Desision publiko gi eleksion lehislatura

Monhayan i publiko ha manifesta disisionña haye para i membron mina` 12 na kuetpon lehislatura deste Luta, Tinian yan Saipan. Este na disision ginen i publiko ya seguroyo` na guaha siha na patte `nai ti umafagcha` yan personat na diniseha. Lao estague` i naturatña eleksion offisiat publiko gi kada dos años.

Megai manhineñgañg ni resuttan pilean i Senate ginen Saipan `nai ginana si Senator Juan P. Tenorio (Morgen) as Ramon S. Guerrero (Kumoi). Kontodo guaho lache `nai hu garentia na humalom ha` tatte si Morgen sin hafa na ditension. Esta pago ti hu komprerende taimano madoblaña i resutta. Lao buente ta polu komo i chinatsaga ha tutuhongue` gi halom familia `nai umatoñgtuñg duro i dos hihot na primo. Ti bonito na finapos lao estague` disision i mayotmente na botadot.

I Precinct Numero Uno kalan dinanche linao `nai plaset Republican madisgrana ya poduñg kuatro gi sais na kandidatuña. Tinilaika nu i tres nuebo ginen i Democratic Party ya pottodo, kuatro na Democrats manhalom.

Este na sinisede klaro na esta i tiempon Republican gi sanlichan na patte giya Saipan hihot para mahuchom lebloña. Gi sakan 2001, kanaha` todo i sais na siya siempre u chinile` nu i Democratic Party. Didog machalaponña i Replublican ya kikidi ha rekohe tatte i mafag plato.

Siña ha` ti konfotme hao (yangin enfin Republican pattidamo) lao maila` ta analisa i fakto ni malagnos guine gi mapos na Sabalo. Gi halom 16 (17 nu i kandidaton Senate) kanaha` lamita gi halom i tropa manbasnag osino ti fumatinas tatte. Guaha ha` dos na nuebo ni sumustene i mayoria para i Republican Party, lao dañkulo na señat na i publiko guaha diniskontentoña na biahe. Sumasaonao lokue` i ma-abiban sensian imbidio yan traision gi tropan Republican ya pot este na rason na lamayot patte gi kandidatuña gi sanlichan manbasnag. Kumeke ilegho checho sanhalom i masusede.

Esta i plato mafag ya machalapon gi hilo` satge. Tinaka` mas ke dos años estake u fonhayan marikohe i pidaso siha. I para una` chetton tatte i madisgrana na plato debi u guaha fina` milagro. Lao ta tuñgo` ha` na taya` masusesede milagro gi huegon politika. I disision mafatto ginen i botadot osino publiko hinerat.

Mientras tantos, esta i Democrats ha tutuhon chumule` tatte i hagas tano`ña gi sanlichan na patte giya Saipan. Estake para una` fonhayan kumayon tatte i plaset ganadot, siempre u listo fumana` maseha haye na kontrario gi estrakadan eleksion gobietno gi sakan 2001. Ala kuenta, gaige i Republican guihe na estao i kada ha tulosgue` para u famauleg i haligen yan pisun dinaña, ha totpe potlilu ya lotgun. Mampos gueko i pisu. Ni halige ni manatacho gi oriyan ennao na pisu ti siña sinestene.

Todo pot todo i publiko hana` klaro yan oppan hafa sentimentoña guine gi alacha na eleksion. Ni uno siña kumontesta sa estague` dinisehan yan mandaton i botadot. Mampos bula sablen traision gi halom i tropan Republican `nos pot ti siña man-akomprende sa` megai mankabilosu, lao esta matutuhon i geran para i eleksion gobietno gi sakan 2001 mina` guaha este siha na chinatsaga.

I Democrats gumugupo gi hilo` tasen politika pago ya sige ha estudiaye amano na halige yan pisu debi umana` fitme para `an matto ennao ya tiempo. Mimilalag i sensian kinemprende gi entalo` niha. Prepara hamyo sa` teug` i machalapon yan madisgranan i pattidan Republican. Naturat gi maseha hafa na inasoda` huegon kompetensia, siempre guaha u fan gana yan mapede. Estague` i establisao na kinalamten todo kompetensia kao eleksion offisiat publiko osino huegon bola.

Hu nanae` felisitasion i manmangana yan lokue` triste na mensahe para i mandimalas. Sen mas, hatsa maisa hamyo hulo` sa` ti fingapo` i tano` este na resutta soluke huegon kabayeros. Si Yuus Maase`!