Man-natata na satbasion asunton linahyan
Kada sakan, deste 30 años antes, ta huñgog i man-ma`gasta mañguentos pot impottansian edukasion para i famaguonta. Kada matto i mes Juñio, i kombidao na offisiat publiko kumuentos gi fina` seremoñas (graduation exercise) pot todo i animon famaguonta ya ha soyu` todos na u petsige edukasion niha koleho.
`Nai ha diñgo i kampon eskuela guihe na taloane, guaha `nos kuantos ensegidas man-hanao para unibersidat yan koleho giya Guam, Hawaii yan Amerika. Mayoria guihe na grupo mañagaha` guine para u apprubecha man-machochu` mientras man-eskuekuela koleho gi Northern Marianas College.
Hanae` animo i mangaige guine man-echochu` pot para u fan eyag fotmat na offisio. Lao i ineyag niha este siha na famaguon tinahoñg para i klasen chochu` ni ha soda` mientras man-eskuekuela. Mas makat este na problema para ayo siha i ti muna` fonhayan eskuelan niha high school.
Gi maseha hafa na chochu`, debi kada empleao u tuñgo` manaita fino` English, mañgge` yan fumino` English gi disente na eskalera. Yangin kontento i empleao natibo maigo` kulan mantikan fritadan guaka, era taya` dinisehaña u-matbansague` gi offisioña, pues buente ti sen presiso ineyag manaita yan tuge` fino` English para guiya.
Lao ti propio na un` abiba sensian mañana sa` un` dia siña ha` gumai familia hao ya ti para un` sasaga ha` gi $3.05 gi ora piot ya guaha esta linilesmo ni debi un` suppotta estake man-huyoñg ginen kanaimo.
Mientras tantos, esta guaha mas ke bente (20) años deste ke mañguentos hit pot appottunidat chochu` para i natibo. Kada katan, luchan. Lao taya` fotmat na areglo haf` taimano para ta satba nesessidat taotaota man-eyag offisio `nai siña ha soda` lokue` hinagoñg niha dispues. Kada ahensia osino lehislatura yan administrasion kumakanta sahñge na sunido lao todo pareho palabra. Mampos mueye` i pisu `nai manotohge hit.
Kada dia ni ta yute` man-esalao pot chochu` para i taotaota, mas ma-umenta i numeron natibo ni munesessita chochu`. Man-tinane` hit nu i tai sustansia na speech siha kulan mohon fabulas des chispas solu satbasion este na chinatsaga. Pot fabot maila` ta tulaika este na maña sa` klaro pago na hagas ta letke i sustansiao siha na checho` linahyan.
Pot para ta tutuhon fotmat sumatba este na chinatsaga gi man-ansia man-machochu` na taotao-ta, presiso na ensegidas u guaha dinaña gi entalo` PSS, NMC, lehislatura, administrasion yan i komunidan bisnis para uma-identifika hafa sesso i probleman natibo siha yan haf` namanera `nai siña ta ayuda siha gi bandan programa pumetsige fitme na ineyag para satbasion niha mismo.
Esta ta prueba na mauleg na programa i mafotma antes pot infetmera yan maestro siha. Ti baba yangin ta ina kao benefisioso ma-ekstende mismo programa para otro siha na offisio. Maila` tana` fan daña hinassota yan kinimite pot para ta ayuda taotaota u-matbansan maisa siha ginen edukasion yan mauleg na programan ineyag offisioi siha. Si Yuus Maase`!
****
Hu dage i amiguho na duro dinisfrutague` as fulano. Ensegidas kahulo` i aguhan metbiosña ya mamaisen: “Haye sumañgan ennao?” Ilegho, “Ai, pago ha` hu sañgañgane hao!” A` Saina!
