Disision gi patman kanai miyo

Inagupaña, Sabalo, Nobiembre dia 6, todo rehistrao na botadot siempre u eksisia prebilehion man-elihe membron i mina` 12 na lehislaturan Marianas. Gaige gi puntan lapes miyo na in` giguot` futuron famaguon este siha na islas. Hago `nai gaige uttimo disision gi makayon manana na plaset yan chalan para i manatatte.

Ti presiso na baiho fannae` rekommendasion haye na kabayero yan kabayera fitme na pisu `nai tumotohge pot interes famaguonta. In` tiñgo` esta haye este siha na señores yan señoras. Nae` nu i satton na supottasion miyo ya tafan sige mona kumayon pareho mas yano yan malag na pisun linala` para i famaguonta.

Ebalua mauleg puede ke i disision miyio gi uttimo besis ni uno u fañotsot pot hinesguan osino sensian imbidio. Gi puntan lapes miyo `nai gaige i futuron famaguonta. Haye ta ayeg gi halom tres lukao difirientes kandidato siempre siha u fachochue` hit gi hilo` antao na karera deste Enero gi otro sakan (nuebo na siglu).

Ti todo ta diseseha na kandidato u fan halom felis. Guaha lokue` siempre u fañaonao sin minalago`ta. Estegue` un` disbintaha gi eksision eleksion gi papa` sisteman demokrasia na gobietnamento. Lao dispues de matufoñg i uttimo balotu `nai bobu` hulo haye i manma-ayeg para membron i mina 12 na lehislatura gi sakan 2000.

Dispues de pagyon politika

Yangin magpo i eleksion, komprendiyon i motmut na sensian minagof para i man-mangana. Komprendiyon lokue` i didog na triniste gi halom ayo i mandimalas. Lao gi katkuet manera, todo kumomprende na gi maseha hafa na fina` inasoda` kompitensia, guaha para u fan mangana yan mapede.

Ta fan annae` ramas patman pas ya ta kontinua mona i karerata. Mampos megai mansustansiao siha na asunton linala` taotaota ni munanañga serioso na estudio yan satbasion. Dimas de ta fan manguot` mahetog, maulegña ta tutuhon i pasun inafamauleg kosake siña ta repasa yan muna` fino tatte i hagas amesta ni hita mismo umesague pot politika.

Inafamauleg manmafanagueta as nana yan tata ti inadisgusto. Bien felis para i mansuette yan kontodo i mandimalas. Taiguine ha` este i tiempon politika, mafatto i oran chaleg yan tañges. Gi katkuet attura, ekstende i patman pas para i prohimumo sa` enegue` i satton na kustumbren natibo. Si Yuus Maase`!

Ti todo finachucho`ta para hita

Agradesiyon i animon kada kandidato `nai machochu` haane yan pueñge pot i ha petsisige na guinefiña. Tat acho` ti ha bira, tat chataan` ti ha batbaruye, todo i botlu ha suñgon pot para u fan rikohe botun konfiansa.

Maseha kanaha` ha pupunogue`, mauleg ta komprende gi mismo sakudida na guaha lokue` na finachucho`ta gi para hita. Kulan on kasadules ni kumarerera gi halom tano`, ala kuenta ennao na hinanaoña, ume`esuette i prohimo. Yangin uha fagchae` manae`, pues abundansia biradaña. `An dimalas, pues suñgon sa` ti todo i biahe mananae` hit nu i ta aliligao osino ginagagaota.
****

Guaha lokue` un` proposito ginen i lehislatura pot para umalimitte botasion tano` Marianas gi Chamorro yan Karolinas. Ti konfotmeyo` na hita mismo para ta diskrimina i otro sudadanon Estados Unidos de America. Ta sede manmanbota gi propositon tinilaikan konstitusion, eleksion Marianas yan otro siha asunton linahyan ni inembrarasa direcho sudadanon Estados Unidos de America. Hafa pago na hita mismo para to ñega direchon niha `nai enfin guaha dumiside na este iya Marianas i tano` familian niha? Checho` satbahe este na proposito. Bota “Ahe”, “No” yangin malag i sagan botasion hao.