`. Man-eyag hit hinimidde gi dididi` na guinaha-ta sino taya`ta!

Tiempun Buruka
Hihihot ta`lu tiempun burukan politika. Esta matutuhon dinaña` otganisasion gi todu tres pattida: independente, democrats yan republicans. Guaha esta ha tutuhun mañgasas sa` hinalulula umesalau gi tubu.

I man-nuebu na tropa ti senmegai para umasañgan. I mangaige pa`gu gi offisina lamegai mas na dinage para umafatta ta`lu na biahe publikamiente.

Esta namanman i taya` bidan niha benefisiosu para i publiku. Lau manlistu che`chu` tai-mamahlau pot manma`hu man-ma`gas. Saña pitu na mañan politika ta fafana`. Finu` Magoo ti namanman sa` hagas mantai-mamahlau.

Haf` `ste na meskla yan estorian siete na manbachet. Ni unu lumi`e taimanu hechuran alefante lau kada unu gai estoria haf` pusturaña ennau na higante. Dios mihu!

Pot Diskuidu
Gi kada sakan na diskuidu ginen manma-elihe, tres años tatte maluñu` linala` publiku gi todu manera. Este na asuntu ni unu gi entre siha kumomprende kasi pot tinahuñg tinemtum yan sensian metgot na kabisiyu gi offisiun niha pa`gu.

Hagu ni manbobota mauleg un` komprende na taiguine masusesedi gi kada sakan na diskuidu ginen siha. Kada ratu mahatsa gastun niha ni mafa` sueddu.

Uttimoña man-masuesuddu $90,500 gi sakan kada unu. Kuantu un` gagana yan kau mana` saunau mahatsan sueddomu gi halum 20 años na tiempu? Estague` na kuestion mauleg in` faisen. Yahu humuñgog haf` na ineppe guaha pot este na asuntun linahyan.

Guaha siha asuntota ni manlalailai kulan mohon ti asuntu. Maletke pot gai minapot i ginagagau na satbasion. Lau ti man-manhula` para umasatba probleman publiku? I tautau man-namase` gi hilu` este na diskuidu. Fan egaga` umayeg mauleg haye para in` beta na biahe. Kritikat i tiempu mina` debi un` ebalua kabales todu kandidatu.