Hinanao 1998

Ta tutuhon i sakan 1998 yan un` namagof na okasion `nai mana` fan manhula` i nuebo na manma`gas Marianas gi todo atmos ramas gobietno.

Dispues de todo i felisitasion, ha tutuhon humomhum i tano` `nai ginacha` indukto gi finaton un` baba na sago, era i mafananaan` Asian Crisis.

Poduñg ensegidas i numeron bisita ya dañkulo na ha aminasa i primera industria guine. I numeron setbision batkon aire lokue` maribaha. Guaha 1,080 mas na bisnis manhinechom pettan niha piot ayo siha i sumupopotta i industrian turista.

Guaha siha rinibaha gi numeron ora para i empleao gi bandan hotel yan construction. Mientras tantos, manmangagagao ausilio i bisnis siha sa` mampos makat in kondision bisnis guine.

Umatotpe este yan `nos kuantos siha areglon lai ni mas ha lumos hinagoñg manbibisnis. Enlugat de u guaha ausilio, mas ta kayon chalan pot para ta ke puno` mas bisnis ginen este siha na chat-areglo. Manmalago` hit mas kontribusion tax para gaston setbision publiko lao gi mismo tiempo sige ta fuñot appottunidat adelanton salape` para i kahan Marianas. Ti umafagcha` dinisehata yan chat-areglo ni manmalagnos dispues.

Manmamaisen hit ayudo ginen i federat, lao mampos man-udu kulan mohon ha pupulan yan ha diseseha na ta sufa` i mattiñgan gi halom un` na`mañao na chubasko. Taya` mamamaila` ayudo ginen siha fuera ke i hagas ha petsige para u federalisa Marianas enteramente sin konsimienton i taotao tano`.

Mampos i chalan señgsoñg Marianas homhum ya sige ta taka` amano ta hananaogue. I kuestion: Kao para ta kontinua karerata gi halom homhum, totne un` achon para talie` hinanaota, osino tanañgga chagchag chatagmag ya umanana dididi` i chalan? Todo este siha na kuestion gaige gi patman i ta entrega nu i konfiansata gi todo disposision linahyan. Guaha konfiansiata na siña ha pipet hit huyoñg ginen este na hinemhum ya ta nanañgga disision niha pot este na asunto.

Anako` i karera, guaha esta manyayas, lamayot patte gi manatatte ti manseguro hafa mamamaila`, lao gi mismo tiempo mampos homhum i ta pokakate.

Uno ha` solu konsueluta: Deste 400 años antes, todo chinatsaga ta upos sin u funas i metgot na sensian natibo sumodae` chachalanña i didog na pinadese ni ha soda` gi kareraña mona. Este na sensian natibo lokue` solu fitme pisuña yangin enfin mandaña hit gi hilo kooperasion pot para ta satba i fumafana` hit na chinatsaga. Hita solu siña sumatba hafa problemata. Muñga hit sumede i otro na u fama` disision para hita nu i petmanente na guaddian este siha na islas. Maseha makat, maila` ta uma i kiluosta fehman sa` pot mantaotao hit na ti mamagtos i problema yan chinatsaga siha.

Ta gagao i Nanalibreta na u bendise hit todos gi hiniyoñg este na sakan ya u kayon lokue` i chalan ni ta pokakate kosake u guaha mas alibio gi hinalom 1999. Felis Año Nuebo!