Haanen gupot yan i manmalañgo siha

Pago na semana, ha fitma si Governor Tenorio un` deklarasion pot manmalañgo siha ni guaha chetnot niha gi bandan kabesa. Ti minalago` niha i los probres este na estao hinemlo`, lao manfinatoigue sin konsentimenton niha.

Guaha gi entre este siha na taotaota esta 36-40 años deste ke mana` fañaga gi hospitat pot este na chinatsaga. Memegaiña ti amtiyon ya solu manera `nai siña tana` fan libiano i para tanae` siha mauleg yan disente na attension komo uno gi entre hita.

Dos attikulo muna` ñahlalañg sinientegho pot este na asunto: 1). Deste primet tetminoña si Governor Tenorio, ha asegura na `an matto este na haane, guaha fina` dinaña yan regalo para este na grupo yan lokue` i famaguon siha ni manginacha` manmalañgo gi haanen Christmas. 2). I kabesante depattamenton hinemlo` as Joseph Villagomez para u hatsaye este siha na mañeluta un` guma` gi Lower Navy Hill kosake siña u gosa inetnon yan siñienten familia diaramente.

Gi silensio na patte giya guaho, ha estotbayo` i konsiensian taotaota ni chumoneg ñaihon este siha na taotaogue komo mohon estrañghero ya ha abandona enteramente. Buente mafatto oran minahalañg niha gi ayo siha na fasu i hagas ha tuñgo antes, lao ni uno a`anog deste ke man-makuarentena 30 esta 40 años antes.

Pot taya` esta attemsion yan konkariño ginen familian niha, hafa` amigo i mediko, infetmera yan empleao hospitat ni munanae` siha attension diaramente.

Yangin magahet na man-antao hit na rasan taotao, maila` ta bisita tatte i hagas manmafanagueta komo kustumbren natibo i para ta attende i manmalañguta siha. Este na kutturan natibo gaige pisuña gi relihion Katoliko.

Hago mismo, guadog tatte konsiensiamo kao un` agradese yangin gaige hao guihe na estao ya ma-abandona hao taimano `nai un` abandona familiamo ni pumadese un` chetnot ni ni guiya mismo ti ha komprende? Estague` na eskalera `nai talilie` haye kabales antao na kilisyano.

Maseha tai guihe chinatsagan niha este siha na mañeluta, chamo nina` chachatsaga, bira hao guato un` rato maseha pot para un` bisita pago na haanen gupot siha. Maila` ta tayuyute puede u guaha lokue` dididi` konsuelo yan minagof gi korason niha pago na kompleaños i Ñiño Jesus.

•••

Matto un` asaguan kandidato mamamaisen botu gi un` guma`. Mamaisen i amko` haye malalago. Man oppe i prohima na i asaguaña. Ilegña i amko`: “Ke lao hafa ha falaguguye? Maulegña in` fañgeto osino guaha hu faum` sanotña ni panag bola”.

•••

Malago` si Duñg Malas umakamo`. Ha atotga kumonfisat un` Sabalo pot este na intension. Finaisen as pale` kuanto na Yuus guaha. Man-hasso, dispues ha batbaruye ya ilegña: “Dies!” Sinañgane as pale` na u sige estake ha danche i kuestion. I hiniyoñgña ha soda` si Iku. Ha faisen nu i mismo kuestion. Ineppe na “uno ha` na Yuus guaha Duñg”. Lalalo` ya ilegña: “Lache hao, hombre si pale` ti malago` ha aksepta i dies”.

•••

Finahane si Lusifet fax machine gi as San Pedro kosake u libiano checho` niha haye para u falag i lañget yan sasalaguan. Kumonfotme si Lusifet na para u apase si San Pedro tatte dispues. `Nai esta sais mesis, ni hoi` ni goi`, ti malago` si Lusifet manapase. Binisita papa` ya ilegña si San Pedro: “Lusifet, diberas, baiho batsala hao halom gi kotte ya un` mana` mutta”. Man-atan hulo` si Lusifet ya ilegña: “Ke lao mano `nai para un` fañgone` abugaomo?” Era, mangaige todo i abugao giya sasalaguan.