Asunto siha gi oriyan Marianas

Kada chatagmag, hu baba i internet ya hu tutuhon tumaita hafa siha manmasusesede gi entero elmundo, espesiatmente pot asunton ekonomian Japon. Rason na sesso hu estudia hafa kinalamtetenña Japon sa` memegaiña gi kinalamten bisnis osino ekonomia guine gi tano`ta ginen Japon.

Esta fufugoyo` yangin manaitayo` gaseta na guaha dididi` adelanto gi ekonomiaña. Lao tinatitiye este na gaseta nu i fotmat na inanalisan estudiao na ekonomista `nai ha sasañgan na huñgan homlo` Japon, lao kikidi munalo tatte taimano estaoña antes de u sinaulag un` fotte na sago deste tres años malofan.

Gi mismo tiempo malagnos un` anunsio ginen Continental Airlines na para u utot i uttimo na setbisioña gi ti apmam yan pago. Este na mensahe mampos na` triste sa` kumeke ilegña na siña ha` mas talo mafondu i industrian turista guine. Mansuette hit dididi` sa` i Japan Airlines yan otro siha kompanian batkon aire manboluntario kumatso este na chinatsaga para i hinalom haanen gupot siha giya Marianas. Lao dispues de este na sakrifisio, i asunto siempre tafana` talo gi hilo` esperansa na puede guaha otro kompanian batkon aire para u tinahgue i Continental Airlines.

Lokue`, buente pot mampos hit manespantao, tatutuhon umaminasa i paska na asunton ekonomiata gi ma-apprueban areglo yan lai siha ni ti manpresiso. Enlugat de u fino mas mona i ma-intended na areglo, mas inkabukao ya esta umarambabao i asunton linahyan pot ekonomiata. Sige ta saulag hilo` aire sin kabales na estudio hafa sesso i asunto ni ta keke aregla. I resutta: mas disareglo ke areglo!

Sige mona, mas megai manmapropone na lai gi hilo munton esta ha` bulacho na lai siha. Pinilota na ta aregla i problema, lao mas tana` mafabrika otro problema ke orihinat na intension areglo. Kada man-ma`aminasa hit, ta choneg otro tinilaika kulan tampen sinetnan. Era, kulan mohon ta sasatba i probleman tano`ta gi appruebasion mas lai osino tinilaika kontra i orihinat na lai ni ti problema gi primet lugat.

Guaha `nai chumaleg maisayo` nu este siha na checho` taotaota. Lao, enfin buente lokue` ha chachage amano i siña i los probes jumustifika i kontribusionta apas sueddon niha ginen i tax ni ta apapase kada 10 yan 15 dias. Chatmiyo fan nina` disgananao sa` dipotsihe este na chinatsaga patte gi papa` konsepton sisteman demokrasia na gobietno.

Puede mohon i manma`gasta halie` hafa signifikasion leksion i ta pega todo i konfiansata gi un` kanastra–Japon. Talie` na yangin poduñg ekonomian Japon, todo i acho` ni mañgilulog ginen hilo` ha hogsen papa` hit. Mangaige hit pago gi papa` mandañkulo siha na pidason padet `nai ta diseseha na u guaha matto pot para u reskata hit ginen este na chinatsaga.

Gi katkuet manera, kulan manmafuñot hit gi entalo` fotte na sagon Japon yan dedestrosia na planon gobietnon federat para u halom ya i displanta direchota gumobietnan maisa hit. Pot fabot, Chamorros yan Carolinas, maila` tafanacho ya ta defende un`rota komo sudadanon America. Muñga hit sumede na u tafan ma-estotba gi todo finachuchota umadelanta haanen famaguonta.

Puti hinegsen higante, lao putiña mafaga`ga` gi hilo` sensian diskriminasion ginen ayo siha na offisiat federat yan Depattamenton Interior i lumañgag dumisatentuye direchota komo sudadanon Amerikano. Ni taimano na atlibes niha nu i asunto, manpareho hit taotao, yan niha pat ti yan niha. Maila` tafan aguot kanai uno yan otro gi maprotehen direchon kada Chamorro yan Carolinas. Si Yuus Maase`!