Hinemlo`: Silensio lao dañkulo na gasto
Ti megai siña kumomprende osino umagradese i didog na chinatsaga pot gaston hinemlo` soluke malofan hao guihe na tadoñg halom tano` i tai fondu.
Piot ya matto i admnistradot hospitat pot para un` sinañgane na taya` esta setbisio siña manae` malañgumo sa` esta hokog salape` ginen iyomo health insurance.
Este na pinadese sumen puti yan tihoñgiyon, lao masusesede esta gi `nos kuantos familia guine. Ti un` biahe osino dos biahe `nai talie` familia man-daña pot para u fan man-rikone koble pot gaston hinemlo`.
Este na punto ti inembrarasa gaston apmam na man-kama pot kanset, chetnot korason yan amko`. Gi maseha hafa na manera, dañkulo na gasto kontra i pottamonedan familia. Todo pot todo, ha aminasa pareho ha` fiñkas yan tiempon kada familia.
Todos hit man-hananao mona ya ni uno u soplu umamko`. Naturat este gi haanen kada uno. Estegue` un` attikulo na debi un` preparaye `nai brarabo hao. Rason? Pareho yan finatton un` sake gi silension pueñge `nai mafoñg maigomo ya ha umpañg i mas man-guaguan na kosasmo.
Hagas hu pulan este na asunto sa` hu chage malofan guihe na tadoñg sabana `nai ti hu lilie` mona hinanaoho. Man-tinane` hit huegon finatane` mientras i numeron familia ni pumadese este na mattiro mas ma-umenta. Hombre i man-lodu` sueddon niha osino man-riko nina` fanñichichi` `nai man-mapresente nu i kobransa.
Para i malago` lumibiano dididi`, baiho soyu` hamyo na in` fan mamahan segundo na health insurance. Gi este na pinetsige, fan mamaisen hafa na assistimento ha kukubre ennao na areglo osino health insurance. Maila` ya baiho fanue` hamyo hafa na presiso na in` fan mamahan mina` dos na health insurance.
Operason korason: I health insurance gobietno, ayo ha` siña ha kubre ti mas ke $50,000. Todo i sebla na gasto hago para un` apagaye. Este na gasto suette yangin menos ke $100,000.
Yangin hago osino membron familia presiso na umanae`nuebo na reñihion (ma-transplanta), suette yangin gaston este na setbisio menos ke $100,000. Mas dañkulo i gasto yangin higado debi de uma-transplanta guato gi malañgumo. Ti menos este ke $280,000.
Kontodo setbision hinemlo` pot kanset, maseha mano na patte gi tataotaomo, gi uttimo besis añgogho na dañkulo i kobransa ni para un` apase. Pot este na rason na mauleg para i familiamo yangin siña mamahan hao segundo na health insurance para katsu.
Hu komprende sa` hafa na megai gi entre hita ti mana` presiso este na attikulo. Lao pot fabot muñga manañga na estake ginacha`hao indukto `nai para un` e`ensinahyao man-espiha alibio. Pago `nai un` chogue `nai brarabo hao. Haf` baliña todo i finachucho`mo `nai pot diskuido para un` sapet mas i familia sin presiso. Chogue hafa antao para i familiamo. Hu diseseha na ti megai u fan ginacha` nu este na mattiro gi haanen niha. Si Yuus Maase`!
• • • • •
Dimas de un` tala` kuerumo gi menan television yan snacks siha, maulegña un` tulos hao mamokat gi kanton tase `nai siña unna` fañuha i mantikan gagu` gi sinturamo. I hinemlo`mo hago solu siña umaregla. Chogue pago!
