Mas kritikat na sakan para Marianas

Pago na sakan mas ha lasgue atmas niha i kumokontra Marianas direchoña umeksisia gumobietnan maisague`. Todo klasen `an ñgañgas bagasu siempre mana` fan sietbe kontra hita. Pot este na rason na pago na biahe debi ta sakrifisian ñaihon dididi` fiñkasta para ta protehe direchota taimano i pluma na kontrata gi papa` i Covenant.

Dimas mohon de sige ma-abiba manfatsu siha na infotmasion pot hita, maulegña u reparan maisa siha sa` pago ha` `nai hulie` taotao hana` sietbe eksision hipokrito tat komo dagao acho` kontra i gima`ta ya manmalefa na siha lokue` mañasaga gi un` guma` ni todo espehos deste pisu, luga, bintana yan atof. Kalan mohon mantai problema, lao gaige giya New York yan California i mas manbahu na fakteria siha. Taya` respeto gi direchon mismo empleao niha. Direchas kuerdas manma-abubusa i los prohimos.

Esta ti fahoñgge i manchogue kontra famaguon lancheros siha ginen Mexico. Kada ogaan` mientras i mancha-idat niha manmamomokat para i eskuela, siha i los prohimos manmamatcha para halom hatdin para u fan man`fe` gulusina siha. Ai na tailayen chochu` este kontra mas ke 300,000 mit na famaguon menos de dose años siha. Lao tatnai ta huñgog mañgalamten i kontrariuta para umañega direchon este siha na estados pot masede manmafa` esklabo este siha na famaguon.

Amano mohon `nai gaige konsiensian niha `nai ma-upos primera probleman kontra famaguon Mexikano? Ni siha mismo i kontrario timalago` masede famaguon niha na u fan mafa` esklabo lao ha ekspepekta fresko siha na produktion fangualuan ni kinisechan menos de idat siha na manhoben. Ti baiho a-aguat yangin ti magahet este siha na mattratamiento gi mismo halom iya California, Washington yan todo estado ni guaha fangualuan siha.

Hu komprende yan baiho aksepta gi hilo hinimidde yangin magahet na mampos dañkulo yan seriosu probleman hutnaleros guine ginen otro lugat siha. Lao diberas siempre u anog klaro un` dia hafa i offisiales Depattamenton Interior na malabida siha manmachogue pot para umana` fan mamahlao i mismo membron Congresson America ni manmatto mage para u lie` gi dos atadog niha akuanto minagahetña i manmalalagnos siha na infotmasion pot Marianas.

Fuera de dos na pindeho tat komo si Congressman George Miller, 99 pot siento mañgontento `nai malie` na lamayot patte i mansañgan siha ginen i Depattamenton Interior puru finabrikan niha mismo. Todo klasen preparasion kontra ayo siha na membro i bumisita hit manmalabla i los prohimos sin nesessidat. Ha soda` siha malabida si Congressman Don Young ya este siha na asunto siempre u fan malagnos dispues.

I otro na siempre mas didog na gera pago na sakan i makomprende ni taotao President Clinton na i offisinan presidente u sulun ginen kanai niha ya u hanao guato gi disposision i tagfe`na na kandidato as Señor George W. Bush. Siempre u gana i White House si Governor Bush ya u fagpo` pot uttimo besis este siha na buruka. Este layeye na mampos man-ansia pumetsige i para umana` dimo Marianas gi ha gogosa siha na pudet pago na tiempo taimano gaige gi papa` kontratan i Covenant.

Mañeluho, maila` tana` fan daña sentimentota gi hilo` antao siha na rason ya ta protehe fehman i direchota gumobietnan maisa hit sin mandaton gueko siha na lai ginen lago. Yangin guaha sentimenton miyo, pues na tutuñgo`-yo` en kuando kuando ya ta abiba prumutehe i irensiata ginen as guelo yan guela. Siha mismo pumañot todo mattiro yan minamahlao pot para ta fan maprotehe. Maila` ta petsige i guinifen niha para i manatatte lokue` na natibo siha. Si Yuus Maase`!