Mattiron chinatsaga

Mensahe pot mahuchom 2,000 mas na bisnis guine deste dos años malofan matto gi ha rebaha dimasiao i pottamonedan iya Marianas. Gi mismo tiempo, i nesessidat publiko pareho ha` pot setbisio yan appottunidat chochu` mas ma-umenta. Problema este para i taotaota espesiatmente i famaguonta ni para u fan magradua pago na sakan. Guaha mas ke 300 este siha na grupon estudiante.

Kulan mohon i kliman ekonomia ti mautaika, duro lokue` i lehislatura de ha bohao areglamiento siha ni ti mankombene gi esta ha` malañgo na kinalamten komunidan bisnis guine. Ma-atotga pumega mas disareglao na chat-areglo sin kabales na inina kao bintaha para i kanaha` pumupuno` siha komo kometsiante para u fan mamatinas ganansia ya gi mismo tiempo u fan man-apase kontribusion tax.

Este siha na chat-areglo mandidog na fatso `nai gi mismo tiempo ha guadog naftan lamegai na natibo ni man-e`echochu` pago para u kubre linala` familian niha. Lastima todo i animo `nai ta espihaye manera i taotaota manmanhatsa fitme na fanliheñg familia lao gi mismo sakudida to chaba` appottunidat niha sumudae` apas primet gima` familia. Alakuenta, todo i ta guiguife pot ayudo yan alibio gi taotaota hita yumamag man-antao na areglo pot chatkonsiderasion osino man-losgun hit gi primera obligasion komo offisiat publiko.

Mientras i komunidan bisnis sige ha utot papa` operasion niha `nai esta ti mañgoñgone` nuebo na empleao, taya` lokue` appottunidat chochu` gi bandan gobietno sa` mas menos i fiñkas (salape`) gi kahan publiko. Dios miho esta na` fugo i mamamaila` na eskaleran chinatsaga para megai gi famaguonta yan taotaota siha. Esta na` fatigao i manera `nai madispacha `nos kuantos manmaseñala komo areglo lao poduñg gi hechuran disareglo gi uttimo besis.

Estague` `nai ha pega i futuron famaguonta este siha na chat-areglo. Para hafa ta fan hanao chago`, afañielos. Dalai ya makat makomprende nu i lehislatura na i sisteman gobietnamento guine yan maseha mano, ni unabes `nai maintended para u famatinas ganansia gi uttimon i sakan. Gaige este na fuñgsion gi bandan bisnis (praibet) sa` estegue` primera besis offision kometsiante. Yangin mamatinas ganansia, dañkulo na bintaha para i kahan publiko. `Nai dimalas, pues didog na chinatsaga para todo i offresimienton ma-adelantan setbision publiko.

I Punto: Yangin i gobietnota ha sosoda` fiñkas ginen i kontribusion komunidan bisnis guine, hafa na sige ha` ta dagaoye basula i chalan kometsiante siha? Manmalago` hit kantida na kontribusion tax ginen i manbibisnis lao gi mismo tiempo ta guadudughe hoyu para mismo enteron niha? Dañkulo na ti umafagcha` dinisehata yan intensionta. Kada mansige hit mona, duro hit talo tatte sa` lache i batidan lai ni ta apprueba. Dios miho!

Mas este siha na chatchecho` ha afuetsas i botadot para u husga haye dipotsihe man-antao yan edukao gi disposision checho` linahyan. Taigue (fuere de `nos kuantos) este na kualidat kabayeros gi presente na membron lehislatura. Man-ñañu` osino manyayas esta gi offision niha kulan un` guaguantes ni esta mananayuhot na ti umadandan mohon i uttimo kampana. Manfatigao, manchatmata, taigue i sinsero na interes i publiko gi korason niha. Husga mauleg na biahe. Si Yuus Maase`!