Tradision Tanu`

Respetu iya hululu` na finana`guen mañaina-ta ni matutuhun ginen halum guma`. Estague` `nai umeyag i patgon rumespetan maisague`. Ginen este na ginaguat `nai ha ekstende gi otru prohimuña.

Ginen ineyag respetu na ma-establese inafamauleg yan bisinu siha. Adumididi` man-arikohe gi fina` cho`chu` komunida. Mañaunau famaguonta gi preparasion gupot patron i señgsoñg. Motmut respetu gi entalu` todu.

I man-amku` matuñgu` haye siha famaguon bisinu ya mañau man-mamulan gi finapos ha`ane. Hasan guihe na tiempu babarias gi señgsoñg siha.

I sensian kooperasion naturat gi entalu` natibu. Desde ayudun ma-ekstenden guma pat mahatsan fandañgeru antes mangaige i bisinu para u fan man-ayuda. Achog che`chu` peska tat kumu gigao, tekin yan chenchulu mañaunau i membron komunida. Piot ya humalum i sagun atulai yan otru siha guihan. Mana` fan mañage i bisinu siha. Lastima sa` maliñgu este na kustumbreta.

Sensian ayudu gi hechuran inana`e gi entalu familia yan bisinu oppan gi halum tautau-ta. Ni unu sumeha gi bandan ayudu piot para i namase` ni numesessita ausiliu. Mafattu ennau na ayudu ginen korason niha! Metgot na pisun kuttura i respetu, kooperasion, inagofli`e yan ina`ayuda.

Gi rimulinun che`chu` linahyan `nai anog famaguon-ta siha ni man-mahayu fitme ni mañainan niha. Todu tumuñgu haf` para umachogue ya man-halum sin ditension yan ayudun niha kanai ya nina`e.

Tinaitai E`salau: Huli`e gi programan KUAM the “Gud Life” serimoñas despedidan galaide ginen Guahan. Ilegniha “sakman” lau galaide` i mafatinas. I karera para Saipan dispues ma-esgaihon halum ni Coast Guard sa` estaba chagu` gi lagun Tinian. Ma-usune halum ni tropa.

Kulan kahulu` kalenturan mamatinas galaide`. Mas kalentura `nai duru tinayuyot e`salau na u felis i biahen i kapitan yan tropa. Estaya guaha tinayuyot galaide` gi fina` e`salau ni tinicha ni pale` karisun modetnu.

Sopas! Manu gi estorian Chamorro `nai gaige este na tinayuyot e`salau? Na ti man-mapega kalaberan mañaina-ta gi halum apusientu kumu respetun konsagrada? Anog na man-naufragu i chumochoneg mandage na kuttura! Dispues, hagas tai relihion i man-antigu na Chamorro. Ñgai`an `nai kumilisyanu i natibu?

Nachatsaga i kumahulu` numerun man-ma-abusa na asagua yan famaguon guine gi alacha. Hu akanteha pot para bai`li`e manu `nai gaige hahale`ña i problema.

Gaige lamayot patte gi maneskada, usun amot binenu yan kara` monedan familia pot hokog gi huegun poker. Este na chinatsaga umetablese mafanana`an “broken home” `. I mañaina madiskuida sihani obligasion niha gi famaguon.

Makat este na diskuidu gi patgon yan komunida. Uttimoña man-hanau este siha na famaguon ma-atetuye ti mañgombeni siha na cho`chu` kontodu destrosiun propiadat bisinu. Man-namase` sa` ni unu gaige gi tatten niha diariu.

I para u fan mapresu este siha na famaguon ti u baba kinemprenden niha haf` masusedi sa` ni siha ti matuñgu` haf` bidan niha. Mauleg u fan mahala halum mañainan niha ya siha u ineppi haf` na appenas guaguat (discipline) gi este siha na man-hoben.

Ayu mas man-namase` i ni nana ni tata ni man-mayute gi kaprechun niha. Estague` na mañaina mauleg u fan mabatsala halum gi kotte ya u fan mahusga kau pinilakes galagitu famaguon niha. Na ti man-tautau famaguon miyu?

Setbiente: Yangin mañiñila` guafen sinsiyu na diniseha mañetbe publiku pues guiya este tutuhun pinesan appottunidat yan kampu gi pinetsigen este na offisiu.

Debi i manguiguife u mehnalum yan tomtum gi inebaluan haf` sustansiau na asuntun linahyan siha. Yangin taigue este giya hagu pues kase maulegña un` upus i asuntu ke unna` bulachun maisa hau sin presisu.

Taya` planuhu fuma`ichanak haye na kandidatu ni huli`e listu para puestun publiku soluke aksioña dispues ni mampus achagu` yan interes i tautau siha. Siempre un` huñgug i idu kumuentos!

Lemai: Malofan-yu` entalu` Lali Fo` yan chalan As Lito` `nai huli`e manadan troñkun lemai ni esta pa`gu manatachu. Desde pinatgohu ayu siha na troñku!

Kase in` hassu na guiya este na troñku satbasion megai na familia guine gi hinanau i Navy gi 1961. Adahe na lemai tinife` mame gi troñku bisinu. Kulan mohon troñkun mame hombre guaha `nai in` lalade i dueñu.

Bokan popble ayu na `agun tanu` piot `nai hokog pugas. Entre ta saibog, tunu sino sotne. `An mapega gi lamasan sena cha`mu mamatman. Chule` pattemu sa` taya` otru putahe para umaplanta dispues de ayu.

I lemai usun kada tanu` gi halum todu iya Pasifiku. Guaha `nos kuantos klase desde regulat esta i mahlus. Kada mañogcha` kase 150-200 na lemai ha lalagnos. Paire matunu dispues mafoyon ya matotche yan fina` mantika pat mantikiya.

Bai` fan espiha dispues para saiboghu pot kulan hu tatañga lumunu` ta`lu ayu na `agun i muna` fan libre ham antes.

•••

I minaipen i tanu` dididi` figan. Para i man-malañgu yan man-amku` suhaye este na figan pot hinemlu` miyu. Un` siente ha` este gi taftaf oga`an gigon un` baba i petta. Puede u la fresku gi karera mona.