Respeto gi sakrifision Natibo

Hu komprende kabales hafa sentimenton taotaota pot ayo na asunto i mafananaan` “federal takeover” ni mapetsisige nu i kontrarion Marianas.

Gi este na estrakada, sesso teñga i otro gaseta fumandañgo gi atlibes na posision kontra i sentimenton natibo pot este na asunto. Megai botlu ya mafa` huego i sakrifisio siha ni gaige gi papa` hechuran i inakonfotman i Covenant.

Hu repara na este siha na taotaogue ayo mapetsisige interes niha green card de hemunos kao hafa uttimoña i linala` taotao tano` guine komo ha choneg interes niha mismo.

Ha trata i linala` natibo komo guinaifen mañglo` sin kinemprende yan agradesimiento gi sakrifision taotao tano` `nai ta pega haanita gi inañgoghon sustansiao siha na attikulo gi papa` i Covenant.

Afañielos, este na insutto siha ginen gaseteron i otro papet guine matto gi tailaye para i natibo deste Luta, Tinian yan Saipan. Taya` sensian responsablidat yan antao na inadahe gi proteksion futuron taotaota.

Kalan mohon i siha ha` man-menhalom ayo mina` ti mana` presiso i unesto yan kabales na sentimenton Chamorro yan Carolinas. Matto este gi hafa` manbaban famaguon hit sin konsiderasion man-ginen mano siha mage.

Yangin todo fino` niha hagas mohon matrumpeta gi tano` niha, sobla de u antao na sisteman demokrasia `nai todo man-manae` appottunidat gumosa finachochu` gobietnon niha. Ya ni uno gi entre siha machochu` gi respetao yan disiente na gaseta giya Filipinas. Ya para este mage na u fan man-nanae` manlache siha na abiso pot futuron
famaguon Marianas gi kadu` na tampen sinetnan pot green card?

Debi i natibo u tacho ya u pega gi sagan niha este siha na taotague sa` ti justisia i para u-makontinua pinetsigen diskalentao na opiñion ni kontra yan sentimenton natibo siha guine na islas. Tatnai buente ha repara na ni unabes `nai man-entalo` i natibo gi asunton tano` niha. Esta na`matman i atetun este siha na taotague ni mamalefan ñaihon na i sentimenton natibo gi asunton federal takeover i mas presiso na u madefende de hemunos de green card.
****

Manadan botlu kontra manlihitimo siha na pinetsigen lehislatura. Klaro na tinahoñg fottelisan titanos niha para u presenta, sin una` lebog i hanom ni ta gigimen, gi dicho attikulon publiko siha.

Sige mabotlea i mahatsan gaston membron lehislatura ginen Tinian yan Luta, lao gi mismo tiempo ti ma-analisa i gasto yangin enfin uno gi dos tano` `nai makondukta i huntan lehislatura regulatmente. Klaro na i intension ti pot para u pula` i asunto, lao mas ha` gi botlu sa` ti ha prepara inestudian este na asunto para benefision publiko.

Gi este na asunto, mauleg u guaha pinasensia sa` i kontribusion tax mafatto lokue` ginen i bisinuta Luta yan Tinian. Taya` linachiña i para u guaha hunta gi dos tano` sa` ti sesso este na aktibidat makondukta gi tano` mañeluta.
****

Man-edukao yan menhalom i taotaoho siha guine na gaseta sa` gi primet besis masañganeyo` “Señor, ti siña na hame para bai`n fanue` i taotao tano` siha hafa sesso asunton niha sa` ti in`tiñgo` hafa estorian este siha na asunto. Pot este na rason na taya` bisnes mame gi pahinan numero sais (6) yan siete (7).”

Guaha respeto gi sentimenton natibo ginen gaseteron este na papet. Tatnai in` fatinase finiho` i prohimo ni man-nae` infotmasion soluke in` pega papa` ekyakto hafa sinañganña. Estegue` i antao na checho` gasetero. Gigon un` tutuhon mamatinas finiho` ni ti ha sañgan i prohimo, un` chachansa mana` matcha halom gi kotte pot manlache siha na intension.

Afañielos, fanacho pot direchon natibo. Muñga mapasensiaye i manlache siha na botlu ginen i otro gaseta guine piot ayo i man-mamañge` opiñion. Yangin gai konsiensia i otro gaseta, pues siempre oppan ha pega papa` hafa sentimenton natibo ginen komunidan Marianas. Debi u guaha dañkulo na respeto gi hafa ta sakrifisia deste antes. Si Yuus Maase`!