Pot grasia na biahe
Malag i bañko un` Indian para u ayao kiñientos pesos ($500) `nai sige kuenestoñia nu i loan officer. `Nai matto i dos gi bandan collateral–propiadat ni siña mana` testigo kontra i kantida ni un` a`ayao–finaisen i Indian hafa na propiadatña guaha ni pareho baliña yan i salape` ni para u ayao.
Man-atan huyoñg i Indian ya ha tancho` i karetaña 1956 na Chevy pick-up. Humuyoñg i bankero ya ha katkula balin in kareta. Humalom ya ilegña kase balin $56 pesos i pick-up truck. Ha faisen i Indian kao guaha otro propiadatña chumiloñg yan i ha a`ayao na kantidan salape`.
Ineppe “Señor, guaha ga`ho un` bihu na kabayo. Buente siña lokue` unna` saonao komo kuenta kontra i hu a`ayao na $500. Uttimoña ilegña i bañkero na para umakonsige i inayao i prohimo ya u pega konfiansaña gi hilo` fiet yan inañgogho. Konfotme i applikante Indian. Manae` nu i inayayaoña ya mapos para iya siha.
Sigiente ogaan matto tatte gi bañko `nai umafagcha` yan i bañkero. Finaisen hafa finatoña na biahe. Ilegña i Indian na para u apase tatte todo i dibiña. Matman un` rato i bañkero ya ha faisen i prohimo kao ti ha nesessita i ha inayaoña na salape`.
Man-oppe i Indian na “gi paiñge man-ganayo` `nos kuantos miyon pesos gi casino” ayo na para una` empas dibiña mientras sisiña. Sinañgane nu i bañkero na buente mas mauleg yangin ha diposita i salapeña `nos kuantos miyon gi bañko ya u fanlagnos `nai matto oran nesessidat.
Ineppe tatte nu i Indian: “Bueno, lao hafa señor para iyomo collateral?” A` Saina!
****
Hu lie` un` amiguho kumakasao gi menan naftan mañainaña. Hana` mahalañgyo` lokue` `nai hu konsidedera i mañainaho `nai man-brarabo ya sesso ham mandaña` gi gualo`. Hu nañgan ñaihon para u kayada antes de baiho konbetsasione i amiguho.
`Nai ha birague` para u hanao, hu tagam ya umanae` ham felisitasion. Ha kenana` i pinitiña lao hu atotga fumaisen hafa na kulan agaga` mataña. Bastara ke pareho ham petbeso, ha oppeyo` “Ahe, Iku, hu fafaisen i mañainaho para bai` mapoluluye sitiogho gi fihon niha maseha manhanao ya ti mapatteyo` dididi` nu i fiñkas niha”.
Duron chaleg dispues `nai sige in` sañgan pot geran tano gi halom familia lao tat mas asegurao na pattidan tano` ke simenteyo. A` Saina!
****
Guaha fino` famaguon na kada masañgan hana` hassoyo` na esta ti pareho fuetsagho yan `nai mas hobenyo`. Era, hu atrebiyo` manlofan acho` ayuyu para bai`n na` bula i maprepapara na pisun guma`.
Dos tres biahe gi halom titiñgtiñg na somnag hu tutuhon mañotsot nu i embelikeruho. Ai, hu tutuhon manlie` `streyas pution gi papa` ma`lag na somnag. Mauleg na guaha eskusuho malago kadu` para baiho fan litrato gi plasan bola. Hu tulosyo` papa` San Vicente lao era humahnanaoyo` para iya hame.
Ai dios miho na pinite tataotaoho `nai manana si Yuus gi sigiente ogaan . Hu sañganen maisayo` “tata`lo ha` `nai mama` paire”. Magahet na ti pinareho antes yan `nai esta ta gacha` 50 años. Gaigeyo` pago gi tropan para man-ñgaha` hulo` gi Saina kada pagpag koyenturan tatalo`ho osino timogho. A` Saina!
****
Yangin mampos hit mayaye sa` ma-otdin hit nu i mediko para ta ribaha librata, mañguentos i man-atuñgo kao malañgo hao, dispues masoyo` `hao bumoka. Gi mismo sakudida, `an mampos hit yomug, mañguentos na debi ta ribaha librata osino manbatso hit yan chetnot korason. Taya` ganata gi katkuet sakudida yangin para ta ekuñgog abison ti man-mediko siha. A` Saina!
