Kontenuha Muna’gåtbo Luta!

By Frances M. Sablan

Manmambisita i ufisiåles i ‘Pacific Islands Bilingual Bicultural Association (PIBBA), CNMI Chapter’ giya Luta gi ma’pos na simånaa. Guaha siha tinilaika in li’e guihi na biåhi. Gåsgas i kanton tåsi, bula tinamom flores, piot i flores måyu siha kanton chålan, guaha hinatsan guma’ kåmalen siha gi un fina’fanefreskuyan (park) giya Sinapalo. Bunitu yan gåtbo na lugåt para u ma kondukta (host) i bente i dos na komferensian PIBBA. Taimanu ha’ti u ma ayek Luta nu i membron PIBBA, International para i komferensian-måmi gi 2003 na såkkan.

Manmagof i ufisiåles i inetnon PIBBA sa’ma aksepta nu i Mayot Luta, as Hunuråble Benjamin Mangloña. I manma’estra yan manma’estron i Prugråman Chamorro Bilingual, i membron PIBBA, CNMI Chapter ginen Luta, yan i atmenestradoran i Eskuelan Ilimentårio Sinapalo, as Siñora Carmen Hocog Atalig mansen magof para u maho’ye i komferensian PIBBA giya Luta otro såkkan.

Siempre bai en bisita i membron i liheslatibon Luta parehu ha’ i sanhilo’ yan sampapa’ na guma’, i membron Konsehilion Munisipåt Luta, i atmenestradot i eskuelan ‘Rota High’, i atmenestradot i ‘Gymnasium’ yan i pumalu na atmenestradora yan atmenestradot para bai infaisen i ayudon-ñiha para i mamamaila’ na che’cho’-ta, i komferensian PIBBA.

I komferensia dipotsi tres dihas. Gi halom i tres dihas siña ha’singko pat mås na ‘sessions’ siña ma atende nu i mampattesipåo. Guaha siempre fina’sena yan amotsan talo’åni. Puedi ha’ ha sedi hit i saina-ta yan i tiempo para u mana’guaha siha differentes na aktebidåt tiningo’ para u fanmakondukta. Esta manufresi i Mayot Luta para u ‘host’ i primet sena, i senan benbenidu. Tetehan para bai infaisen i Sinadot, Kongressu, Konsehilion Munisipåt yan kumunidåt Luta para u ma ‘host’ i pattesipånten i komferensia yan i familian-ñiha otro såkkan.

Anai ha fa’nu’i ham i Mayot Luta nu i planon i sentron kottura, ya ha sangåni ham na guaha esta ma’apropio salåppe’ para u ma håtsa i sentron kottura,, tuma’yok i kurason-hu put i minagof-hu sa’ putfin para u guaha sentron kottura gi Notte Islas Mariånas. Hunggan gaige este na sentro giya Luta, låo mudelu este para Saipan, Tinian yan i sangkattan na islas. Puede ha’ mana’fonyån i sentron kottura åntes di i komferensian PIBBA gi Huñio 2003 na såkkan ya ta estrena parehu ha’ i taotåo tåno’ yan i bisita. Ginen i setron kottura, siempre manhuyong i taotåo-ta, i manåmko’ i manhoben, parehu ha’ i manma’estra, manma’estro yan estodiånte siha para u ma na’annok i fina’tinas åntes, tåtkomu asiga, afok, titiyas fadang, manma’tinas tåli, månmafok guåfak, åla, guagua’, otro na fina’che’cho’ i kannai yan mås.

Guaha lameggai na prudukton i tano’ yan i taotåo tåno’ giya Luta, tåtkomu ayuyu, binådu, kamuti, suni, dågu, ‘jam’ påpåya, met ginen i abeha, ‘chips’ lemmai yan aga’, potu, pån chamorro, pån mames, påstet, amot, yan otro siha na tinanom, gå’ga, yan kosas. Mana’guaha lokkue’ kahita ni ma’emprenta i litråton islan Luta ya ma pasalista i prudukton i tano’ yan i taotåo tåno’ para u ma sahguan i pruduktu-ñiha para benta.

Manlisto yan manånimu ni ufisiåt yan membron PIBBA, CNMI Chapter, yan i siudidånon i Notte Islas Marianås manmanrekohi fondo para i prugråma, aktebidåt yan komferensian PIBBA. In seseyo’ i taotåo-ta siha na ta fana’ayuda desdi på’go para mo’na para ta pripåra hit para ta na’bonito yan gåtbo i hinanåo i komferensian PIBBA. In seseyo’ i taotåo-ta siha na ta fana’ayuda desdei på’go para mo’na para ta pripåra hit para ta na’bonito yan gåtbo i hinanåo i komfrensia giya Luta gi 2003 na såkkan. Fambolontårio manmampresenta gi i komferensia put båndan kotturå-ta parehu ha’ put i lengguåhi-ta, i hinengge-ta, i kostumbre-ta yan i fengkås-ta. Na’fanggeftåo hamyo nu i tiningo’-miyu, tiempon-miyu, sålåppe’-miyu, yan i guinahan-miyu. Nihi ya ta fandaña’ giya Belau på’go na såkkan yan Luta otro såkkan kosa ki ta na’fåmta mås i kotturå-ta. Mansuette-hit na tåotågues.

Biba PIBBA, biba tåotåo tåno’, biba prugråman bilingual, biba islas Notte Mariånas, yan biba Luta! Este ha’ para på’go asta otro simåna ta’lo. Adios.

The views expressed are strictly that of the author. Sablan is a Math teacher at the PSS Advanced Development Institute Program.