Chathomlo` na ekonomian Marianas

Sesso ta huñgog gi halom konbetsasionta na chafleg mampos i ekonomian tano`ta. Inaminasa seriosamiento ni sagun poduñg ekonomian Asia yan Japon deste dos osino tres años malofan.

Mientras namagof sa` guaha adelanto gi malañgo na ekonoiman Japon, ti siña ta añgogho na enfin esta kabales homlu` ginen ayo na sagu i tumomba guine gi alacha. Kontodo i primera eksperiensiao yan edukao na ekonomista siha ni u-mebalua ekonomian Japon ti man-seguro na enfin esta sen-homlu`.

Pareho este na kondision yan hita mismo `nai pago ha diñgo hit i fette na sagu. Huñgan ta tutuhon sumoda` tatte fuetsata yan hinemlo`ta, lao ti gotpe sa` debi adumididi` ta kanue` propio na neñgkano` para ta chule` tatte i dipotsihe kabales estao-ta. Tinaka` tiempo estake siña mañgalamten hit dibuenamente sin chathinasso kao u pasmo talo sinaguta.

Pareho este na akomparasion yan i man-sañgan pot hinemlo` ekonomian Japon. Ti siña ta sogne i man-ma`gasta nu este na pinadese enteramente. Dispues, lamayot patte isaota sa` ti hayuta checho` otganisasion antao yan sano na plano piot gi bandan ekonomia. Mampos ta añgogho na ni ñgaian `nai u basnag hinemlo` industrian turista.
Lao anog dispues na kontodo i mas metgot na industria guine gaige na dumidimo gi hafa masusede giya Japon yan Asia.

I uttimo industria ni humalom mage Marianas masusede 16 años antes. Guiya este i industrian magago ni balin $1.2 biyon pesos fuetsaña guine gi tano`ta pago. Estegue` na industria sumustetene Marianas `nai poduñg i industrian turista deste tres años malofan. Para u nalo tatte i industrian turista taimano antes, gaige na mau`udai este na asunto gi hafa masusede Japon yan Asia.

Mientras tantos, debi u mas guaha satton na disposision salape` kontribusion todo man-fafachochu` sa` trabiha i hinemlo` ekonomian tano`ta chago yan i hagas pinayonta. Dispues, tinaka` tiempo (yangin enfin na homlu` tatte kabales ekonomian Japon) esta u fatto mage i napon benefisio giya Marianas. Pot este na rason na debi i disposision tax ni ta apapase halom kada pagamiento u guaha serioso yan satton na inadahe entalo` pago yan i uttimon i sakan.

Hu lilie` i daño ginen este na sago espesiatmente gi entalo` membron familia ni man-a`ayuda uno yan otro gi halom tasen este na mattiro. Esta na`pinite, lao un` asunto na todo u fan dinanche kulan mohon peste ni tatnai ta guife antes. Uno besis `nai siña ta kareraye este na mattiro i para hita mismo ta adahe i dididi` na ginanata sa` diberas makat na kontrario i ta fafana`. Muñga i dispetdisio ya guatdia mauleg todo sientimos gi halom pottamonedan familia.

Asunton sueddo gi ora

Sesso teñga mandibate hit pot sueddo gi ora. Kulan mohon irensiata ginen i mañainata ya taya` tananañga i para uma-implimenta ensegidas. Dinanche este na mañan natibo?

Dimas mohon de ta sige muna` palagpag sekosta, maulegña ta prekura edukasion natibo sa` tat mas felis na hinanao taotao ke ayo siha i sumakrifisia tiempon niha man-eskuela.

Tatnai hu huñgog un` magradua gi koleho umaguguat para uma`apase $3.05 gi ora. Rason? Este na asunto ti bumale sa` mauleg edukasionña ya i para u gana komo empleao dos, tres buettas ke mandaton lai pot sueddo gi ora.

Este i mafananaan` “minimum wage” ti na`banidosu sa` sueddon i nuebo na manutuhon ni tai edukasion ni mauleg. Estegue` tutuhonña `nai siña dispues umeyag mauleg na offisio. Lao gi todo kinalamten, megaiña na madiñgo yan maliñgo este na empleao sa` ti kapas edukasionña.

Pot este na rason na debi u guaha lokue` kabales na programan edukasion para ayo siha i mangaige guine na eskalera. Presiso na ta ayuda este siha na taotaota sa` para mona mas didog i kompetensian chochu` entalo`ta yan taotao hiyoñg. Si Yuus Maase`!