Pisun natibo, tase yan tano`

I gotpe na kinalamten adelanto guine, piot gi uttimon ochenta siha na sakan, mampos metgot hinalomña `nai esta ta disattiende i kualidat linala` natibo guine siha na islas. Guiya este na patte gi estorian Marianas i tiempon abundansia `nai lamegai na taotaota manbenefisia ginen atkilon tano` familia siha. Ti todo manpinalalae`, lao enfin matto ennao na suette. Para todo i buruka, esta na`tañga na tiempo silension ennao na sakudida.

Gi todo ayo na buruka ni uttimoña mampos silensio kulan katman mañglo `nai mamamaila` un` dañkulo na pagyo, ha balutan hit un` maipe na aire piot sa` noblado i uttimon inatanta gi puntan tase gi sanlago. Man-ma`ya` hit gi tano` matman pareho yan finagpo` un` ira ni fumatoigue gi mafoñg maigo`ta.

Este na ira gaige gi hechuran kuestion ginen man-menhalom na natibo: para haye i adelanto ni ta sede guine gi tiempon abundansia? Yangin para i natibo, kuanto giya hita man-patte gi este siha na adelanto gi industria siha ni man-gaige guine pago? Hafa pattisipasion natibo fuera de benefision tax, chochu` yan atkilon tano` niha?

Gi halom este na adelanto, ta sotta i tasen laguna para uson chalan bote siha ni kumokone` turista guato giya Managaha. Gi mismo tiempo, ha estotba yan destrosia i sagan fañaan` guihan entalo` Susupe yan Garapan. Guiya este siha na lugat `nai man-pepeska i natibo pareho ha` para sentadan familia osino fiesta yan ayudon para fina` matai.

Hu nanae` i amiguho Congressman Heinz Hofschneider un` dañkulo na saludo sa` guiya pumetsige un` estudio pot presetbasion guihan gi halom lagunan Saipan. Ha sodda` na megai na kuraliñg–sagan fañuchuyan yan fañadaan` guihan–mandestosiao ginen aktibidat turista ni humoka este siha na kuraliñg pot para u-malitrato. Tinaka` esta
50 años na tiempo estake para u dañkulo tatte ayo na kuraliñg.

Ta diseseha na gi uttimo besis osino antes de finagpo` pago na sakan, u guaha mas fitme na arelgo pot tasen sanhalom guine. Yangin guaha proteksion gi naturat na lugat guihan siha, mas mauleg para i natibo sa` achogha` u poduñg osino muna`lo tatte i industrian turista, asigurao na chumocho guihan i Chamorro yan Carolinas.
****

I otro punto ni tineteka linala` natibo gaige gi atkilon tano` publiko para fangualuan` pareho ha` gi bandan hatdin yan pinegsai gaga`. Mampos tana` atlibes i asunton linala` natibo `nai ta tutuhon i kuentas pesu kontra i presente na areglo `nai i atkilon tano` publiko mapega gi hilo` rininueban kada sakan.

Este na arelgo ha choma` i lanchero siha plumanuye mas fitme na sisteman mananom sa` debi u muebague` gigon manae` notisia na u huyoñg ginen i tano` publiko ni ha okukkupa. Este na areglo ha yamag fitme na kinalamten fangualuan` lao gi mismo tiempo sige man-esalao hit na debi u guaha mas industria fuera ke turista yan magago.
Mampos atlibes yan gueko i ta sasañgan yan areglo ni gaige pago pot atkilon tano` publiko para fangualuan`. Debi este na asunto uma-aregla amano i siña na chinadeg.

Siña ha` ti man-mama`keble i lancherias siha, lao chatmiyo fan malelefa nu i benefision este na patte gi ma-adelantan agrikuttura guine tat komo dinaña familia `an Sabalo osino Dameñgo. I para ta puno` ha` un` manog osino babue yan guaka nahoñg para una` fan daña i familiata. Este na dinaña familia mas ha simiento i inatuñgo` yan inagoflie` gi entalo` kada uno. Ha establese mas fino na relasion gi entalo` todos `nai mafañago un` likido na inapinitiye gi entre hita. Estague` un` patte gi fina` fangualuan` ni sesso ta upos sa` mandaña i manmenhalom karisu ya sige ha fatta i pesu gi menan matata.

Para todo i mattiron tinilaika guine, seguruyo` na buente estague` un` koyentura `nai siña i natibo ha pega satton na areglo gi famaguon niha sa` ha sede hit mandaña maseha pot kaddon manog osino fritadan guaka yan babue. Este dididi` na`chaleg lao diberas na fitme na pisun tinituhon dinaña gi halom familia siha guine. Hahasso kao gai sustansia i debi uma`aregla atkilon tano` publiko para petmanente na adelanton fangualuan guine. Si Yuus Maase`!