Manmahalañg nu i tano` niha

Umasoda`yo` yan un` amiguho ni mafañago giya Pagan. Mahalañg esta i prohimo nu i hagas soñgsoñg `nai dumañkulogue` yan mañeluña. Fuera de guaha dididi` na ayudo mafatto ginen Saipan, todo familia umusune i gualo` yan pinegsai gaga` para uson niha. Abundansia lokue` todo klasen guihan gi tasiña. Hu komprende i satton na dinisehan i amiguho sa` tat mas trañkilo na siñiente ke `nai sumasaga hao gi tano`mo.

Gi mismo tiempo sige u konsidera hafa sesso na maditetene ginagao este siha na mañeluta bumira siha tatte gi tano` niha. Yangin pot pagpag botkan, mauleg buente i manduda umabisita iya Big Island giya Hawaii para u lie` na ti piligro sumaga hihot yan botkan.
Yangin magahet na piligro, pues siempre hagas manmamueba i taotao ginen lugat niha.

Yangin para u guaha mas aseguridat na safu iya Pagan, pues uma-estudiaye i direksion i hegso` yan mano sesso `nai ha luga`gue` i milalag guafen botkan yangin u pagpag talo taimano i medio ochenta na sakan. Ennao siha na hogsu` debi umasuhaye gi ma-establesen komunidat iya Pagan.
****

Debi tafan eyag satton na inadahe gi dididi` na guinahata para siakaso na ha totpe hit ira osino didog na chinatsaga. Muñga na estake taya` hanom gi tañke `nai para ta fan e`ensinahyao sumoñgsoñg i sime` siha. Debi ta fan listo gi ma-areglan todo sume` kosake siña tafan na` sahñge para `an hafatoigue hit maseha hafa na ira.

Dispensayon este na abiso sa` atlibes i masusede. Pago ta repapara na sume` i tañken hanomta. Lao kontodo hilo` este na mattiro, guaha ha` mampos mañgontento na todo mauleg i sisteman ekonomia guine. Dispasio mampos i kunanaf deñgdeñg, lao dimasio lokue` paosa i pinekat i Senate. Dios miho!
****

`Nai man-nae` otdin i kapitan Amerikano gi sendaluña para u fan matcha, todo pasu pareho gi hilo` duro na esalao “left, right” mientras sige mona. Ai `nai matto tareaña i sendalon natibo, guaha man-hanao mona mientras i otro grupo sige tatte, kontodo matchan un` banda.
Hafa na chinalapon tiao `nai pañgpañg i talaya. Hu e`ekuñgog kao guaha “left, right” taimano i sendalon Amerikano. Ayo ha` hu huhuñgog i duron chatfino` ginen i kapitan. Dios miho!

Pareho este yan sendalon i sanpapa` na guma` lehislatura. Todo pasu pareho na esta bonito pañgpañg sapatos niha gi hilo` odda`. `Nai matto tareaña i Senate, haf` na machalapon manog hatsado. Lao gai sendalo lokue` nu ayo i “Lulu Boys”. A` Saina!

Umesalao i kapitan i Senate lago gi sendalon administrasion “forward ho!” Ni uno lokue` kalamten sa` memegaiña man-u`ugoñg pot chetnot “follow-me” (dinalag). Dios miho! Buente madaflogue i kaddon fo-bai (patas guaka).
****

Kada mafaisenyo` para bai` falago para offisinan publiko, hu oppe na trabiha ti listoyo` umabandona i tres na leblon bañko. Ma-atanyo`, man-dibina un` rato, dispues ileg niha: “Lao dañkulo na onru, kontodo State Funeral!”

Hu sablasus tatte: “Amigo, dañkuloña na disonru i para bai` mababatsala halom gi kotte sa` tinahoñg chiguan`! Pago pot State Funeral, esta monhayan hu lasgue paken troñkon abas, flecha yan bibig kariso para `an mana`tunogyo` ginen i añgariya”.

Yangin pot para bai` ma`agañg “Congressman” osino “Senator”, tinahoñg ennao na onru para apas dibi. Dispues, hu lilie` ha` deste antes `an mangupo huyoñg i los prohimos gi pettan santatte. Haf` na man-maflecha huyoñg ginen offisinan niha `an matto i taotao bañko. Polu, dialo, tat palo!