Sagon politika

Matto talo i tiempon politika `nai todo gumiguife puesto gi gima` lehislatura ha tutuhon lumasgue atmas niha. Guaha ha` esta kalagtos macheten niha ya taya` ha nessesita solu dididi` na lamse. Lamayot, man-ñañu` padarao niha ya debi u guasa` osino chumaleg i tañgantañgan. Guaha lokue` ni kuanto na lamse, magpo` ha` i huegon man-dismonta ya ti u kalagtos macheten niha.

Guiya este na tiempo (para i man-malalago) `nai kulan mohon para un` famaisen saina ya sumen presiso na unna` humidde hao antes de un` halom gi gima` nobiamo. Estague` na patte gi 30 años deste ke hu komprende huegon politika i mas ti umafagcha` yan hineñgegho petsonat. Todo i tiempo gaige gi korasonho na yangin un` hoñgge na hu na` siña i checho`, pues nae`yo` nu i botumo sin insutto.

Buente este layeye na rason na ni unabes `nai hu guife malago para offisinan publiko. Taya` pinasensiagho rumibirensia kustumbren muñero gi halom botadot. Piot ayo siha i fuma` offisio manmangagao `nos pot nesessidat, lao pot bisiu. Ai na nimase` i kandidato sa` kontodo kinano` familiaña malachaiguan sin minalagoña.

Dispues, mafañagoyo` yan un` fasu na sumen na`bubu. Lao naturat na fasu na ni guaho mismo tatnai hu repara estake sesso mana` hassoyo` nu i man-atuñgo kao hayuho fasun matatñga. Guaha `nai hu chule` espehos ya hu atan maisayo` kao magahet i mansañgan. Ai, diberas, estague` manai`ho.

Hu chage kumetulaika. Era, `an sigeyo` para i checho`, hu atan mataho gi espehos santatte ya sigeyo` chumaleg. Hu utot ensegidas `nai hu repara na siempre guaha kumuentos kao fafatyo` esta pot hu chatgen mamaisayo` mismo gi halom karetaho. Dios miho. Dialo polu i attifisio na atileg fasu sa` ti siña na bai` chachaleg `nai naturat manai`ho ginen i Saina.

Estegue` na tiempo `nai manchatgon todos kandidato gi fina` tablon gi hilo` troñko siha gi entero soñgsoñg. Didog na somnag osino fotte na uchan ma`addi, dios miho mañachaleg 48 oras gi haane. Ai na man-minesñgon mañaleg gi entalo` katma yan mattiempo. Dispues, man-lean` gi todo bautismo, fandañgo, fina` matai, finagpo` nobenan patron soñgsoñg yan kontodo kompleaños primet nifen neni. Estegue` na tiempo `nai mauleg gai checho` familia sa` todo umusune mañaonao gi chenchule` yan ayudon materiat. Guaha `nai megaiña kandidato ke man-bibota. Ai, namase` i kandidato ni ti rumepara i huego gi halom este na rimulino.

`Nai matufoñg i uttimo balotu, mesklao i sentimenton kandidato siha gi entalo` chaleg yan lago` sa` guaha man-suette yan dimalas. Para i fumatinas, mañge` na haanen gupot deste Nobiembre esta i Año Nuebo. I man-dimalas, ha tutuhon humoflag iridao niha ya sige ma-estudiaye amano `nai man-lotgun siha. Dididi` atrasao lao tanae` felisitasion pot todo i animon niha.

Lao esta pago ti hu komprerende hafa na lamegai gi man-malalago para pueston publiko diberas ti man-kapas para i offisio ni ha petsisige. Dispensayo` nu este na sentimentogho, lao diberas mauleg in` ebalua kabales kao para tafanaiguiguine ha`. Atetuye kabales sa` i botumo pot futuron famaguonmo. Sen mas, si Yuus maase`!