Pot grasia siha gi linala`ta
Este i lalañgita na gulusina tai malefagho sa` estegue` ninaen` nanaho gi un` Christmas dispues de Misan Gayo. Un` latan petrolio `nai masasaguan. Era ninaen` un` parientes ginen Luta.
Ai, mampos poduñg siñientegho sa` sapatos yan biskileta hu guiguife para regaluho. Lao` gi hilo` pineble, taya` kampo para un` maregalo nu i guinififimo. Guihe na tiempo, aksepta hafa guaha ya chamo fan a`atan tatte sa` sumen chatsaga i linala` mayoria gi taotaota.
`Nai esta echo-yo` lahe `nai hu komprende sa` hafa na lalañgita regalon mame guihe na Noche Buena. Hu faisen si nanaho hafa na ayo hanae` ham. Chumaleg gi hilo` misen lagoña ya ilegña: “Ai, lahiho, ayo ha` guinahata guihe na tiempo.” Umafagcha` yan i tiempon lalañgita gi uttimon i sakan. Ai, tatfoi minalagoña lao ayo ha` siña dagiña nu i tropa.
****
Guihe na tiempo, todo i tinahoñg in` fatitinas ha` gi finagpo` nobenan i bisino siha. Bastara ke man-senpoble ham, sumen namagof na okasion i finagpo` nobena gi bisino siha sa` mangai chansa ham talo mañochu inafliton manog putlilo yan hinegsa` ni mana` chinatfinue` achote. Piot ya guaha ensaladan pipino, dañkulon gupot esta ayo para hame.
Ai, guihe na tiempo gigon mabendise i lamasa, fanugoñg ya unna` bulala platumo ya un` falag i gima` `nai siña un` kalamot hafa ninayan-mo. Taya` tiempo para un` gimen hanom maseha niniñikot hao nu i añglo` hinegsa`. Alulaye antes de u fan matto i pumalo ya un` magagao.
Dispues, bira hao ya un` lotge sahguanmo kool-aid. Gimen adumididi` pot no u hokog ensegidas. Ai na tiniladan asukat gi halom kool-aid. Lao haye para u hinahasso pot chetnot daibites `nai sesso tinetpe hao hailas?
Fino` un` mauleg na amiguho `nai didikiki` ya kado` kumakate pot leche: “Lite i leche ni mana`ye asukat lao muñga madilega` (malegua`)”. Pindihote! Estegue` pago na sumen mames ham na dos. Sige pago ayo siha na asukat i ti “madilegua`” de ha diritegue` gi halom haga` mame. Ai i “muñga madilegua`” bidaña nu hame.
****
Memegaiña guihe na tiempo sentadan kafe yan hinegsa` osino aguon haya tat komo suni, choda yan mendioka. Gigon loglug` i kafe, na listo hao manna`yan ya unna` hinafot nu i un` tinilada na asukat. Dispues, tulos ya un` fan aligao andun chupa para un` tane` hao mientras un` konsidedera kao guaha neñkano` para i otro birada. Dios miho!
Chamo masuesuette fina kandin Amerikano guihe na tiempo sa` matatiye hao nu i tropa kalan mahaga` galago estake malachaiguan hao nu i namo. Hu hasso mana` dimo nu i un` chetluho pot Sugar Daddy. Hana` chikoyo` nu i mutoñg damagasña ni tatnai ha fagase. `Nai tumalag hilo`yo`, ha lachai esta i kandin Sugar Daddy. Diberas na hu hago` hulo` pachotña ensegidas nu i trumponho pot para bai`n empas na dos. Pindeho!
****
Guihe na tiempo, lañget i para un` chochu manog putlilo (fryers). Pago na tiempo, achogha` ti bai`n` alie` yan si gransumatlago. Diberas, mañge` manog fresko. Hana` hassoyo` `nai maplanta un` biahe ya mamaisen un` palaoan “kao manog magahet”. Dios miho, ke lao “Kao guaha manog timagahet?” Pindeha! Muñgague` chumochu manog malalago gi eda`. Ke pues polu ya u chochu manog alamle. Dios miho!
****
Ume`ekuñgog ham ya i kiñaduho fina` kuentos siha (speech) gi gipot kompania. Ha faisenyo` kao “mahuñgog mohon i mansañgan”. Hu oppe “buente”. Dispues ha sablasusyo` nu i fette na kuestion: “Lao makomprende mohon hafa masañgan?” Diberas, mañge` na chaleg dispues. I humestotbayo` i fasun hipokrito siha gi oriyan mame. Dios miho!
