Chinatsagan malango

`Nai masanganeyo` na para bai` mana` hanao para Honolulu pot acho` renihion, dididi` kalan hana` chatssaga hinasogho lamayot patte pot tatnai hu susede mana` hanao pot minalango.

Kalan ha konsuelayo` `nai hu pega haaniho gi Nanalibreta. Mas kontento hinasogho `nai umalieyo` yan medikon rinihion ya ilegna na para u dirite i acho` ginen i amot ni hanae`yo` dispues. Taya` otro chathinasgagho fuera ke kao sinayo` makatga gi batkon aire pago na haane para mage Saipan.

Dispues de todo felis, hu bisita i pumalo manmalango ni mangaige lokue Honolulu. Guaha esta para sais mesis deste ke mariferi i prohimo. Hu lie` misin lago` niha `nai sige man-emahalang pot dinana familia siha piot pago gi tiempon haanen gupot siha. Magahet na puti taigue gi tano`ta guine siha na tiempo. Hu soyu` na umasungon puede todo felis gi tutuhon i nuebo na sakan.

Humanaoyo` tatte gi kuattogho ya sigeyo` manayuyot na puede maase` i Saina ya ha ekungog i mannamase` siha na sentimento yan chinatsaga ni mafatto ginen i korason i manmalango siha. Kalan hana` makat korasonho i fino` niha siha `nai sige masangan pot tradision familia gi pupuengen Noche Buena. Magahet na mampos manmahalang nu iya siha.

Makat ta komprende hafa pinadesen serioso na kondision malango ya solu manera `nai sina talie` hafa sentimenton niha i para ta pokate i mismo halom tano` `nai mangaige pago. Gi primet lugat, didog na pinadese lao ha susungon amano i sina. Dispues, i pipulan mampos lokue` chathinasso kao u fatinas mohon i malango pat u ginacha` sala` esta i chetnotna. Tatatte i chathinassona pot i famaguon ni ha dingo pot asunton minalango. Mampos gotpe na tinilaika deste un` dikiki` tano` esta un` dankulo na siuda. Todo este siha umokukupa hinasson pareho ha` i malango yan i mamumulan. Makat na kontrario gi katkuet manera piot gi pottamonedan familia.

Este na asunto sumen nachatsaga piot `nai hokog esta i insurans (insurance) i malango para ayo na sakan ya matto i notisia na taya` lokue` ni hafa na ayudo sina manae` gi bandan apas gaston hospitat sa` tinahong chiguan gi programan medical referral. Estegue` afanielos i diberas na litrato pot mana` hanao minalango. Petsonat este na responsablidat ya ti sina na para ta fan manguot mahetog gi administrasion sa` taya` esta dibatde na setbision mareferen pot malango gi hiyong Marianas.

Este na eksperiensiata, sesso ha gacha` hit indukto pot rason na mampos hit lokue` manmanangogho na i gobietno (ginen programan medical referral) para u responsable nu este na gasto. Munga manlache na este na asunton, asunton petsonat na responsablidat. Yangin ti un` atetuye mamahan insurans pot hinemlomo, pues angogho na `nai matto ayo na gotpe i tatnai un` guife antes, kanaha` ni manhasso ti sina. Pot este na rason na kada familia debi u atetuye mamahan insurans. Para i ti muna` sina, debi u guaha areglo hafa na ayudo sina manmanae` i ti muna` sina.

Makat ta fafana` para mona piot yangin ta kontinua gumulusune mantikan gaga`, asiga, asukat, chupa, amot bineno yan maneska. Yangin ti un` ataha i manbaba siha na bisiu gi haanimo, siempre u fatto un` sumen nachatsaga na chetnot gi inamkomo. Tutuhon tumulaika i manmange siha na sintadata pot hinemlomo.

Hungan, mange` i kadon guihan yan guaka ni mafugue` lechen niyog piot ya sesso un` daflogue. Ribaha adumididi` papa` pot para un` utot i mandanosu siha na mantika ni humuhuchom gigat korasonta. Baiho bibirayo` tatte gi este na asunto sa` sumen presiso na u guaha kinemprende hafa mauleg na eksisio diaramente para ta ataha seriosu na chetnot siha. Si Yuus Maase`!