Si Nana gi Familia

Hu nanae`, konrespeto, todos man-nana un` dañkulo na saludo `nai `in selebra i haanen miyo guine gi mapos na Dameñgo. Magahet na esta hana` fan suspipiros korasonta (piot ayo siha i esta manhanao nanan niha) `an ta bisita tatte i mames siha na finaposta yan ayo na palaoan i ta yaya`o nana.

Buente pot megai giya hita mampos man-hihot yan si nana na makat gi tutuhon ta aksepta na esta taigue soluke gi hechuran memorias. Kulan mohon gaige ha` gi hagas guma` na sumisiha yan si tata diaramente. Lao adumididie`, sige ta aksepta na enfin, esta ha diñgo hit.

Bastara ke si nanaho i fiet na amigaho yan haligegho gi oran chinatsagaho siha, esta hu diseseha mohon na u siña marepite finapos kada familia, piot ayo siha na ora `nai todos man-brabo yan fuetsudo. Lao ni uno lokue` siña tumulaika i naturat na pinegan i Nanalibreta na kada taotao mafañago, lumala` dispues matai. Na saonao lokue` guennao na lista i apas tax sa` ni uno u soplu ginen este na obligasion.

Uno sumen fitme na finanagueña si nanaho i espirituat osino obligasion relihion. Magahet na solu pisu ni mas fitme gi entalo` kantit yan hoyun linala` taotao. Lao gi uttimo besis, ayo solu konsuelumo na tronu i monhayan un` gagao gi Saina gi hechuran tinayuyotmo. Mafatto sensian hinimidde ni kumayon mona todo hinanaomo gi plaset linala`. Ya chamo nina` chachatsaga sa` todos para u pinadese maudai napu yan katma pareho ha` riko yan poble.

Todo si nana ha suñgon difirientes mattiro pot para una` fan dañkulo ham, 11 na lalahe yan tres na famalaoan. Para todo i minasapetmo nana, tatnai malefayo` tumayuyute hao diaramente gi kareraho para i checho` kada o`gaan`. Solu este nina` siñaho gi relasionta pago komo sinantusan yan espirito hao pago nanaho. Si Yuus Maase`!

I añkla gi linalata

Kada taotao ha espiha añgoghuyon na añkla pot para u fitme yan libre kumalamten diaramente maseha mano `nai u gaige. Guaha gumoddegue` gi fuetsan haye atuñgo`ña, i pumalo gi fiñkas niha, i tetehnan ha pega haanen niha fiet gi Nanalibreta.

Gi todo karerata, deste haanen manfañaguta estake u ta fan echo taotao, sige ta espiha ayo na añkla i fitme yan añgoghuyon. I famaguonta lokue` siha mismo umespihan maisa siha lao todo kinalamten niha gaige na hita ni mañainan niha i primera espehos. Pot este na rason na manmamah`yao sa` ha nesessita manmafanue` un` fitme na añkla.

Ti todo manmafañago yan fiñkas, lao ni uno machoma` fumachuchue` yan muna` sahñge gi un` banda para `an u fatto didog na oran chinatsaga. Mampos gueko yangin para ta añgogho fuetsan atuñgo` sa` naturat na siempre un` machanda piot `nai ti ha nesessita esta setbisiomo. Lao pega haanimo gi Nanalibreta fehman ya un` petsige i guinifimo sa` adumidide` siempre u anog i regalo ni un` gagagao gi Saina. Ti un` riko osino sen poble lao homlu` kareramo gi hilo` gasgas na plaset.

Pot chaleg: Ha faisenyo` i lahiho kao magahet na sumen maipe iya sasalaguan. Hu oppe “hungan”. Ayo mina` munana` sahñgeyo` salape` para baiho famahan air-condition pot siakasso na matanchue`yo` nu i chalan iya papa`. A` Saina!

Strictly a personal view. John S. DelRosario Jr. is publisher of Saipan Tribune