Gi uttimo besis i tumacho, safu
Mampos ha estotbayo` ayo na mensahe i fumaninihe i representanteta giya Washington. Yangin gaige Washington un` sunido ha kakanta, `an gaige guine otro tunadaña. Mampos hihot relasionña yan kontrariuta.
Esta i kontrariuta ni hafa ta masañgane, malaet` mampos paladat niha nu i asunton tano`ta layeye pot debi u bailaye i sunidon i inetnon US Textile Labor Unions giya America. Pot solu motibo na uma`aguaguat si Congressman George Miller yan Senator Daniel Akaka: Si Señor Miller ginen California `nai dañkulo i industrian magago.
Si Akaka ginen Hawaii `nai metgot i inetnon hutnaleros (labor unions).
Lao gi este siha na mattiro, guaha esperansa (hope) gi `nos kuantos ginen man-ma`gasta: Iya monana gaige si Speaker Benigno R. Fitial yan i mangachoñgña para u madefende amano i siña direchon taotao Marianas gumubietnan maisa siha taimano i mapluma gi papa` i kontratan i Covenant.
Sumen na`triste lokue` i finatton tentago` Presidente Clinton as Señor Fernando Aranza ni chumuchule` mage un` paketen planon ekonomia para ta konsidera komo mapan adelanton iya Marianas. Lao este na plano mampos atrasao yan suspichao na pakete. Un` mapa `nai maseñala i para umana` dimo Marianas segun i planon i Depattamenton Interior ni mafananaan` federal takeover.
I daño gi esta ha` malañgo na ekonomian Marianas gi papa` planon Depattamenton Interior sobla de para u destrosia todo i finachucho`ta gi hagas ta atetuye na adelanto gi ekonomiata pago. Taya` para u benefisio i planon Depattamenton Interior fuera ke i prohimo ni chumuchule` mage sa` manae` pudet pumaseho ginen salape` taxpayers giya America.
I Depattamenton Interior mampos trata komo kontrario Marianas deste 1993. Lao obligao gi papa` i kontratan i Covenant na u adelanta linala` taotaota sin ditension. Sumen na` bulacho `nai sesso antes manmasoyu` hit para tana` setbe un` probision `nai siña u lala` mas i industrian magago guine. Lao gi alacha matulaika sunidon niha ya gaige pago na para umafondu este na industria ni sumusetene Marianas gi presente `nai poduñg i bandan industrian turista.
Hafa na tailaye este na plano?
Todo komunida giya America mayotmente ti matuñgo kao guaha gobietnon federat sa` todo pot todo, siha mismo umaligao mamaisa siha gi nesessidat taotao niha. Buente pot mampos mauleg yan homlu` kinalamten industrian magago guine na ma-espipiha impeño para umana` ke matompu` pot para u lala` industrian niha giya California.
Hafa linachiña este na plano?
Mampos lagse` uson para u fan maliñgo chochu` Amerikano.
Ke lao ti man sudadanon Amerika lokue` i natibo guine?
Oppan yan klaro na todo kabayeron nasionat ni kumokontra hit hagas manma`apasiye nu gaston niha politika ni US Textile Labor Unions ya taya` kampo pago rumikonose konsiensian niha sa` oran man-apase tatte dibi. Estegue` na rason na sige ha` manmapoñga hit `nos pot magahet na dañkulo na inesague guaha gi manera `nai ta trarata i manmachochochu` siha guine na industria.
Ala kuenta, i asunto pot ekonomian industrian magago giya California. Lagse manmapoñga hit sa` taya` representanteta gi dos guma` Congresson iya Estados Unidos de America.
Mansuette hit na guaha siha man-atuñgo`ta tat komo i mas metgot na membron Congresso as Congressman Tom DeLay yan i mangachoñgña siha. Sin ayudon niha hagas manmaluño` hit ginen pudet direchota gumobietnan maisa hit.
Buente dipotsiha ha` i chalan justisia mampos anagho yan mikantit. Lao chatmiyo fan hinahalañg, maila` ta fan aguot` kanai ya ta plaiteha i direchota sa` ayo ha` para u fan safo i manohge pot direchon niha komo sudadanon Amerika. Sen mas, Si Yuus Maase`!
