Hinalom Mina` 12 na Lehislatura
Esta oppan haye offisiat i mina` 12 na kuetpon lehislatura. Tananae` bien felis i kabesanten dos guma` gi nuebo na tinituhon tetminon niha umina sustansiao siha na asunton linahyan pot para u guaha adelanto gi linala` natibo guine gi O`Perlas iya Pasifiko.
Dañkulo na katgo fumafana` este siha na señores yan señoras. Primera asunto tineteka i didog na chinatsagam ekonomiata ni finendo nu i poduñg ekonomian iya Japon yan Asia. It otro layeye i atten mantailaye siha na proposito ginen Washington pot para umadispone asunton immigrasion guine. Estague` layeye dos sustansiao na asunto ni lumuño haligen yan pisun ekonomian iya Marianas gi hiniyoñg i mapos na siglu.
Gi este na mattiro, megai taotao-ta man-e`ensinahyao pot chochu` para ke siña u suppotta familian niha. Este na chinatsaga ti u adelantague` estake munalo tatte hinemlo` i kinalamten komunidan bisnis guine. Todos dumiseseha mas mauleg na kinalamten ekonomia. Lao para u posible este na diniseha, finenina debi umarikonose todo lai ni kumokontra adelanton eknomia (kinalamten bisnis) ya umafunas ensegidas de klaro na dañosu para ekonomian tano`ta.
Gi mismo tiempo, presiso na u guaha antao na propositon lai siha pot para ta soyu` halom man-nuebo na industria guine. Este lokue` na ideo mauleg hita nu i natibo ta aksepta kabales hafa na bintaha yan adelanto finañañago nu i hemlo` na kinalamten bisnis osino industria siha. Guaha ha` `nai debi ta pañot diskombiñiente komo sakrifisio pot para ta adelanta haanen taotao-ta siha.
I kumokontra direchon Marianas gumubietnan maisague` ti mafagpo` asunton niha. Mas siempre na biahe didog este na estrakada piot sa` ha tuñgo` i kontrariuta na uttimo suspiros pago na sakan sa` seguro na u fan maliñgo nu i offisinan presidenten Estados Unidos de America deste otro sakan (2001). Ta diseseha na ta tagam i kontrariuta gi todo banda pot para ta alibia i daño kontra direchota komo manpareho sudadanon Amerikano.
Makat na kontrario lao sin imbatgo, dobla mañgas miyo sa` lafotte i mamamaila` na biahe. Hu diseseha lokue` na ayo na inbestigasion i matutuhon gi mapos na sakan as Congressman Don Young u tutuhon manmalagnos hafa illigat siha na chatchecho` kontrariuta pot para umafondu direchota gumubietnan maisa hit. Mas siempre klaro sa` hafa na ti kombene i asunto siha ni mapetsisige nu i kontrariuta. Hu diseseha na i Saina unae` hit bendision gi este na mattiro siha puede siña ta lagnos lokue` dicho na siñienteta sa` hafa na tailaye i mapetsisige na asunto siha.
****
I mas napinite na sinisede guine gi alacha i guaha ha` siha na offisiales Marianas mampos ti komprendiyon posision niha pot interes yan direchon natibo gumubietnan maisague` taimano mapluma gi papa` i kontratan i Covenant.
Siempre u fatto ayo na haane `nai guaho mismo baiho tacho ya baiho` na` klaruye siha este na offisiales hafa debi u komprende na lache i mapetsisige na posision ni sen ti umaya yan dinisehan mayotmente guine gi tano`ta.
Maseha makat este na katgo, lao siempre baiho fatto guato gi telai politikan ya hulullo` ya baiho husga yan esplika klaro sa` hafa na i maguiguife na puesto ti umaya yan todo kinentra direchon taotao tano` gumubietnan maisague`.
Diberas, esta na` fugo yangin ta konsidera na guaha gi offisiales Marianas lumañgag maigo kontento gi mismo katren i enemiguta. Siempre baiho na` klaro este na linache gi uttimo besis. Sen mas, ta nanae` bien felis i nuebo na membron i mina` 12 na lehislatura. Maila` tafan aguot kanai ya ta tutuhon kumayon mas yano yan libiano na plaset para i famaguonta. Si Yuus Maase` yan ghilisow!
