`Nai ta destrosian maisa tano`ta

Buente mampos hit man-impitosu gi asunton linahyan siha na sesso ta banidosuye i asunto sin propio konsiderasion. Esta man-malefa hit hafa presiso yan antao siha na areglo pot para ta abiba dinisehata umadelanta kaulidat haanen taotaota siha.

Matto gi hana` triste siñientegho `nai hu taitai un` katta ginen un` kabesanten un` dañkulo na inetnon industria gi entero elmundo. Ilegña na megai na industria lumeletke iya Marianas na tiempo. Es desit, nu uno gai interes fumatoigue este siha na islas pot para u yute` keblen niha guine gi hechuran bisnis.

Ha mente na `nai ha agañg un` dañkulo na kometsiante pot para u lie` kao gai interes guine, ilegña i atuñgo`ña na ni para u hihute Marianas ya maulegña `an humanao guato-gue` Singapore yan otro lugat siha `nai mauleg yan felis i tratamienton bisnis.

Ha sañgan lokue` na i presente na kondision (`nai kanaha` ni uno uminteres humalom mage Marianas) makat humalom adelanton bisnis guine. Kumeke ilegña na hafa i gaige pago solu industria `nai siña ha katsugue` Marianas. Taya` otro appottunidat fuerake hafa guaha pago guine.

Ha rekomenda i prohimo na solu manera `nai siña guaha nuebo na espiritun bisnis guine i para u pega haanen niha i mangai keble na natibo gi tinituhon bisnis. Este solu manera `nai siña ta soyu` nuebo na bisnis ginen hiyoñg yangin malie` na muna`lo tatte i sensian konfiansia. Yangin ni uno gi natibo osino grupon kometsianten taotao tano` mumalague` dumaña gi tinituhon disiente na bisnis, pues ti siña lokue` ta ekspekta i ginen hiyoñg na u halom sa` ni hombre hita mantai konfiansa hit nu hita mismo.

Homhum i mapagahes iya paraiso gi sanme`na. Hita mismo tumiteg i layagta lao manguaguaife metgot i mañglo` ni siña chumoneg galaide`ta mona lagse`. Ni uno mumalague` kumapitane galaide`ta pot para ta fan matto guato gi ta hananaogue na lugat. Gi mismo tiempo sige manrikohe i chubaskon chinatsaga gi sanme`na. I man-inosiente na pasahero man-susto sa` ti matuñgo hafa masusesede.

I karera ti asegurao para mano hit. Haf` na batko sin timon. Ni uno malago` man-adahe gi hafa tetehnan na mantension. I karera guse`ña disgrasiao ke u ta fan matto safu yan felis. Matto gi ha estotbayo` este na karera. Lao gi todo pot todo, memegaiña gi ta padedese pago hita mismo umatisa gi hilo` un` diskalentao na pinetsige.

Malago`yo man-ayuda, lao masa`yo` umatrebin maiso setbisiogho sa` mampos bula man-sabio gi hegso` i Deni`. Ni uno ume`ekuñgog sa` todo chumalelegua` sekos niha, sinparat. Anog na ti makomprende na i umekuñgog i mas presiso na kualidat gi maseha haye na setbienten publiko. Yangin u fatoigue hit mas didog na chinatsaga, pues i offisiat publiko `nai gaige layeye este na diskuido deste 12 años malofan.

Ti bali i para ta fan asogne pago. Maulegña ta dobla mañgas franelata ya ta tutuhon sumufa` finenina i mas manpresiso siha na asunton linahyan. Yangin ti listo hao mañetbe satton, pues boluntariamente mauleg para hago i para un` suha gi un` banda. Sotta ya i muna` siña chumachalane mas fitme yan yano na plaset i publiko na guaha benefisio para i mayotmente gi taotaota ni man-mamadedese pago. Si Yuus Maase` yan ghilisow!

Strictly a personal view. John S. DelRosario Jr. is publisher of Saipan Tribune.