Kinalamten Natibo

Sesso hu rikonose i potsun kinalamten natibo gi halom tano` didog na chinatsaga ni fumatoigue hit deste dos años malofan. Huñgan guaha chinatsaga lao megai besis ni ta tampen ñaihon gi hechuran chaleg gi hilo` grasiosu na dinaña familia.

I dañkulo na estotbu i ti tuñguon` kuanto mas para u aminasa hit este na baban sagon ekonomia ginen Japon yan Asia. I kuestion: Kao esta matto papa` gi fondu i ta padedese pago yan añgaian `nai siña u lalibiano hinagoñgta.

I mamakatña gaige na ginen hiyoñg este na sago. Gi mismo tiempo ta diseseha na u nalo tatte i poduñg na ekonomian Japon yan Asia puede ta tutuhon talo umaregla tatte linala`ta. Siña ha` ti pareho yan antes gi sakan ochenta (80) siha na tiempo, lao potlimenos guaha kampo para ta adelanta dinuebo linala`ta.

Para todo i mattiro, `nai hulie` kantidan taotao mañaonao gi selebrasion 4 de Julio (gi mapos na Dameñgo), ha hatsa dididi` magof na sentimento guiya guaho sa` manhuyoñg hit pot para ta lipa dididi` i chinatsagata. Todo klasen fasu hu lie` guiennao na haane deste atuñgo` esta estrañghero osino bisita. Todo bumatbaruye i maipen somnag gi selebrasion ferian pago na sakan.

Dispues de papag fireworks giya Garapan gi pupueñgen Dameñgo, ta bira hit tatte gi gima` para ta rikonose hafa mas na koyentura `nai siña ta soda` mantension famliata. Guaha duro man-peskan tase yan tano`. Lamegai lokue` bimira siha tatte gi gualo` ya duro man-mananom aguon haya, golai yan gulusina; kontodo pinegsai gaga`.
Sumen mauleg na offisio para i baban i tiempo. Na`magof na offision adelanto pot para ta katsu dididi` i nesessidat familiata.

Maseha taiguine pinadesisita, dañkulo konfiansagho na sobla de siña ta atetuye kumayon mas yano na chalan para i manatatte. Gi halom este siha na mattiro, maila` tafan aguot` kanai uno yan otro ya ta konsige pumetsige gi hilo` satton na inadahe hafa mas kombene para todos. Si Yuus` Maase` yan ghilisow!

Gi halom silensio

Megai besis na gigon guaha chansagho hu tulus-yo` hulo` gi gualo Tagpochau pot para bai` fan desmonta gi entalo` choda yan sune. `Nai machom i atdao gi sanlago, matachoñg ñaihon-yo` dumeskansa antes de baiho birayo` tatte gi gima`.

Sige dispues hu huñgog difirientes katen paluma gi hilo` troñko, entalo` tinanom yan gi aire. Esta na` fugo este siha na sunidon paluma sa` ti sesso hu huñgog gi señgsoñg. `Nai gumupo dos a`paka` na paluman chuñge` gi hilo`ho, sige hu faisen maisayo` hafa na ti ayo na paluma mohon madesigna komo paluman Marianas.

Tatkilo gi aire `an gumupo ya siña halie` mas ke otro siha na paluma ni bumebeste i lañget iya Marianas. Hu dispacha sa` esta ma-deklara i totut komo offisiat na paluman Marianas. `Nai hu birayo`, pagpag i paken Benjamin, poduñg un` boniton paluma ya duro i lahen mame yan man-primuña siha mana`yog sa` enfin makone` i hagas makahati na totut. A` Saina!

****

Estaba un` pilotu, si pale`, un` patgon eskuela yan un` abugao gi dikiki` na ruplano para iya Tinian. Gi entalo` i dos tano`, prumublema i makinan ruplano. Tres ha` na raka` guaha. Ha hakot i pilotu i primet raka` ya ha yute`-gue`.

Ilegña i abugao, baiho chule` i sigundo raka` sa` malate`ña-yo` ke hamyo. Sin ditension ha pega gi tatalo`ña ya ha yute`-gue`.

Uma-a`tan si pale yan i estudiante `nai ilegña i patgon, konsige pale` sa` lamegai na taotao para unna` fan libre. Ineppe as pale` “muñga sa` mampos hoben i patgon ya debi un lie` hafa lina`la`.”

Ilegña i patgon: “Konsige pale` sa` guaha dos sosobla na raka`. Chamo lilihan sa` ha chule` i malate` na abugao iyogho school bag”. A` Saina i malate`!