Dibinan Eleksion 1999

Maseha mano, i dicho kuestion hafa masusede na 50 pot siento gi kandidaton Republican manpoduñg guine gi alacha na eleksion. Yangin ta guadog hafa signifikasionña i resutta, klaro na i primera asunto pot rimulinon baban ekonomia `nai megai na taotaota mantai checho` pago.

Gi hilo` este, deste dos años malofan bula na sendalon Republican esta pago mantai checho`. Dispues, mana` fan piliao i sendalo siha gi hechuran insutto siha na palabras ni ti hoñgiyon. Diberas na esta ni guaho mismo ti siña hu chanda este siha na sentimento sa` ginen korason niha `nai mañgekuentos. Yangin ta tutat este na mensahe siha, dañkulo yan homhom mampos na mapagahes ha fafana` i Republican para i eleksion gobietno gi sakan 2001. Este na eleksion kase uttimo na biktoria para i pattidan Republican. Sa` hafa na taiguine sentimentogho?

Megaiña asunton inadisgusto pago gi entalo` Republican ya kikidi para u limienda tatte, muchomas, rikohe tatte i madisgrana na platuña. Maseha silensio `nai masusede, megai man-iridao ginen sesi` traision gi halom i grupo. Mantinane` siempre nu i kuestion i pago monhahayan na gera `nai ha atrebigue` sin preparasion atmas. Sige mas ma-atisa i telehula` yan telerapa`. Magpo` ha` i mamamaila na dos años ya ti u mana` chetton tatte i mafag na platon Republican.

Gi mismo tiempo `nai sige ma-atisa hafa na guaha mankahaga` lao ti mañasaonao guine na checho` traision siha, sige i pattidan Democrat hana` fitme mas i haligen yan pisun hagas hayuña para u gana tatte i konfiansan publiko. Maseha guaha siha fina` chinatsaga, estaya ha upos ayo na eskalera i muna` bulalacho pago i Republican siha na asunto. Dios miho!
Solu dañkulo na milagro masusede, estegue` uttimo na biktoria para i pattidan Republican ya buente manyayas lokue` esta i sendalo manmañufa` gi halom tano` politika sin maseha mohon mantension hanom osino amotsan taloane. Lao este na asunto solu i Republican siña sumatba gi halom siha ha` mismo. Yangin masge` talo (ya kase ennegue` para umasusede), pues areglaye un` solemne na despedida para i sakan 2001.

Para todo i fette na rimulinon kurente gi papa` supen tasen Republican, todo i humasñgune dumandane si Morgen ya ha tuñgo` ha` na ti bailadot, pues siempre lokue` un` dia un` madandane gi fino un` amko `nai ilegña “One pay de odda”. Ti presiso mohon na umana` kahaga` i prohimo yan ayo siha i manbasnag sa` este na asunton ti siha muna` mafañago. Este na sensian betgansa yan imbidio ti homlu` na eksisio gi halom taotaota mismo maseha hafa na galun binibu gaige gi halom korasonmo. Lao polu sa` esta monhayan gi hechuran milag hanom gi papa` tolai. Si Yuus Maase`!
****

Asunton Intension: Guaha un`palaoan benta sumasaga gi mismo lugat `nai sumasaga lokue` un` pale Bhudda. Kada maritira ginen i salon, ha atan guato i pettan i pale` ya ilegña, “Ai, pareho mohon dibotuho yan ennao na relihosu”. Gi mismo tiempo ine`eñgulu` nu i pale` ya ilelegña “Ai ya siña mohon humame maigo` yan ayo na palaoan”.

Kimason i apartment ya achamatai i dos. Gi pettan i lañget, linie` i palaoan benta nu i guaddia ya sinañgane na u halom ensegidas. Gi mismo sakudida sinañgane i pale` na i otro potta `nai u halom, era i pettan sasalaguan. Lalalo` ya ha insiste na lache ayo na disision sa` hagas relihosugue`. Masita i ma`gas i pettan i lañget ensegidas.

Ilegña i primera guaddia: “Un hasso señor `nai un` e`eñgulo` ayo i palaoan benta ya sige un` diseha na in` hamyo maigo”? Taya` ni hafa siña ha sañgan i pale`, pues ha aksepta na umayogua sasalaguan.