Mesklao yan teug` na eleksion

Yangin ta konsidera i kuatro na pattida deste democrats, republicans, reform yan independent gi pago na biahen eleksion, seguroyo` na mañgonfotme hamyo lokue` na mansosobla hit kandidato.

Yangin ta pega komo neñgkano`, pues pareho este yan un` bibu na fandañgo `nai todo klasen putahe guaha gi un` sumen anako` na lamasa. Dispues de man-nayan hao, boka` neñgkano` gi platumo ya esta ti un` tuñgo` amano `nai para un` tutuhon.

Gi kada klasen putahe, guaha ha` siempre dinanche matemplaña. Guaha ha` lokue` faet` osino tinahoñg na`yeña kao asiga, kechap, golai yan otro na`ye siha. Lao siempre un` suñgog fumana` sa` esta un` na`yan pattemo.

Masusesede i ta ayeg finenina hafa yata ke dehemunos kao chaot`ta. Tana` fona i ginagao hila`ta ke hafa mauleg na alimiento para i hinemlo`ta. Lao buente naturat gi taotao este i ha sablasos finenina, tattate i kabales na hinasso `nai esta atrasao.

Yangin ta ambentuye todo putahe gi lamase, pues anog na ta chachansa kumesoda` haye mas paire chesaña yan mas maneñgheñg setbesaña. Lao `nai un` ayeg mauleg sentadamo, pues klaro na un` ebalua kabales haf` sustansian i neñgkano` ni un` disidi chumule`.

Gi kada grupon soñgsoñg eleksion, guaha lamegai man-malalago gi difirientes pattida ya todo klasen offresimiento manmachuchuda` ginen i sekos niha. Muñga inalula, ekuñgog i prohimo osino prohima kao gai sustansia yan ha komprende hafa ha diskukute. Yangin antao presentasionña, pues buente ti lache yangin un` matka kahon gi mamamaila` na Nobiembre. Yangin kuenstos supen tase, upos sa` kontodo hago mamadese pot chatdisision-mo. Lao nae` chansa yan appottunidat kada kandidato ya u sañgan asuntoña.
****

I botadot yan fiet na supottadot muna` babale i kandidato. `Nai un` atrebe hao mañupotta, piot ya mangana i gayumo, pues taya` dinida na sumaonao hao man-elihe nu ayo na kandidato. Un` tatiye sa` un` hoñge na kapas para checho` linahyan. Ginen pattisipasionmo na humalom gi lehislatura ennao na petsona.

Dispues de humalom gi siyan publiko ya para un` kritisisa pot un` tulaika banderamo, chamo malelefa na hago mismo un` sañgan ñañaihon chatdisisionmo sa` un` atotga umatrebe hao gi un` asunto pot para un` asegura na matachoñg i kandidatumo. Kulan ayo este i `nos kuantos ni tumulaika relihion niha politika ni siha mismo umatmimite publikamente na lache disision niha.

Hafa este mafananaan` gi fino` Chamorro? Hipokrito!

Muñga masañgan maisa hao gi un` disision `nai sumaonao hao man-ayuda. Kulan un` amiguho ni ha lachai chumalegua sekosña pot para u konfitma na guiya mas lache disisionña. Na dinanche amigo palabramo gi hilo` fakto ya un` suhaye mañan hipokrito! Lastima sa` ginen maestro hao ya ni este na kuentas ti un` danche.

Ahe` ti hu chachanda direchomo tumulaika banderamo. Lao muñga pot fabot mafa`bisio fumama kustumbren un` homlo` na hipokrito. Dios miho, amigo!
****

Todo kandidato siempre u fan man-offrese ni lañget ni tatnai ha lie`. Yangin guaha este na offresimiento, faisen dibuenamente amano `nai gaige ennao na lañget kosake siña ta prepara hit deste pago mona. Hallo?