Si Nanan Chechañg

Guaha un` sainaho na tai apasyo` nu todo i finanagueña `nai hohobenyo`. Era, uno-yo` gi halom tanores. An` ogaan` sesso humame mamokat para yan ginen gima` Yuus.

Pot años `nai humame mamokat kada ogaan` para i Katedrat pago (Guma` Yuus Chalan Kanoa). Gi duranten este siha na tiempo megai estoria ha sañganeyo` pot tiempon Haliman, Españot yan antigo siha na Chamorro. Mientras tantos, ha fanagueyo` sustansian diaro na lisayo, uson biyas yan estasion Sainata gi semana. Magahet na estegue` na finanagueña fitme giya guaho esta pago na tiempo.

Guiya este na sainaho si Tan Marian Reyes (Toliug) ni in` fananaan` Nanan Chechañg. Brabo na saina ya kada semana ha fedus i hegso` Hetmano para i lanchoña As Lito `nai manrikokohe niyog yan talisai. Ha pega i kinacha` niyog osino talisai gi 50 libra na kostat ya ha umapapa` gi señgsoñg.

Tuñguon` komo lemlim taotao sa` siempre anog gi puntan eskuela gi sanhaya. Sige pago manate ham gi tateña manmanñgiñge` ya in` akompaña guato esta iya siha. Ha echa ham bendision ya maseha in` efrerese ayudo umumaye nu i katgaña ayo ha` ilelegña i “polu sa` kuanto tetehnan”.

Ha kamyo i niyog gi sigiente dia ya mamatinas tika. Ha sine i laña gi buteyan Kikkoman Shoyu` dispues ha pega gi estante. Sesso `an bumiahe para Guam, ha chuchule` `nos kuantos buteyan laña para i familia yan man-atuñgoña. Sumasaonao kanden bukayo yan talisai an` kumarera para u fan bisita giya Guam. Dos attikulo `nai sesso hu hasso i amko`: lañan niyog yan bukayo.

Estague` un` sainaho na fiet gi relihionña yan makalamya esta`i finataiña. Hombre ayo na haane `nai matai, tinetpe kareta gi biradaña ginen i Guma` Yuus giya Guam. Kalan hulilie` magof mataña `nai tumalag hilo` ya halie` i ma`lag na matan i Nanalibreta ya sinañgane “Maila` hagaho sa` esta nahoñg setbisiomo nu guaho”.

Matto mahalañgho nu este na fiet gachoñgho an` ogaan para i misa `nai malofanyo` gi hagas guma` `nai sumasaga antes. Kalan hulilie `an matatachoñg gi papa` troñkon kamachili gi fihon plasan eskuela ya sige ha fusu` i hinikaña talisai gi entalo` sunido siha ni manbonito.

Huñgan, guaha gi manprimuho yan primaho umakachaye i amko` gi tinala`ña talisai ya dañkulon chaleg ham pago yangin `in sasañgan i grasian mame kontra si nana. Lao ha tuñgo` ha` na hame sumasake i tinalaña talisai sa` haye mas ke mismo famaguon bisino. Ai na chochu` i in` sakenguam un` puñot dispues in` tatiye para i kusina ya in` gagao ha` talo dispues de mama`kande i biha. Huñgan chumachaleg nu i manpetbetson mame guihe na tiempo.

Esta pago na tiempo `an humalomyo` gi Katedrat, siña baiho apunta amano si fulano yan fulana (ni esta manma`agañg para i taihinekog na deskanson niha) sesso `nai manmatachoñg. Dispues de bendision finagpo` misa, todo man-inalulula para i gima` `nai man-amotsa ya ha tulos siha para i lancho osino kanton tasi.

Humame pago tatte yan si Nanan Chechañg gi gima`. Guiya este na ora `nai man-inalulula i taotao para i checho`. Guaha man-mau`udai gi bus i Navy mientras i pumalo gi sahyan niha mismo. Lao para todo Nanan Chechañg i konkariño siha na finanaguemo yan petmanente na irensia `nai un` fanagueyo` lumisayo, hu tayuyute hao felis ya puede lokue` un` hahasso ham yan i mañeluho gi rainomo. Bien felis yan Si Yuus Maase`!
****

Mañge` i linala` natibo antes na tiempo. Maseha `an lagse magagumo lao gasgas yan disente maseha un` falag mano. Metgot i sensian kooperasion gi halom taotaota, Carolinas yan Chamorro. Maila` ta abiba tatte este na kustumbreta sa` mauleg gi todo kinalamten natibon este siha na islas.