Previous Story
Maribahan Sueddo
|
Posted on Dec 03 1998
Si Governor Tenorio ilegña pago na semana na para u alie` yan i lehislatura pot para u propone maribahan i mas manguaguan na sueddo siha gi gobietno.
Este na proposito layeye pot para u siña i gobietno muna` sahñge dididi` fondu para gaston setbision publiko pot mampos dañkulo maribahaña i rinikohen kontribusion tax pago na sakan.
Guaha, poko mas o`menos, $32 miyon maribahaña i rinikohen kontribusion tax para pago na fiskat sakan. Dañkulo pudoñgña este na kontribusion i hagas ta gogosa antes de hinalom didog na sagon ekonomia ginen iya Japon yan Asia.
I primera inaminasa nu este na chinatsaga i industrian turista. Pot este na rason na guaha 1,180 na bisnis siha ni sumupopotta i industrian turista humuchom bisnis niha deste Juñio gi mapos na sakan. Estague` na rason na mampos kasko i kahan Marianas.
Para estake unalo tatte i hinemlo` ekonomian Marianas, siempre tinaka` tiempo, kase 10 años. Ni achog ha` unalo tatte i ekonomian Japon yan Asia, añgogho na finenina man-na`sahñge i Japones pot para u nanalo tatte i hagas hana` sahñge para uson familia `an ginacha` mattiempo. Estake monhayan ha petsige kumomple este na pasu `nai guaha dididi` kampo para u fan manhasso bakasion.
Mauleg na pasu i ha petsisige si Governor Tenorio sa` trabiha i ta fafana` na chinatsaga ti mafatto a`adetña. Otro sakan mas `nai ta siente didog este na chinatsaga. Lao gi todo este siha na plano, maulegña dididi` ke taya` para mantension familia. Gi uttimo besis, todos debi u fañanao guine na sakrifisio.
Estake u diñgo hit este na chinatsaga, mauleg todo sientimos unna` sahñge pago sa` siempre u fatto i haane `nai un` nesessita ennao na sinsiyo siha. Makat i ta fafana` ayo mina` mauleg lokue` ta ayuda si Governor Tenorio gi animuña muna` sahñge dididi` kosake siña ta ataha i mamamaila yan ti tuñguon` na chinatsaga. Si Yuus Maase` yan ghilisow!
