Previous Story
Na` chatsaga siha na señat
|
Posted on Apr 19 2001
The Issue: I modun linala`ta gi modetno na Marianas mas hana` kosus yan potlilo i dinaña familia.
I Opiñion: Mauleg ta rinueba yan tana` fitme kustumbren tano` pot para ta kreansa i famaguonta siha.
Megai tane` na tiempo `nai kualidat na ora para familia maliñgo gi halom estrakadan tinilaikan modetno na linala`ta natibo.
Gi karera mona, kosus i hagas fitme na pogse` familia piot sa` diaroamente inaminanasa nu todo klasen tane` yan fuetsan nuebo siha na tinilaika.
I mañaina, pot para u fan gai tiempo mismo, ha eksisia mañan konsentidot pot no u fan mapot gi hafa dipotsihe nesessidat kada patgon diariamente. Ta choneg ñaihon obligasion saina pot para ta attende dibosion petsonat. Mas este na atetu gi modun saina hana` kosus i satton na dinaña familia.
Kada patgon mauleg na finañago ya gi guiya ha` mismo ha espipiha lokue` haf` taimano `nai siña hana magof i mañainaña. Lao `nai ta disattende nesessidatña, ha tutuhon umaligao maisague` sa` fatta attension gi gima`. Taya` ha aliligao i prohimo i para u manae` dididi` attension pot para u prueba lokue` na guaha nina` siñaña.
Na`mase` i kareran este na patgo `nai primet hiniyoñgña ginen gima` niha ha totpe ti manmauleg siha na amigo. Pot para umasede sumaonao gi tropa, man-osge `nai matago` para u chogue i tailaye na otdin i grupo. Soluke ha tatitye matago`ña `nai masede halom komo membro. Sige mona, mas chumago` i patgon ginen mauleg siha na ineyag hobensito.
`Nai ha birague` tatte gi gima`, ni uno gi dos saina tumagam pot para uma-apagat i prohimo. Ha chule` i chalan dañkulo sa` taya` sensian guinaiya ginen i dos sainaña. Estegue` tutuhon linache yan lastima na mauleg hobensito ni siña ha` mohon ha benefisia satton na attension sainaña.
Megai gi famaguonta mangaige pago gi kanton kantit destrosio gi haanen niha mismo. Hafa ha susede dispues solu espehos pot dos saina ni lumetke obligasion niha gi un` mauleg na finañago ni ti manae` propio attension pot para u eyag tumaotao. Este na fatsu, diskuidon dos saina. Antes de umasusede tailaye gi patgon, nae` pago nu i propio na attension miyo sa` ha nesessita lokue` i prohimo mafanue` nu i appruebao siha na checho` taotao. Tutuhon pago. Si Yuus Maase`!
