Kuttura yan tradision natibo

Mientras sige-yo` lumiliko` gi mapos na semana man-litrato para i gaseta, matto-yo` gi `nos kuantos kanton tase `nai sesso antes hu dalag i tatan tata-ho tumalaya. Kulan matto mahalañgho gi ayo siha na man-mako`ta i sesso hu lie` gi kanton tase man-peskan talaya, chenchulo yan panag.

Guaha ha` hu lilie` man-talalaya osino panag gi entre taotaota. Lao guaha ha` lokue` taotao hiyoñg bumenefifisia i minan tasita pareho ha` santatte yan sanmena. Los dimas, nuebo na talayero umokukupa este siha na unai gi sanmena. Man-mau`udai gi dikiki` na layag (windsurfing) osino jetskis. Gi todo dos aktibidat, piot i segundo, matto gi ha estraña sagan guihan sanhalom gi katkuet manera.

Gi kustumbreta, man-hanao manpeskan tase i lalahe para fina` gupot deste fandañgo, fiesta yan lokue` fina` matai. Sensian komunida este na offisio gi kustumbren yan kutturan tano`. Ha gomgum korasonho sa` esta pago este na tradision mapraktitika gi halom man-hoben natibo siha. Estague` un` kustumbre ni sumepara natibo yan bisita i uson minan tase para nesessidat familia osino komunida.

Sumen namagof sa` esta si Congressman Heinz Hofschneider ha tutuhon un` inestudia pot konsetbasion guihan sanhalom guine. Este na estudio esta monhayan ya gaige pago na matranslalada guato gi un` propositon lai. Siempre u guaha mas fitme na areglo pot peska piot gi oriyan Mañagaha. Gi uttimo besis, i mapropopone na lai siempre u sede i guihan sanhalom mumamta` gi naturat na sagan fañadaan` guihan gi halom koraliñg. Mas menos i estotbun boti siha gi halom lagunan Saipan.

Buente naturat gi adelanton industrian turista i para u atkila i mas man-mauleg na pidason tano` gi sanmena` na patte gi maseha mano `nai ha hatsa fasilidat niha. Sumen bonito na intension sa` mana` fañaonao i taotao tano` gi bisnis. Lao dispues mana` fañuha `nai mababa i puetton Marianas para maseha haye na kometsiante gi 1977. Hokog mames para pattisipasion natibon este siha na islas gi bisnis yan industrian turista.

Ayo siha na disision i machoneg huyoñg pattisipasion natibo mampos ha estrañayo` petsonat sa` humuyoñg ha fanue` hit este siha na taotague hafa dipotsihe prefekto kulot niha kontra taotao tano`. Lao buente pot ti oppan este siha na linao gi disision machandan natibo gi kompania siha na silension yan humidde i taotao tano` deste ayo na tiempo. Dañkulo na sakrifisio ta naen` ñaihon pot pattisipasion natibo, kontodo hagas sagan guihan siha gi sanmena. Mauleg sa` guaha proposito para uma-aregla tatte i daño siha gi sagan guihan sanhalom.

Sumen presiso este na areglo sa` achogha` u basnag i industrian turista, mañochu i natibo un` riko na sentada `nai bula totchen guihan yan otro siha benefisio ginen i tasen Saipan. Dispues, taya` mas fitme na ekonomia ke makosechan guinahan tano` ginen i tase. Mauleg i industrian turista gi tiempon abundansia, lao na basnag, maulegña kinisechan guihan gi laguna ke hafa na atte para i man-natibo siha.

Para hafa ta fan chago`: `Nai basnag i industrian turista guine dos años malofan, tat bisnis ni sumasaonao guine na banda gi ekonomia ti inestraña. Mas ke dos mit (2,000) na bisnis mahuchom pettan niha. Ya maseha u na`lo tatte homlu` este na industria, ni ñgaian` u pareho kinalamten taimano i hagas ta lilie` guine. Matto i tiempo `nai debi ta planuye hafa malago`ta nu este na industria gi primet patte gi otro siglu. Si Yuus Maase` yan ghilisow!