Propositon Casino Gambling para Luta

Komprendiyon i ansia yan animo na sentimiento gi entalo` man-ma`gas iya Luta gi mapropopone na industrian casino gambling para i komunidan niha. Layeye este na proposito mau`udai gi hilo` un` nesessidat: para umapañgon i mampos paosa na aktibidat ekonomia kosake u guaha mas fiñkas para uson setbision publiko.

Likido na sentimiento i guaha pumupulan fiet haf` taimano `nai siña mana` kalamten i makenarian ekonomia kosake u guaha mas chochu` yan fondun publiko para uson nesessidat taotao Luta. Mas i nesessidat iya Luta didog piot pago na tiempo `nai poduñg i ekonomian Japon yan Asia `nai entero Marianas mamadese ginen este na chinatsaga.

Lao antes de u guaha chago na pasu machule` para ma-establesen este na industria giya Luta, mauleg u guaha antao na inina gi kinalamten iya Tinian komo espehos pot casino gambling. Huñgan siña ta sañgan gi hilo` opiñion, sin kabales na inestudia, na siña mas mauleg operasion industrian casino giya Luta ke iya Tinian. Lao hafa difirensiaña i prinsipio guine na dibate?

Pareho ha` Luta yan Tinian mangaige gi hiyoñg sentron bisnis guine giya Marianas. Luta buente gai bintaha mas yangin i maplanunuye na industria gaige i para u kone` halom ginen Guam gi kada uttimon semana. Lao kao este na metkao suffisiente para u famatinas ganansia gi karera mona? Kao todo i otro bandan este na industria (checho` kriminat) bali gi kualidat linala` natibo `nai i memegaiña gi ganansia humanao guato gi mandueño siha ya i seblan peñgpoñg para i taotao tano`?

Dispues, mauleg lokue` uma`ina i futuron este na plano gi hilo` presente siha na kompitensia gi bisino tat komo Macau yan iya Filipinas. Taya` dinida na iya Macau i sentron casino guine giya Asia yan Pasifiko. Todo klasen tane` guaha ni mapot tana` posible guine, kao Tinian pat Luta. Guine lokue` gi alacha, sige man-apuno` i manma`gas mafia guihe pot haye para u manda kinalamten iya Macau gi bandan ganansian i industrian casino.

Gi mismo tiempo guaha diaro na batkon aire ginen Japon para iya Las Vegas para todo dumiseha mangando huegon chansa osino bakasion familia. Mas ma-ayeg siempre kareran para Las Vegas sa` fuera ke siempre malie` iya America, todo klasen fasilidat yan tane` guaha pareho ha` para indibiyuat osino familia. Las Vegas manhahatsa pago dos fasilidat `nai siña maseha haye na bisita u ekspiriensia siñienten Urupeo yan fina` Isla giya Pasifiko sin u fan hanao guato. Haf` taimano mankompitensia hit yan sentron huegon chansa gi entero i tano`?

Guaha siha ripot manmalagnos pot destrosion familia ni gumulusune mangando ya ha lachai fiñkas niha gi uttimo besis. Este na estao gi chat-uson pottamonedan familia mampos na`mañao sa` kontodo i haanen niha ha chule` pot esta ni mona yan tatte. I mandueñon casino ha chopchup esta i fondu i guinahan mamoble ya hana` bula buchiña mientras i ma-esague maudai gi bus ya sige ha konsidera i ha destrosian maisa i linala` familiaña. Guaha ripot nu este humuyoñg guine gi alacha ginen iya California.

Ti hu kokontra osino fabobot i ma-establesen este na industria giya Luta. Lao hu apupunta huyoñg fakto siha sa` gai interesyo` lumie` lokue` na i pas yan likido na Islan Luta hana` guaha kabales na estudio pot bintaha yan disbintaha pot este na industria. Maseha u ma`lag i kandet siha gi señgsoñg iya Luta, hu diseseha mohon na antes de u homhum i tano` natibo na guaha antao na konsiderasion gi mapropopone na asunton linahyan. Naturat na u guaha chaochao na dibate sa` i asunto mampos komplikao yan teug`. Atetuye kao para in` dagao ñaihon osino guot` tatte i trañkilo yan pas na balahan linala` miyo pago. Gaige este gi dos patman kanai miyo. Si Yuus Maase`!

Strictly a personal view. John S. DelRosario Jr. is publisher of Saipan Tribune