Uno Mona, Tres Tatte

Ti hu tuñgo` kao dipotsihe hayuta i para tana` lebog i hanom `nai mangigimen hit pat gaige este na finatso gi atetun lamegai gi offisiat publiko siha.

Inipos man-malisioso yan imbidioso hit na taotague ya hasan `nai tanae` kampo toa` yan antao na patte gi hinasota gi konsiderasion asunton linayhan.

Nuebo `nai numa`lo tatte este na atetu gi fehman na diniseha para umahatsa dinuebo i telai publiko ni madestrosia nu i hagas kabesanten lehislatura.

Dañkulo na daño tumunog gi linala` man-inosiente na publiko. Yangin haye guaha dinidaña, pues faisen maisa hamyo haye man-estaba guennao na puesto gi mapos na sais años.

Hu komprende na malaet` halom pachot niha gi kada biahe `nai hu apunta huyoñg este siha na finatsu. Lao niñgaian `nai baiho sede na u fofo`na i politikan petsonat ke interes i mayoria ni manmapo`lu komo man-inosiente.

Todo pinetsigen asunton linahyan tinaka` tiempo estake siña talie` tumunog gi publiko hinerat i mananañgga na benefisio. Pot mas taftaf, ennao i tres años na tiempo dinira estake u guaha alibio gi haanen publiko gi señgsoñg siha.

Hafa este na huegon diu `nai un` bachet ha pipipet i otro bachet pot no u poduñg gi kantit. Dios miho! Hafa i problema mohon gi este siha na finatsu?

Memegaiña umatrerebe siha gi ti fafayen niha. Hasan lokue` talie` na mataitai i materiat ni mapropopone. Ginen este na chinatsaga, manhuyoñg chatkonsiderasion siha na asunto sa` ti masede antao na inestudia yan satton na kinimite pot para uma-adelanta linala` publiko hinerat.

Mapos i guaguan na tiempo! Ha diñgo hit i asunto siha. Gaige na sige pago ta dulalag i hagas maliñgo siha na appottunidat umaregla halom gima`ta. Mampos ha estotbayo` este na atetun hagas kabesanten lehislatura. Hafa mohon i otro problema na sige pago i man-inosiente na publiko man-ensinahyao?
Megai gi hagas ta pega halom na representanten publiko ma-u`usa yan ha lañgag fumatta publikamiente i siha ha` mandinanche hinasson niha gi todo disposision asunton linahyan.
Esdesit, ni uno malago` umekuñgog hafa sesso sentimenton i taotao siha gi señgsoñg. Ti ha hoñgañgyo` na esta pago sige ha` maplaitea guinifen niha fatsu siha na plano para i publiko hinerat. Man-bachet yan tañga gi fatsu siha na checho` niha sa` maguiguife tronun i mas tatkilo` na siyan publiko.

Bonito este siha na pilea i para u fan huyoñg gi estrakadan politika ni para umatutuhon gi uttimon este na sakan. Dañkulo na fandañgo ya sumasaonaoyo` mañgombida para este na gupot linahyan. Todo klasen putahe guaha deste kelaguen kualifikasion, eksperiensia, edukasion, tañga yan bachet, kada uno mona tres tatte, yan otro siha man-mañge` na sentadan natibo. A` Saina!
****

Duro i otro gaseta mañgge` pot gaston salape` publiko gi kareran i sanpapa` na guma` para iya Washington pago na semana. Klaro na `nos pot gasto i makeke apunta huyoñg, lao tai sensia kumomprende hafa sesso i dicho asunto na mana` guaha este na hinanao: Pot proteksion direchon natibo gumobietnan maisague taimano i mafitma gi papa` i kontratan i Covenant. Guiya este na klasen atetu i bisiun na`tata sa` buente mampos man-kadada` guieñg niha. Olara mohon ya sumaonao gi madefenden direchon natibo sa` enague` ya hululo` gi responsablidatña komo un` gaseta guine gi komunidat iya Marianas. Lastima!