I uttimo karera gi idat 50 años

`Nai matto i taotao gi idat 50 años, ha tutuhon umaksepta hafa finaposña yan madisponiña ya hana` mafñot sinturonña para i tetenan gi haaniña. Ha tutuhon umaregla todo asunton familiaña para `an siakasso na u ginacha` gotpe. Mientras tantos, ha kontinua manhomlu` siha na eksisio ya mas guaha inadahe gi bandan hinemlo`ña.

Tumacho komo pisun and haligen familia. Todo i inachachag gi entalo` famaguonña ha tutuhon kukmayon `nai para u guaha inadanche. Alakuenta, ha echa bendision i famaguonña gi hechuran mauleg na finana`gue `nai ha nae` i achon disposision. Deste ayo mona, ha soyu` dinaña familia gi uttimon semana `an ti gualo`, pues i gima` `nai manmafañago i famaguonña siha.

Mañge` na dinaña sa` estegue` un` manera `nai guaha mas antao na inatuñgo`. Ginen este siha na dinaña familia, matalon establese inaguaiya yan inafamauleg gi entalo` mañelo. Esta ti presiso na u fan man-agañg sa` kada uno lokue` ha komprende ginefsagan akonseho siha ginen as nana yan tata. Pot este na rason na megai gi famliata manhihot gi todo kinalamten.

Guaha `nai ha tutuhon si nana un` nobena pot ginagao ayudo ginen patronña santos. Dispues de ha diñgo i familiaña, guaha chumahlao ennao na nobena gi famaguonña ya ha kontinua komo mohon rekueddon nana. Ennao na nobena, ha kontinua muna` fan daña i famaguon gi hechuran tinayuyot. Mas masimiento i inagoflie` gi entalo` familia maseha esta taigue i hagas pisu yan halige ni sumustene inetnon i tropa pot apmam na tiempo.

Mampos sumen na` humidde yan nagamof este na tradision familian natibo guine gi tanota. Ginen este na eksisio mas lokue` tana` metgot i dicho kustumbre yan kutturan Chamorro yan Carolinas. Gi katkuet inetnon, todo i tiempo tana` memetgot mas i talen dinaña gi halom mannatibo siha. Ginen este na dinaña, mafañago lokue` sensian kilisyano `nai tanae` ayudo membron familia osino prohimuta ni gai chinatsaga. Estegue` un` kustumbreta ni sumen antao ya mauleg ta atetuye fumama pot futuron famaguonta.

Uno na kustumbre ni mauleg ta abiba tatte ayo i responsablidat mañaina muna` guaha inakomprende gi entalo` famaguon niha gi maseha hafa na fina` yinaoyao osino chinatsaga. Gi kustumbren tano`, debi antes de minachom atdao debi ennao na inadisguto umasatba gi hilo` inakomprende antes de umadiñgo i gima` dos saina. Sumen na` humidde i para ta atan (pareho amko` yan patgon) i asunto ya ta admite linachita gi hilo` pinasensia. `Nai umagagao i dos chumelo asi`i` ya umatañgse, mafañago respeto yan inapinitiye gi entalo` niha. Umapipet dispues ya mangagao lokue` dispenso gi sainan niha pot i diskonbiñiente.

Rason na mauleg ta abiba tatte este na kustumbre sa` sumen chatpago i para tafan mamatcha halom gi kotte pot inadisguston fiñkas familia taimano i masusesede esta pago na tiempo. Taya` mangana guine na eskaleran inadisgusto fuera ke abugao sa` debi ta apase esta 30 pot siento gi balin i tano` ni ta sede mana` halom gi kotte. Dimas mohon de tana` riko ennao na abugao, maulegña i gasto ta patten tiao gi entalo` herideros. Taya` baliña i para tafan adagao fache` gi halom kotte.

Lao magahet na kontodo guaho sumasaonao gi sendalon 50 años. Esta hu aksepta na ti pareho minetgotho yan `nai hohobenyo`. Ai bidadaña i dibin bañko esta guiya mismo pumapañgonyo` `an chatagmag, yaho pat tiyaho. Tutuhon umaregla haanen miyo puede todo felis hinanaota para mona. Si Yuus Maase`!