Mababan eskuela na sakan

Mababa entero eskuelan publiko nigap na haane. Ayo-yo` pumañgon i magof na eslao famaguon ni manmamomokat para i eskuelan Umañg giya Koblerville.

`Nai sumugo`yo` dispues, guaha un` namagof na mensahe gi fina` magago `nai i manmaestra yan maestra ha nanae` famaguon bien felis gi nuebo na sakan eskuela.

Mientras sige famaguon ha espiha propio maestran yan kuatton niha, manma`lag yan fresko matan niha sa` man-alie` talo yan gachoñg niha dispues de tres mesis na bakasion.

Seguroyo` na kada saina lokue` hagas muna` sahñge salape para magagon yan trastes eskuela siha. Dididi` makat na biahe pot abarambao mampos i ekonomiata. Lao enfin todo munae` animo pot para uma-asegura felis na tinituhon gi estudion famaguon niha.
****

Hu diseseha na kada saina una` guaha tiempoña umatetuye kinalamten famaguon niha gi bandan estudio pago na sakan. Presiso este na punto gi patgon, piot `nai un` pipetgue` gi halom chinatsagaña pot para unna` fan lie` manana ya u konsige pumetsige estudiuña.

Muñga manamapot i timapot guine na patte gi obligasionta komo saina. Kumke ilegho na yangin siña un` rikonose i haguan gaselina gi karetamo, pues debi un` gai tiempo rumikonose hinanao patgonmo gi eskuela yan todo aktibidatña deste halom guma` huyoñg esta i komunida.
****

Rason na hu tuka este na asunto pago na biahe sa` megai besis na i mañaina ha sotta responsablidat niha guato gi muchacha yan maestron eskuela. Kulan mohon siha este na los probes i mañainan famaguon niha.

Esta ti hoñgiyon un` saina para u faisen i maestro (coach) na u kokone guato gi gima` niha i patgon dispues de finagpo` praktis bola. Esta hu birayo` para baiho ekuñgog kabales kao magahet i hiniñgogho. Dios miho, lao haye gai patgon i finañagumo?
****

I patgon yangin un` trata komo mauleg na gachoñgmo (buddy), esta i konfiansaña ma-adelanta ya inekuñgog hao gi todo fino`mo. Guiya mismo ansia muna` mauleg-gue` sa` ha tuñgo` na un` pinitiye-gue`. Piot ya todo otro dinisehaña (fuera de nesessidat) un` fanague na debi u fachuchue`. Yangin esta este na maña un` establese giya guiya, ti un` chat-hinasso kao u famacha propiadat otro sa` guiya mismo ha atetuye fumachuchue` otro siha minalagoña.

Komplikao i patgon na finañago sa` taotao ya hago solu nu i saina siña gumachuñge yan umapagat sa` trabiha gada` i prohimo. Hombre masetan gagu siña ta dobla gi malago`ta. Siña este ta chogue (gi bandan finana`-gue) gi famaguonta siha. Hafa un` finague i patgonmo siempre u anog komo espehosmo mismo gi publiko. Kreansa mauleg sa` minalago`mo na u gaige ennao na patgon guine. Pasensiaye lokue` sa` taotao ennao na finañago.
****

Tinetpe tiempon uchan i mababan eskuela siha. Na guaha inadahe kontra masmai yan fugo kosake ti u fan sinago i famaguonta siha.
****

Baiho huchom este na biahe yan ginagao tinayuyot para i dos maestragho gi primet grado ni dumiñgo hit pago na sakan, era si defunta Margarita Muna Igitol yan Mako` Sonoda Sizemore. Ta diseseha na u felis kareran niha gi parahison i Saina. Si Yuus Maase` yan ghilisow!