Agradesimiento para si Congressman Young

Si pindeho Stayman ha usa i asunto ya hana` daña yan i mafananaan` “human rights” na attikulo pot un` rason: ensegidas i gaseta yan television siha ha hoka i ripot ya ha usa dibuenamente sin u fan huyoñg mage Marianas para siha u husga mismo hafa mantuge`. Ha danche si pindeho tataga`ña lao gi karera ha yamag todo lokue` i hagas mauleg na reputasion Marianas. Kao justisia este na checho` un` offisiat federat?

`Nai matto si Congressman Young, ha soda` na i ahensian federat siha guine mañasaonao man-imbelikero manmanlagnos areglo `nai solu obligasion niha i para u enfuetsa lai federat siha pot hutnaleros yan otro siha na areglo. Estague` i primera besis na mas mayamag relasionta yan gobietnon federat. Manlinaladde pot motibo na ni uno gai atoridat mamatinas areglo sa este na responsablidat gaige gi Congresson Estados Unidos de America.

Dispues de ha birague` tatte si Congressman Young, guaha mas mangachoñgña sige ha laime mas iya Marianas gi hilo` tai sustansia siha na eskuso. Man-sinañgane na ni uno gi entre siha dumalalaggue` mage Marianas `nai manbesita guine gi alacha. Dimas mohon de sige u chalegua` sekos niha, u ketuñgo` kabales hafa i mansañgan kontra i fakto na kondision guine sa` ti justisia para i natibon Marianas i sige ha` i tailaye na intension para umayamag i paska na ekonomian isla.

Ha apunta lokue` huyoñg si Congressman Young na lache na chochu` i ha petsisige si pindeho Stayman `nai para u amot Marianas ni salapeña pot para u kubre nesesidat iya Guam `nai i prinsipion i asunto pareho ha`. Estague` na punto `nai mas klaro hafa intensioña si pindeho Stayman kontra taotao este siha na islas. Aplacha` yan tailaye na heñion taotao kontra taotao Marianas.

Afañielos, gaige lokue` gi hilo` i kontratan i Covenant na debi u assiste si pindeho umadelanta i kualidat linala` natibo guine. Lao mas ha` si pindeho Stayman i para una` fan dimo hit gi hilo` didog na pineble yan chinatsaga. Estague` klaro intensioña este na delegadon ginen lago. Lao uno konsueluho: todo baba na fina` chochu` kontra i prohimumo siempre un` hinegse un` dia `nai esta atrasao. Para i daño yan destrosio ni ha pega kontra natibon Marianas, ta diseseha na yangin u fatto ayo na haane tana` fan ma`agim korasonta sa` i Nanalibreta u fatto siempre disposisioña.

Muñga hit manmanguot` mahetog sa` dipotsihe este na asunto ma-intended para talie` lokue` amano `nai mangaige hit yan para ta hasuye hafa mas mauleg para futuron famaguonta. Tananae` si Congressman Young onru yan agradesimiento pot ha komprende i chinatsagata gi hilo` un` poble na ekonomian isla. Si Yuus Maase` Señor yan kontodo i fiet na atuñgo`ta as Congressman Tom DeLay.

Strictly a personal view. John S. DelRosario Jr. is publisher of Saipan Tribune