Previous Story
Megai dibate tinahoñg aksion
|
Posted on Jan 07 1999
Mientras sige hit mandibaten hilo` aire, sige gi mismo tiempo i mas mandañkulo na kometsiante siha ma-annunsia seriosamente na mas para u poduñg yan chafleg i industrian turista guine. Hasan ta huñgog na`magof na mensahe sa` i ta añgoñgogho ginen Japon na areglo siha kaiha manmakomple.
I Continental Airlines ha annunsia na Micronesia yan Hawaii siempre u guaha tres pot siento (3%) maribahan numeron turista pago na sakan. I Tasi Tours, i mas dañkulo na kompanian Japon pot bakasion yan kumarera, ha annunsia lokue` na guaha dies pot siente (10%) mas menos i kinalamten bisnesña guine pago lokue` na sakan.
Gi hilo` este siha na mensahe, obligao na u guaha satton na pinetsige machachalane haf` taimano ta reskata i tetehnan na bisnis siha guine ni dumipepende siha gi kinalamten industrian turista. Mas klaro yan oppan pago na sin dididi` na ayudo gi hafa ginagao niniha, pues lamegai gi mansosobla siempre lokue` manpara manbisnis taimano i 1,080 mas na kometsiante ni humuchom pettan niha guine gi mapos na sakan.
Yangin ta sede mauleg yan antao na inatuñgo` maseha pot temporario na areglo estake u fan homlu` tatte este siha na bisnis, guaha konfiansia na siña ha suñgon i presente siha na mattiro ni ha fafana` pago. Lao gigon manpaosan ñaihon hit guine na obligasion, añgogho na siempre sumen atrasao i ayudo piot ya lamegai esta manmafondu guine na chubasko. Ha atisa este mas maribahan kontribusion tax ni nina` halom i manbibisnis siha guine na memegaiña humuchom esta pettan niha.
Alakuenta, ta guguot` gi halom patman kanaita un` pechon pajaro ni hita solu dumetetmina hafa futtunaña ennao na gatbon paluma. Yangin ta sotta, siempre libre gumupo ya ma-umenta ennao na pajaro. Yangin ta tiges, pues u matai gi halom kanaita sin probecho. Gaige este na pajaro gi dos patman kanai miyo, señores yan señoras. Si
Yuus Maase` yan ghilisow!
