Liñguahen Buente

I palabra solu sahyan ekspressiun tautau gi haf` hinassoña. Ginen fino`ña `nai anok haf` intension yan sentimentoña. Mauleg in` gef adahe usun palabra.

Mauleg ta abirigua haf` gaige gi palabra-ta gi hilu` akomparasion yan finu` Eñglis. I finu` Chamorro hasan palabra ni klaru dumeskribe haf` i mansañgan. Kulan mohon komprendiyun sin masañgan seriosamienti hafa i dichu intension.

Megai besis `nai manma-udai hit gi hilu` “buente, kasi sino fana`an”. Ta ekspepekta na sin klaru na palabra siempre umakomprendi. Kulan akseptable i finu` buente.

I palabramu libianu umanog siempre gi haf` dispues mañamu ginen usun palabras.

Este na maña gi liñguahe muna` anog haf` na sessu lokue` ta letki asuntota `nai gi uttimu besis taya` sattun na satbasion.

Hana` hassuyu` finu` biblia `nai ilegña si Jesukristu na yangin para un` sañgan “ahe” sino “huñgan”, pues sañgan frañkamienti sin ditension. Cha`mu chachansa muna` ke mestisu fino`mu sa` gigon gatdun hau guennau, pues entre “buente, kasi yan fana`an” `nai lumailai hau.

I finu` Eñglis kabales palabraña gi madeskriben maseha hafa na asuntu sino attikulu. Mampus i finu` Chamorro popble guine na patte piot gi finu` Españot “verbo” (verb). Memegaiña ekspressiun sentimentun inekstenden siñiente ke amtau sino prefektu palabra. Pot ihemplu: `An matai esta i tautau, pues matai. I Chamorro ilegña “sen matai”. Dios mihu na matdision.

Mauleg ta tutuhun frañkamienti usun dichu palabra gi hilu` klaru na modun konbetsasion. Sañgan gi klaru yan kabales na manera haf` hinasomu! Entre ennau sino todu dia hit man-afana`an!

Liñguahe: Guaha na mañeluta man-kabron umatbansa palabra ni ti patte gi finu` Chamorro. Nanalau, kulan mohon dinanchi ya mana` paha usuña.

Dos palabra kumetomba-yu`: mamarientes yan mamarehu. Sin ditension hu dispacha kumu finu` naufragu! Kumeke ileghu tiha tuñgu` liñguahiña ya ume`esuette!

Tai intension-yu` fuma`ichanag i los probes gi finu` niha. Fahagot-yu` guine na puntu piot sa` megai ti tumuñgu` usun hila` nanan niha. Tana`e felis na diniseha i chumochoneg manala`la` usun liñguahe yan kutturan tanu`. Mauleg na pinetsige lau na` seguru na mandinanchi.

Lau muñga pot fabot mahasñgun finabrikan kuttura piot ya hinekan ginen guinifimu! Chatmiyu muna` mamapot i ti mapot! Atan ya in` atetuye haf` iyo-ta ni natibu! Ayu siempre `nai guaha inaya sa` kulan “mamarientes hit!”

Chenchuli`: Dos klasen chenchuli` guaha: nina`e kumu regalu yan ika. Mauleg para i manhoben maketuñgu` i difirensia. I mefe`na nina`en namagof na okasion tat kumu gupot. I segundu (ika) chenchule` `an guaha dimalas gi familia. Kustumbre na i segundu manana`lu yangin i prohimu gai achaki.

Este i tatatte umaminasa-yu` piot sa` mediu gi mañeluhu mangaige America. Hu repapasa listan nina`en ika para baina` seguru na innana`lu ayu na fabot. I kumomprendi este na kustumbre guaha `nai ginacha` siempre debi u fanlagnus enkuenta de familiaña. Dios mihu! Guaha `nai hana` chachatfinu`yu` `an kumilulog huyuñg pagamientun social security. Ni unu gaige!

Edukau: He ekuñgog grupun estudiante gi NMC `nai sige madiskuti un` attikulu. Kada unu` mauleg kontribusioña gi madiskuti na asuntun siha. Todu i masañgan mau`udai gi hilu` kabales na faktu ginen lepblun niha yan anchu na diniskute yan maestron niha. Esta namagof ma-ekuñgog sa` hilu` edukau na konbetsasion `nai man-a`adiñgan.

Mesklau na opiñion guaha gi asuntun ya kada unu ha sañgan dibuenamenti haf` hinassoña. Maseha todu atmos banda gumu`ot posisioña ni unu man-emug pot parehu hilu` edukau na eskalera ni sige mabati haf` sineda` kada banda. Dispues, man-adiñgu `nai kada unu pas yan felis gi hinanauña. Namagof!

Guaha unu na sumen kalagtus mandagau rason ya todu atmos banda siña ha lapbla sin umadispacha puntoña. Ha admiti dispues na i dinanche gaige guine osino guihe na banda. I eskaleran inadiñgan sumen namagof ya mauleg i membron lehislatura siha u fan eyag ñaihon “edukau” na dineskuten asuntun linahyan siha! Don’t ashame!

Achibau: Manhuyuñg kañgiluñg imperadot hegsu` I Deni`. Era mahatsa sueddun niha sumen guaguan ke haf` magagana pa`gu. Manmalefa na lamayot patte gi enteru empleau iya Marianas i mas numesessita ayudun hatsadan sueddu.

Atan sueddun man-maestro, infetmera, empleau praibet, yan empleau civil service sa` pot mas ke dies años desde ke manmaletki i los prohimus subida. Manmatrata este siha na empleau kulan mohon `anyuti` basula gi kantun chalan.

Yangin mohon guaha amtau yan sattun na inestudiu siempre mañeha ya ileg niha maila` ta nañga estake nahuñg para todus! Kumeke ileghu ha benefisia ayu na lai nesessidat mayotmiente. Lau i betsan niha finenina ma-usuni pot chechu` achibau!

Mauleg sa` paire ha`anen niha na Noche Buena mientras ta tutufuñg sientimus gi monedan familia kau nahuñg para fahan totchi. Dios mihu na che`chu` kabron. Lamayot patte isauta ni botadot sa` sige ha` pega halum lau mandañosu kontra hita. Haf` mohon? Kulan tapbla che`chu` achibau na biahe, no?

Sinetsut: Yangin sumasaunau hau umesalau pot lache na disposision lehislatura, ekahat muna` a`gañg sa` hagu mina` taiguine i asuntu sin ditension. I botumu gi pa`gu monhahayan na eleksion kumonfitma na konfotme hau ni disision niha.

Lastima i nahuñg tiempu para in` atan haf` masusesedi gi hilu` batko-ta. Mas kasi nina` fan lastima hamyu pa`gu `nai ni mona ni tatte sa` esta ha katsague` hinanau sahyan-ta. Siña ha` fumofofu hau, lau hagu solu siña un` sogne pot lache disision-mu na biahe! Puede ti ta repite mismu chinatsaga gi ge` fena.

Siso` Amaka: Sige amiguhu Magoo ha chukangue` gi siso` gi tatten kusina. Kontentu!

Katma yan chatgun na oga`an. Sige hu akanteha haf` na no siakassu na biahe.

Era guaha numa`e dosi latan Lite ni hana` maneneñgheñg para i lataloa`ne.

Dispues ha menti pot silensiun i tanu` lau tiempun Noche Buena.

Hu atotga na buente pot chinatsaga na taiguihe mañan man-tautau-ta.

“Lau ilegniha na guaha adelantun ekonomia!” ha apunta huyuñg.

Hu tagam na taigue ayu na adelantu gi monedan familia. Kasi siha ha` man-apatte ni chada` oru mientras mayotmente umusuni i mutuñg gueru!

“Lastima i inañgoghun tautau-ta gi finattun Noche Buena”.