Lastima, lao paraiso

Uma`akontra i intensionta fumatta tano`ta komo gasgas yan safu na lugat para bakasion familia ginen Japon yan otro lugat siha giya Asia.

Este na diniseha mafnas gi kada man-huyoñg i bisita yan familian niha para u fañena gi hiyoñg hotel. I primet litrato ni malie` i bentan famalaoan siha gi chalan i hotel siha giya Garapan.

Bentan famalaoan gi chalan ha signififika (para este siha na bisita) na ti safu yan gasgas i lugat para familian niha. Este i bentan famalaoan gai koneksion yan i mas man-na`mañao na grupon kriminat siha ginen Japon yan otro lugat siha.

Ensegidas man-mamatinas disision este siha na familia na u fan malag otro lugat gi sigiente bakasion niha. Maliñgo Marianas man-disiente siha na bisita. Iya Guam, Hawaii yan otro lugat siha giya Asia i man-gana sa` mas safu lugat niha ke hita pot bakasion familia.

Gi un` tiempo, guaha un` hotel guine gumuaddia mas ke 48 oras i tetset bibienda ni inatkila nu i Yakuza. Machogue este pot para u maprotehe i otro bisita siha ni mangaige gi oriya. Mampos man-chathinasso este siha na familia gi duranten bakasion niha guine.

Mientras ta sesede halom grupon kriminat ginen Japon, China, Hong Kong yan otro lugat siha, i ta diseseha na plano para tana` safu yan gasgas tano`ta para familia ni ñgaian` `nai ta komple. Megai siempre umupos iya Marianas kada sakan ya manhanao guato Guam, Hawaii, Australia yan otro lugat siha.

Dañkulo na asunto i ta fafana` ya solu satbasion i para u guaha disision areglo hafa malago`ta pot tano`ta komo mauleg na lugat para bakasion familia. Makat tana daña` grupon kriminat yan disiente siha na bisita. Hita para ta diside amano gi dos mauleg para i industrian turista guine.

• • • •

Huñgan, megai gi grupon kriminat man-halom gi lihitimo siha na klasen bisnis. Lao mas pago mahatme i bisnis bentan sensin (putaria) sa` miyon yan miyon na industria este gi entero elmundo kada sakan.

Deste iya Russia, Thailand, China, Filipinas yan sanpapa` na America `nai manmañgoñgone` famalaoan deste 12 esta 26 años na idat siha. Mampos didog i chinatsaga siha guine na tano` ayo na `an manma-offrese(gi hilo` dinage) mas ma`lag na futuro, ensegidas ma-aksepta.

I checho` ni manma-offresen ñañaihon puro man disente. Ayo ha` humoñgañg i famalaoan `nai manmatto ya manma-affuetsas para u benden ñaihon siha. Manma-apase dididi`, i memegaiña humanao guato gi amon niha siha. I man-imbeste, ma-aña osino mana` lamen kulan ga`ga`.

Pot ihemplo: Giya Thailand, guaha un` lugat kulan pastahen famalaoan` deste mas hoben esta i la amko`. Mangaige gi halom kulan sagan ga`ga` ya ayo solu `nai manlala`la` i para u bende tataotao niha.

Giya Russia yan otro tano` siha ni manchatsaga giya Uropa, pareho masusesede gi offresimienton disente na cho`chu` lao bisnis sensin uttimoña i umaksepta este na ineffrese siha. Pot este na rason na debi iya Marianas u famatinas disision ya u huchom este na industria guine yangin enfin i dinisehata para tana` gasgas tano`ta para lugat bakasion familia siha. Si Yuus Maase` yan ghilisow!

Strictly a personal view. John S. DelRosario Jr. is publisher of Saipan Tribune.