Teug` na probleman natibo
Man-matto hit guihe na eskalera `nai i linala`ta sumen chatsaga ya gumuaha tiempo umina osino umebalua hafa fattata dispues de bibo na fandañgo, `nai duro i baila yan a`gañg na dandan, machuchuda maneska ya todo manbulacho, lao ni uno rumikonose kao ma`adahe i sesebla na neñgkano` ni linachai nu i galagon bisino.
Manmatmata hit gi sigiente o`gaan `nai todo katma sa` hagas manhanao i bisita. Dispues `nai ta ripapara na bula daño pot diskuiduta mismo sa` hana` fan bachet hit i bibon fandañgo gi paiñge. Guiya este na tiempo i tiempon abundansia gi uttimon ochenta siha na sakan `nai mampos chadeg i kinalamten i tano`.
Guiya ayo na tiempo `nai lamegai familia man-suette gi atkilon tano` `nai machuchuda i pottamonedan niha. Memegaiña magasta gi asunton latga ke nesessidat. `Nos kuantos ha` umadahe fiñkas niha. Lamayot patte esta hokog i suetten niha ya mana`lo tatte gi hagas offision niha. Sumen na` triste na finapos diskuido.
Matto gi ta gacha` ayo na eskalera `nai esta tita prepararaye chochu` i taotao tano`. Mas hit man-hinalulula umestablese chochu` para taotao hiyoñg. Todo sunidon planon futuron famaguonta uttimoña disintunao sa` ta sede otro sunido ni estrañghero kontra i tradision yan kutturan natibon este siha na islas.
Diberas, este i tiempon eskases `nai didog chinatsagan kinalamtenta gi pisuon ekonomia kulan mohon bendision ginen i Saina `nai ha sede hit man-deskanso pot unrato para ta talon kumonsidera amana sesso `nai ta diskuida hit. Huñgan, bula adelanto fumatoigue hit lao i primero kuestion: Kao magahet na ennao na adelanto ha atbansa i kualidat linala` taotao tano`? Malago` ha` yo` umoppe “huñgan” lao i linie`ho gi kualidat linala` natibo mampos chago` yan i man-sañgan na “adelanto”.
Pot ihemplo: Yangin ta ebalua i industrian turista, hagas mana` fanhuyoñg i natibo pattsipasion niha ni Japones osino maseha haye ni manhatsa hotel guine siha na islas. I petmanente na pattisipasion mana` suha ya siha pago gumulususune i ganansia. Huñgan guaha siha chochu` guine na industria para `nos kuantos taotao tano`.
Lao i kakatneña gi hechuran ganansia hagas man-madispacha i natibo! Lastima sa` sesso tafa` fagas pachotta na i industrian turista i primera industria ni sumustetene i ekonomian Marianas.
Diskuiduta ha` lokue` na mampos megai taotao hiyoñg guine achogha` ti presiso na u guaha taiguine na numeron empleao ginen hiyoñg. I masusesede pago `nai chumatsaga i pisuon ekonomiata, megai mana` fan basta taotao hiyoñg gi checho` niha, lao lamayot patte esta pago mangagaige ha` gi tano` sa` matuñgo` na taya` chochu` gi tano` niha.
`Nai fatso i Depattamenton Labor and Immigration umatetuye umasegura na ha bira siha tatte este na empleao gi tano` niha, mañaga ya sige man-e-suette chochu` maseha mano `nai guaha bakante. Dos masusede guine: 1). Esta ti ligat este siha na empleao hiyoñg. 2). Ha choma` i famaguon natibo manmachochu` sa` megai besis ni matampe i ti ligat na kondision `nai manmachochochu` este siha na taotague.
Afañielos, presiso na u guaha satton na dinaña entalo` natibo para u husga i kompas kualidat linalata antes de u mahuchom i pettan pago na siglu. Yangin ti ta aregla este siha na diskuido, kada rato ha` siempre ta repite i mismo linache gi mamamaila` na siglu. Pago i oran mañgorihe kulan un` prohimo ni brabo. Chamo nanañga na estake esta atalag `nai para un kone` para i hospitat. Si Yuus Maase`!
