Dañosu na keha kontra Marianas

Guaha un` kompanian lai (law firm) para una` halom keha kontra i industrian garment guine pot asunto siha ni esta ta tutuhon umaregla tat komo direchon empleao ni manmachochochu` gi fakteria siha guine.

Ti na`matman yangin este na keha chinecheneg gi santatte nu i Offisinan Insular Affairs ni kinabesasaye as Señor Allen Stayman gi Depattamenton Interior. Esta i inetnon garment guine para u tutuhon pumulan maisague` in` koneksion yan ahensian federat siha, lao sige ha` ma`akanteha i para umasen puno` este na industrian garment.

Este na keha klaro na taigue proteksion linala` taotao Marianas. I asunto siha hagas attikulo ni sesso maina pareho ha` guine yan giya Washington. Dañkulo na animo manmaimplementa pot para uma`ataha probleman empleao pot direcho. Ti mahñao manma`aregla este siha na problema. I punto: Este i maplaneneha na keha layeye pot para u fan ma-espanta i kometsiante siha ni fumafahan produkton magago ginen industrian garment guine.

Este na espanto siña ha` enfin ha bira este siha na kometsiante guato gi otro industrian garment giya Asia. Los uttimo, matai i industrian garment guine ya mas menos siempre rinikohen kontribusion tax para i nesessidatta. Lamegai lokue` na bisnis u fan pinino`, kontodo i bisnis batko (shipping) ni sumede disente na presion ma-impottan nesessidat mage giya Marianas. Esta ha` poduñg i primera industria guine, era i turista. Yangin para u mapuno` i industrian garment, pues siempre gi katkuet manera megai para u fan mamadese pot bandan chochu` yan chatsaga na linala` familia.

Buente ti lache yangin ta soyu` i taotaota na u fanacho pot haanen familian niha gi asunto ni sumustetene pago i ekonomian Marianas. Uno ha` para u fama` keble gi este na keha–i kompanian lai ni pumetsisige kumeyamag i industrian garment guine. Hita para u pinadese i mamakatña sa` kontodo pottamonedan gobietno siempre inaminasa seriosamente.

I dadalagña este na keha i mas dañosu sa` yangin u basnag i industrian garment guine `nai trabiha taya` para tahgueña, todos siempre u fan mamadese sa` i Depattamenton Interior mas ha` gaige interesña gi proteksion i textile labor union ke interes linala` natibon este siha na islas. Mauleg lokue` ta talon bumisita i kontratan i
Covenant sa` mientras ke gaige Marianas gi papa` meserikotdias Congresson America, kada rato ha` siempre machoneg pot para umana` matompo` sin presiso. Hahasso este gi duranten mirienda. Si Yuus Maase` yan ghilisow!