Sensian abundansia

Guaha `nai manmatompu` hit manatma na mañan hita ha` dinanche. Ta hala tatte konsiderasion gi prohimu-ta pot tailaye na sensian imbidia. Lastima sa` ta hasñgun plumanta sensian hipokritu gi gueku na tinayuyot yan misa gi semana. Ti umaya i tinayuyot yan mala`et na dinisehan korason-ta.

Taya` mas ma`ug ke mauleg na amesta yan prohimu-mu. Guaha siempre na un` fagcha`e sumen chatsaga ya i mas ti un` añgog-hu na tautau umefresi hau ayudu. Hombre, i tanu` ridondu pues haf` kumilulog huyuñg siempre u ta`lu tatte.

Poresu na mauleg tana` fan geftau hit sensian mauleg na amista piot gi prohimu-ta ni numessita ayudu. Mafattu tatte mas dañkulu na premiu para hita!

Destrosiun Hinemlu`
I usun mama` desde antigu na tiempu establisau kumu patte gi kustumbren tanu`. I kanastran mama` ma-offesi i bisita `an mattu bumiahe pot nesessidat. Kulan tane` para tutuhon konbetsasion estake ha sañgan haf` sessu finatoña.

Tomtum na usu i mama`. Nina` batbaru i bisita sumañgan dibuenamente haf` finattoña. Dispues `nai sige mona i konbetsasion `nai maho`yi pat mañega haf` finaiseseña. Estague` kinemprendeghu usun mama` antes.

Pa`gu, kontodu manhoben na famaguon umu`usa diariu. Tafa` banidosuta `an mafuyut i chipa gi entalu` pugua` mañaña`. Taya` inadahe haf` mohon para u padesi i prohimu `an sige mona. Klaru pa`gu na usun pugua` na`kanset! Adahe famaguon miyu piot gi usun chupa yan pugua`.

Huli`e giya Hawaii yan Filipinas mana` suhan kihadas tres tautau-ta pot kanset ginen mama`. Unu matai dispues pot inaditi esta ni kanset. Mas obra chenot kanset desde halum pachut halum esta guetgueru, estomagu, yan otru siha patte gi sanhalom-ta `nai unna daña` pugua`, amaska sino chupa yan afuk.

Libianu lokue` ha atisa chenot korason, daibites, higadu, yan otru siha chenot ni sentita suponi ginen bisiun mama`. Maulegña in` chagu`e ke in` chansa manmamadesi pot diskuidu.

Benefisiun Mañgu`
Lamegai estudiu tinaitaihu pot usun mañgu` (turmeric). Un` hali` tinanum ni ma-u`usa para amut pot mas ke dos mit años gi mandañkulu siha na nasion.

Benefisioña gaige na mauleg para mansuhetan pokpuk gi sanhalum tautau ni tumututuhun dineku` chenot siha ni mafanana`an “inflammation”. Este i pekpuk umatitisa todu klasen chenot gi tatautau-ta. I mañgu` rimibabaha maseha haf` na pokpuk.

Ayu na kosas i mafanana`an plaque ni umestototba gigat korason yan titanos-ta adumididi` nina` fañuha ni mañgu`. Mas homlu` korasonmu yan titanosmu gi karera mona. Kasi ti un` nina`ye chenot hamalefa. Abundansia este na hali` enteru iya Marianas. Chage umusa diariu.

Kuantu na mañgu` para unna` setbi? Nasetbi kalulotmu apunteria. Estague` na mineduñg mauleg. Nagasgas, dispues yute` halum gi blender yan fina` gimen tat kumu juice pat Seven Up. Gigun un` bati, pega dispues gi basu ya un` gimen. Chogue este diariu.

Pot Chaleg
Sige dibate haf` taimanu para tana` anaku` ha`anita. Puru pot haf mauleg na boka yan gimen kontodu eksisiu gi semana. Mauleg!

Lau tatnai hu guiefe la`la` mas ke 70 años. Esta hu chogue checho-hu. Nahuñg! Haf` baliña para bai gacha` ochenta años `nai ni kemun tihu tuñgu` manu `nai gaige? Pot fabot bai aksepta uttimu disposision antes de bai nina`ye fafat-ta. Dios mihu!

Haf` baliña la`la` esta sientus años `nai ni na`an-mu ti un` tuñgu` sino ni para un` kahulu` ti siña? Gai binali `an brarabu ha` fuetsa-mu. `An maliñgu, maulegña lokue` un` diñgu i lugat! Tatnai sisida ni lalu` ti siña un` sugun gi guieñg-mu!

Bisita I Man-Amku`
`Nai hu bisita un` tihuhu, estaba i amku` gi kelat babue munana` chochu. Ha falague lokue` pinegsaiña manog antes de minachum atdau.

Dispues matachoñg gi papa` troñkun mañga dumeskansan ñaihon. Magof pot finatog-hu ya sige chumaleg `nai sige mona konbetsasion mame.

Esta pot mas ke dies años desde ke diniñgu ni difunta asaguaña. Asolas mabesisita ni famaguoña. Mampos nina` mamagof `an mangaige nietus yan nietas gi oriyaña. “Siha i flores hatdin korasonhu”. Ha agradesi i sentimentun patgon ni tai malisia. “Tunas todu finu` niha”.

`An kulan mampus tristi, huna paseha un` ratu gi señgsoñg dispues hu fahani sitbesa para bai pañgun tatte i hagas mahatma na kustumbreña. Gigon sinaulag ni gimeña seguru na ha lapblayu` amanu i siña. Antes de bai`n adiñgu ayu sessu fino`ña, “Cha`mu malelefa ni prohimu-mu”. Kulan i finu`

Hekkua` Maria!
Dispues de felisitasion mauleg na amesta, sige ham dispues yan un` retirau umachatge pot mampus diskalentau yan abarambau kinalamten i tanu`.

Ilegña, “Guaha 13 pot sientu ti manma-empleleha pa`gu. Malag manu i masasañgan na adelantun ekonomia?” Hekkua` Maria!

“Para u guaha SNAP guine. Tinatiye ni minimum wage pot para uma-asegura na megai u fan gatdun gi fache` pinepble. Este guinifen niha i sabiun hegsu` I Deni`?”, mamaisen i amighu. Hekkua` Maria!

“Taya` presisu na kosas mantension gi hospitat guine lau bula dispetdisiun salape` man-bakasion giya Luta yan Tinian yan enteru tautau niha cabinet”, ha apunta huyuñg. Hekkua` Maria!

“Kada hinigua` i tanu` te`ug na problema gumupu si Rafet para otru lugat pot para u letki i asuntun linahyan siha”. Hekkua` Maria!

“`An tafaisen i kandidatu siha mansustansiau na kuestion ni unu kapas inipeña lau manmalalagu ta`lu”. Hekkua` Maria!

“Food stamps yan minimum wage inepen niha i mansabiun hegsu` I Deni` kumu prefektu meskla `nai para u fan mafa` esklabu i tautau. Estague` uttimimu nina` siñan sessu maigu` na kabesan niha”. Hekkua` Maria!

Ti Kabales I Patte
Hu nañggan ñañaihon i nuebu na koru na u fañganta pot ti maresibi patten niha ginen kestat casino. Estague` piniligruña moneda ni ti mafachuchu`e. Piot ya ti mapatte i taicho`, añgoghu na mañganta dispues i pumalu gi koru, ke dehemunos de kompas!

I fafayin i taicho` siempre un` dia u masge` sin ditension `nai hokog para u patten ñaihon gi disipulun esklabu. Siempre u tutuhun mañganta na ti nahuñg patten niha. Sige mona, siha yan siha man-atrukus esta halum gi kotte yan presu!