Previous Story
Fañaonao gumuaddia finkasta
|
Posted on Dec 15 1998
Para todo i mattiro ni tafafana`, i sesso ta guife gi haanen gupot siha taimano antes, ti u pareho na biahen haanen gupot. Gi matan i taotao siha ta lilie` mañge` na chaleg, lao gi tatten ennao na fasu, uma`atog un` didog na chathinasso pot hafa mamamaila`.
Primera kuestion i kao magahet i mansañgan pot siña ha` taya` pagamienton empleao gobietno? Para i manbibisnis, kao guaha maseha dididi` na ausilio ginen i gobietno pot para u fan siña sumuñgon i presente siha na chinatsaga ni finañagon i sagon baba na ekonomia ginen Japon yan Asia?
Yangin pago na mes ha nesessita i pagamienton empleao gobietno $18 miyon pesos
ya ennao i $15 miyon ha` marikohe, buente siña fatso dididi` i para umana` fan pagamiento kabales i empleao siha. Rason? Guaha lokue` i gobietno obligasionña siha na debi u apase.
Gi hilo` este na chinatsaga, i mapropopone na programan maribahan gaston sisteman eskuelan publiko ti sen fino hinanaoña sa` memegaiña gi manmaestro ti fumabot maribahan sueddon niha 10 pot siento. I otro didog problema i manana`lon ininkatgan amot siha ni kompanian amot giya America ni ginen hospitatta guine. Sin apas, taya` amot osino trastes akseptao gi este na kompania.
Mampos sumen nachatsaga este na asunton gi dos mas impottante na depattamenton
gobietnon Marianas. Kumeke ilegña na yangin taya` adelanto gi rinikohen kontribusion tax, pues siña ta supone na lotgun i edukasion famaguonta osino taya` amot yan trastes para i manmalañgo siha otro sakan. I hagas tafa` bisio na siempre i gobietno ha satba todos chinatsagata esta tai kampo gi papa` i presente na kondision ekonomia. Yangin sumaonao hao manadahe, pues siempre libiano dididi` i chinatsaga ni tafafana`. Lao yangin ni hago mismo ti malago hao sumaonao guine na kinalamten, pues asegurao na kontodo hago un` famadese.
Na setbe i mauleg na sensian kooperasion gi halom chinatsaga, un` metgot na tradision natibo ni sumustene hit pot hinerasion. Si Yuus Maase` yan ghilisow!
